Kenehe 27
27
Kua Fakamanuia e Ihaako ia Iakopo
1I te taimi kua matua lele ai ia Ihaako ma kua pōuli ona mata, na fekau ai e ia tona ataliki matua ko Ehau, ma na lea vē atu ai ki ei, “Toku ataliki!”
Na tali mai ia Ehau, “Ko au tēnei.”
2Ma kua lea atu ia Ihaako, “Kikila, ko au kua matua, ma e hē kō iloa pe ko āfea te i na ka oti ai au. 3Ko te mea ia, kave au kaukupega fanafana ma fano ki te togāvao oi tuli mai he manu tāvao mā aku, 4ma tunu mai ai he meakai malie e fiafia au ki ei, oi kaumai ai ke kai au. Kāfai e uma toku kai, ka tuku atu e au kia te koe taku toe fakamanuiaga, ka ko hēki oti au.”
5Na lagona atu e Lepeka ka koi tautala vēnei atu ia Ihaako kia Ehau. I te fanoga la o Ehau ki te togāvao oi tuli manu tāvao, 6oi na lea vē atu ai ia Lepeka kia Iakopo, “Na kō lagona atu tō tamana e lea vē kia Ehau, 7‘Kaumai kia te au he manu tāvao ma fakavela mai haku meakai malie ke kai au. Kāfai e uma toku kai, oi kua tuku atu ai loa kia te koe taku fakamanuiaga i mua o te Aliki, ka ko hēki oti au.’ 8Ko te mea la ia toku ataliki, fakalogo mai ki te mea e lea atu ai au. 9Fano ki te tātou lafumanu oi popoki mai ni punuāoti pepeti e lua, ke tago au oi fakavela mai ai te meakai malie e fiafia ki ei tō tamana; 10oi kua kave ai e koe kia te ia ke kai ai, kae ke tuku atu e ia tana fakamanuiaga kia te koe, ka ko hēki oti.”
11Kae kua lea atu ia Iakopo ki tona mātua, “Kikila, ko toku uho ko Ehau e taufulufulua tona tino, kae ko toku tino e lamolemole. 12E i nā tago mai nei toku tamana ki toku tino, oi vēake ai ko ia kua fakavalea e au; ma ka ono pakū mai ai ki oku luga he fetuku kae hē ko he fakamanuiaga.”
13Na tali mai tona mātua, “Ke pakū mai ki oku luga ho he fetuku e fakauta atu kia te koe, toku ataliki; kae fai te mea e lea atu ai au, ma fano oi kaumai nā punuāoti kia te au.” 14Oi na fano ai loa ia Iakopo oi kaumai nā punuāoti ki tona mātua, ma na tapena ai e tona mātua he meakai malie e fiafia ki ei ia Ihaako. 15Ma na kave ai e Lepeka nā kofu e hili te lelei o Ehau nae teu e ia i te fale, kua fakakofu ai tona ataliki tamaiti ko Iakopo. 16Kua tatao e ia nā lima o Iakopo i nā paku o nā punuāoti, ma tatao foki ma te vāega o tona ua nae hē taufulufulua. 17Oi na fōki ai e ia kia Iakopo te meakai malie ma te falaoa na tao e ia.
18Oi na fano ai ia Iakopo ki tona tamana ma lea vē atu ki ei, “Toku tamana!”
Na tali mai ia Ihaako, “Hau, ko aina kō koe, toku ataliki?”
19Kua tali atu ia Iakopo ki tona tamana, “Ko au ko Ehau tō ataliki matua; kua uma te kō faia o te mea na lea mai ai koe. Ke i nā nofo mai la ki luga oi kai hau mea kanofi o te manu tāvao a aku na tuli, kae ke tuku mai ai e koe kia te au, tau fakamanuiaga.”
20Na fehili atu ia Ihaako, “Toku ataliki, na vēhea ona maua vave e koe?”
Kua tali mai ia Iakopo, “Ko te Aliki te Atua o koe, na maua ai e au te fehoahoani i te hakiliga.”
21Oi na lea atu ai ia Ihaako kia Iakopo, “Toku ataliki, hōhō mai ke paki atu au kia te koe, ke mautinoa lelei e au ko koe ko Ehau.” 22Kua hōhō mai ia Iakopo ki tafa o tona tamana, oi na paki atu ai nā lima o te tamana ki tona tino ma lea vē, “Ko te leo o koe e vē ko te leo o Iakopo, ka ko nā lima o koe e vē ko nā lima o Ehau.” 23Ma e hēki ia mateagia ia Iakopo, ona ko nā lima o ia e taufulufulua e vē ko nā lima o Ehau. Kua kāmata ka tuku atu te fakamanuiaga a Ihaako, 24kae kua toe fehili foki, “Ko koe moni ko Ehau toku ataliki?”
Na tali mai ia Iakopo, “Io, ko au.”
25Kua lea atu ia Ihaako, “Ke i na kaumai loa ke kai haku mea kanofi i te manu tāvao a koe na tuli, ma tuku atu ai loa taku fakamanuiaga.” Oi na kaumai ai e Iakopo te meakai ki tona tamana; na ia kaumai foki he uaina, ma na inu ai tona tamana. 26Oi na lea atu ai tona tamana ki ei, “Toku ataliki, hōhō mai oi hogi mai kia te au.” 27Ka koi hōhō mai ia Iakopo ke hogi ki tona tamana, ka kua hogitia e Ihaako nā kofu ma na ia iloa ai ko Ehau—oi na tuku atu ai loa kia te ia tana fakamanuiaga, ma na lea vē ai,
“Kikila, ko te manogi o toku ataliki
e vē ko te manogi o te vao
kua uma te fakamanuia e te Aliki.#Epe 11.20
28Ke fōki atu e te Atua te hau mai te lagi,
ke fakalelei ai ō kelekele,
ma ke fōki atu ni haito ma ni uaina e lahi.
