Kenehe 28
28
1Oi na fekau ai e Ihaako ia Iakopo, ma kua fakafeiloaki atu ki ei ma tana fakatonuga e vēnei, “Ko koe e hē āvaga ki he fafine Kanana. 2Kae fano ki Mehopotamia, ki te fale o Petueli te tamana o tō mātua, ma fakaipoipo ki hētahi o tautiti i kinā, ki hētahi o afafine o Lapana, te tuagane o tō mātua. 3Ke fakamanuia atu te Atua Mālohihilihili#28.3 Epelu Eli Hatai kia te koe, ma fōki atu ni au fānau e tokalahi, kae ke kavea koe ma tamana o ni nuku e tokalahi! 4Ke fakamanuia koe ma nā lāpuna o koe e ia, e vēia ko te fakamanuiaga e ia o Apelaamo, ma ke fai mo koe te fenua tēnei kua nofo ai koe, e ve ona fōki e te Atua kia Apelaamo.”#Ken 17.4-8 5Oi na uga ai loa e Ihaako ia Iakopo ke fano, ma na fano ai ia Iakopo kia Lapana i Mehopotamia. Ko Lapana ko he ataliki e o Petueli te ha-Alamā, te tuagane o Lepeka, te mātua o Iakopo ma Ehau.
Kua Fai tētahi Āvaga a Ehau
6Kua iloa e Ehau ko Iakopo kua fakamanuia e Ihaako, ma kua uga ki Mehopotamia ke hakili ai hana āvaga. Kua ia iloa foki ko Ihaako na lea kia Iakopo, i te tuku atuga ki ei o tana fakamanuiaga, ko ia e hē āvaga ki he fafine Kanana. 7Kua mautinoa foki e ia ko Iakopo na uhitaki ki tona tamana ma tona mātua, ma kua fano ki Mehopotamia. 8Ma kua mālamalama foki ia Ehau, ko tona tamana ko Ihaako, e hē fiafia ki nā fafine Kanana. 9Oi na fano ai ia Ehau kia Ihamaeli te ataliki o Apelaamo, ma na fakaipoipo ai ki te afafine o Ihamaeli ko Mahalata, te tuafafine o Nepaiota.
Ko te Miti a Iakopo i Peteli
10Kua teka kehe atu ia Iakopo mai Pelehepa ma kua kāmata fakatū tana malaga āgai ki Halana. 11Kua tau atu ia ki he kogāfenua oi na mālōlō ai i kinā mo te pō, ona ko te lā kua goto. Kua puke atu ki he fatu, oi takoto ai ki lalo kae aluga ki ei, ma kua moe. 12Ma na fai ai tana miti, ma ia kitea atu he kākega e fakatū ki te kelekele te pito ki lalo kae tau ki te lagi te pito ki luga, e olo ai ki luga ma ōifo ai ki lalo nā āgelu a te Atua.#Ioa 1.15 13Ma ko te Aliki nae tū tafapili ake i ona tafa#28.13 i ona tafa pe i luga o te auala fai hitepu ma lea vē ake, “Ko au ko te Aliki, te Atua o Apelaamo ma Ihaako; ko te fenua kātoa uma tēnei, e pa ki te mea tēnā e takoto ai koe, ka kō fōki atua kia te koe ma nā lāpuna o koe.#Ken 13.14-15 14Ka tokalahi nā lāpuna o koe e vē ko te pefu i te kelekele, ma ka takape atu kilātou ki itū uma o te lalolagi; ma e ala ia te koe ma ō lāpuna, ka fakamanuia ai e au ia mālō uma.#28.14 e ala ia te koe… mālō uma pe ko nā mālō uma lele ka leamai kia te au ke fakamanuia ake kilātou e vē ko te fakamanuiaga e au o koe ma ō lāpuna#Ken 12.3; 22.18 15Kikila, ko au ka fakatahi pea lava ma koe, ma puipui kia te koe i hō he mea e fano koe ki ei; ma e kō toe kaumaia lava koe ki te fenua tēnei. E hē kō tuku tīakia lele koe, heiloga kua uma te kō faia o nā mea uma lele na kō folafola atua kia te koe.”
16Kua ala ia Iakopo, ma nae māfaufau lava ki tana miti ma lea vē ai, “Ko te Aliki e i kinei! E i kinei i te mea tēnei kae e hēki iloa e au!” 17Na mataku lele ia Iakopo ma lea vē ai, “Kai te fakamātakutaku o te nofoaga tēnei! Ko te fale moni lava tēnei o te Atua, ma ko te alapupuni tēnei ki te lagi.”
18Oi na tū ai ki luga ia Iakopo i te tāeaopōpō, kua kave e ia te fatu nae aluga ki ei ma fakatū ki luga i te pito, ke fakamanatu ai te koga na fakakitea ake ai te Atua kia te ia. Oi na liligi ai e ia te lolo olive ki luga o te fatu ke fakapaia ai mo te Atua. 19Na fakaigoa e ia te nofoaga tēnei ko Peteli.#28.19 Peteli Ko te uiga o te igoa tēnei i te gagana Epelu ko te fale o te Atua (Ko te nofoaga tēnei nae igoa muamua kia Luhu.) 20Oi na fai ai te tautōga a Iakopo e vēia, “Kāfai te Atua ka fakatahi pea ma au ma puipui mai kia te au i taku malaga tēnei e fakaauau, ma fōki mai e ia ni aku meakai ma ni oku kie, 21ma kāfai ia au e toe foki mai ma te haogalēmū ki te fale o toku tamana, oi ka fai ai loa te Aliki ma oku Atua. 22Ma ko te fatu tēnei kua fakatū e au, ka fai ma fakailoga o te nofoaga ka tāpuaki atu ai ia tagata kia te koe, ma ka fōki atu e au kia te koe te tahi-vae-hefulu o nā mea uma e kē fōki maia kia te au.”
Currently Selected:
Kenehe 28: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