29Ke fai iētahi mālō ma kaukauna kia te koe,
ma ke ifo atu kia te koe ia tagata uma.
Ke kavea koe ma pule ki nā uho uma o koe,
ma ke ifo atu kia te koe nā ataliki o tō mātua.
Ke fetuku kilātou e fetuku atu kia te koe,
ma ke fakamanuia kilātou e fakamanuia atu kia te koe.”#Ken 12.3
Kua Fakatagi ia Ehau mo te Fakamanuiaga a Ihaako
30Kua uma te tuku atu o te fakamanuiaga a Ihaako, ma na teka kehe atu lava ia Iakopo mai tona tamana, kae pa mai ia Ehau i tana tuligā manu tāvao. 31Na tunu foki e ia he meakai malie ma kaumai ki tona tamana. Ma kua lea vē atu ki tona tamana, “Toku tamana, ke i nā nofo mai la ki luga oi kai hau mea kanofi o te manu tāvao a aku na tuli, kae ke tuku mai ai e koe kia te au, tau fakamanuiaga.”
32Kua fehili atu ia Ihaako, “Ko aina kō koe?”.
Na tali mai ia Ehau, “Ko au ko Ehau tō ataliki matua.”
33Kua kāmata oi tete lahi te tino o Ihaako i te mataku, ma na fehili vē atu ai, “Ko ai kō la tē na tuli manu tāvao ma kaumaia kia te au, ma kua uma toku kai ki ei ka ko hēki hau koe? Kua kō fōkia ki ei taku toe fakamanuiaga, ma ka tūmau lava ia te ia ke pa ki te hēgata.”
34I te lagona atuga e Ehau o nā kupu a tona tamana, oi na tagi taukekē ai loa i tona fakanoanoa ma lea vē atu ki tona tamana, “Toku tamana, tuku mai foki kia te au, tau fakamanuiaga!”
35Na tali mai ia Ihaako, “Ko tō uho na hau oi fakavalea au. Kua kave e ia te fakamanuiaga o koe.”
36Kua lea atu ia Ehau, “Ko te fakalua tēnei oi fakavalea au e ia. Hētioa ko tona igoa ko Iakopo.#27.36 Iakopo Ko te igoa tēnei i te gagana Epelu e tāi vē ko te fakaleoga o nā kupu mulivae ma te fakavalea Na ia kavea toku tofi ulumatua, ma ko tēnei foki kua kave e ia toku fakamanuiaga. E hēki kē tāofia lele he fakamanuiaga mo oku?”#Ken 25.29-34
37Na tali mai ia Ihaako kia Ehau, “Kikila, kua uma te kō faia o ia ma pule ia te koe, ma ko nā uho uma o ia ka fai ma ana kaukauna. Kua fōki e au mo ia nā haito ma nā uaina. Nei, e hēai ma he mea e kō mafaia ke fai mo koe, toku ataliki!”
38Kua lea atu ia Ehau ki tona tamana, “Toku tamana, e fokotahi oioti lava tau fakamanuiaga? Fakamanuia mai foki kō ma au, toku tamana.” Oi na kāmata ai kua tagi.#Epe 12.17
39Oi na tali atu loa ia Ihaako ki ei,#Epe 11.20
“Kikila, e hēai he hau mai te lagi ki te mea ka nofo ai koe.
E hēai ni kelekele lelei mo koe ke ola lelei ai nā mea totō.
40 #
Ken 36.8; 2 Tup 8.20 Ko te pelu lava te ka ola ai koe,
ma ka kavea koe ma kaukauna a tō uho;
kae kāfai koe e kāmata oi teteke,#27.40 teteke pe hē totoka
ko koe la ka hē toe i lalo o tana pule.”
41Mai te taimi tēnā, ko Ehau kua ita lele kia Iakopo, ona ko te fakamanuiaga kua fakamanuia ai ia e Ihaako tō lā tamana. Na vē ifo ia Ehau i tona loto, “Ko te taimi o nā fakanoanoaga ki te oti o toku tamana kua tāli pa mai; kāfai e uma atu, ko Iakopo ka kō tāmatea.”
42Kae na fakalogo ia Lepeka ki nā kupu nae tautala ai ia Ehau tona ataliki matua, oi na fekau ai e ia ia Iakopo tona ataliki tamaiti, ma kua lea vē atu ki ei, “Kikila, ko Ehau tō uho e taumafai ke tāmate koe, ke taui ai au mea na fai ake kia te ia. 43Ko te mea ia toku ataliki, fakalogo mai ma fai te mea e lea atu ai au. Fano vave loa nei ki te fale o toku tuagane ko Lapana i Halana, 44ma nofo ai i ki nā mo he taimi, ke uma te ita o tō uho 45ma puli ia te ia tau mea na fai ake kia te ia; oi kua uga atu ai e au he tino ke kaumai koe. Ko au e hē fofou ke feoti uma oku ataliki e toka lua i he aho e fokotahi.”
Kua Uga e Ihaako ia Iakopo kia Lapana
46Kua lea atu ia Lepeka kia Ihaako, “Ko au kua fītā ma fiu i nā āvaga nukukehe a Ehau. Kāfai ia Iakopo e āvaga foki ki he fafine ha-Hitē, e hili ai toku oti.”
Currently Selected:
Kenehe 27: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
