Kenehe 29
29
Kua Taunuku ia Iakopo ki te Fale o Lapana
1Na fakaauau te malaga a Iakopo, ma na tau atu ai ki te fenua o nā tino nae nonofo i Hahae. 2Kae nā lava e teki kua ia kitea atu he vaikeli i te fenua, ma ni lafumāmoe e tolu e tākokoto fakatāmilo ai. Ko nā lafumāmoe nae fakainu i te vaikeli, ma nae iei te fatu fuaefa e pupuni ai te gutu o te vaikeli. 3Kāfai nā lafumāmoe e fakatahitahi mai ki kinā, nae māhani oi olo nā leoleomāmoe oi fuli kehe te fatu ke fakainu nā māmoe. Kāfai e uma te fakainu oi toe fuli ai te fatu ke pupuni te vaikeli.
4Kua fehili atu ia Iakopo ki nā leoleomāmoe, “Te kau uho, ko koutou nei e ōmamai i fea?”
Na tali vē mai kilātou, “Ko kimātou e ōmamai i Halana.”
5Kua toe lea atu ia Iakopo, “E koutou iloa nei ia Lapana, te makopuna o Nahoa?”
“Io, e kimātou iloa,” kua tali mai kilātou.
6“E mālohi nei?” kua toe lea atu ia Iakopo.
Kua tali mai kilātou, “Io, e mālohi lele. Kikila atu, tēnā tona afafine ko Lahela e takitaki mai tana lafumāmoe.”
7Kua lea atu ia Iakopo, “Kikila, ko te lā koi i luga lele ma ko hēki pa ki te taimi e fakatahitahi ai nā lafumāmoe; heā te hē keinā fakainu ai nā māmoe, ma toe kave ai ki te mea e iei te mutia ke kakai ai?”
8Kae kua tali mai kilātou, “E hē mafai heiloga ko nā lafumāmoe kua fakatahitahi uma, ma fuli kehe ma te fatu i te gutu o te vaikeli; oi kua fakainu fakatahi ai nā māmoe.”
9Ka koi faitatala ia Iakopo ma nā leoleomāmoe, kae pa mai loa ia Lahela ma te lafumāmoe a tona tamana, auā ko ia ko he leoleomāmoe 10Kua kitea atu ia Lahela e Iakopo ma te lafumāmoe a Lapana te tuagane o tona mātua, oi na fano ai ki te vaikeli kua fuli kehe te fatu nae tapuni ai, ma fakainu te lafumāmoe a Lapana. 11Oi na hogi atu ai ia Iakopo kia Lahela, ma kāmata oi tagi leo lahi i tona fiafia. 12Kua lea atu ia Iakopo kia Lahela, “Ko au he tamaiti e a Lepeka, te tuafafine o tō tamana.”
Oi na vili ai loa ia Lahela oi taku ki tona tamana; 13ma i te fakalogoga o Lapana ki te tala e uiga ki ia Iakopo te tama a tona tuafafine, oi na vili ai oi fakafeiloaki ki ei, kua fuhi mai e ia ia Iakopo ma hogi ki ei, oi kave ai ki te fale. Na taku e Iakopo kia Lapana nā mea uma lele, 14ma na lea vē atu ai loa ia Lapana kia Iakopo, “Io, hāloa e hako lava, ko koe ni kakano ma ni toto moni lava e o oku.” Ma na nofo ai ia Iakopo i te fale o Lapana, i he māhina kātoa.
Kua Fakaipoipo ia Iakopo ki nā Afafine o Lapana
15Oi na lea atu ai ia Lapana kia Iakopo, “Ko koe e hē tatau ke galue fua mo oku ona ko koe he kāiga e ōku. Lea mai pe fia te totogi e tatau ke totogi ai koe”. 16E toka lua ia afafine o Lapana; ko te teine matua ko Leaha, ma ko te teine tamaiti ko Lahela. 17Ko Leaha nae mata mānaia#29.17 mānaia pe vāivai ka ko Lahela nae fuaitino lelei oi toe kaulelei.
18Ko Iakopo kua fofou kia Lahela, oi na lea ai vē, “Ko au ka galue mo koe mo he fitu tauhaga, kāfai e fakataga e koe ke āvaga au kia Lahela.”
19Kua tali mai ia Lapana, “E hili atu ia te au te kō fōki atua o Lahela ke fai ma au āvaga i lo te āvaga o ia ki hētahi tino; nofo vēnei la tātou nonofo.” 20Oi na galue ai ia Iakopo mo he fitu tauhaga, ma na vē lava ni nāi aho oioti te mataloa kia te ia, ona ko tona alofa kia Lahela.
21Oi na lea atu loa ia Iakopo kia Lapana, “Kua kātoa te fitu tauhaga e galue ai au mo koe; ke i na tuku mai loa tō afafine ke fakaipoipo au ki ei.” 22Oi na fakatonu ai loa e Lapana ke fai he kaiga lahi o te āvaga, ma na valakaulia ai nā tino uma lele. 23Kae ki te pō, kua hē ia kaumaia ia Lahela kia Iakopo kae kua kaumai e ia ia Leaha; oi na momoe ai ia Iakopo ma Leaha. 24(Na fōki e Lapana tana pologa fafine ko Helepa ke fai ma tāvini a tona afafine ko Leaha.) 25Na fātoā iloa e Iakopo i te tāeao ko Leaha te na momoe kilāua. Oi na fano ai kia Lapana ma lea vē atu ki ei, “Heā ta koe kua fai mai kia te au? Ko au na galue mo koe kae ke nofo au kia Lahela. Heā te kua kē fakatogafitia ai au?”
26Kua lea atu ia Lapana, “E hē he aganuku a te mātou fenua, ke fōki te afafine tamaiti ke fakaipoipo muamua i lo te afafine matua. 27Fakauma pea nā fiafiaga o te fakaipoipoga i te vaiaho tēnei, oi kua fōki atu ai e au ia Lahela, kāfai koe e malie ke galue mo oku mo hētahi fitu tauhaga.”
28Na malie ia Iakopo, ma na uma loa te vaiaho o nā fiafiaga, oi na tuku atu ai loa e Lapana tona afafine ko Lahela kia Iakopo, ke fai ma ana āvaga. 29(Na fōki e Lapana tana pologa fafine ko Piliha ke fai ma tāvini a tona afafine ko Lahela.) 30Oi na momoe ai foki ia Iakopo ma Lahela, ma nae hili atu tona alofa kia Lahela i lo kia Leaha. Ma na toe galue ai mo Lapana mo hētahi fitu tauhaga.
Nā Fānau a Iakopo
31I te kiteaga e te Aliki ko Iakopo e hē alofa kia Leaha, oi na fakamanavaola ai e ia ia Leaha, kae kua nofo vē lava ia Lahela e hēai hana fānau. 32Ma na faitama ia Leaha oi fānau ai tona ataliki. Oi na lea ai vēia, “Kua kitea mai e te Aliki toku puapuagā, ma e moni lava ko taku āvaga ka alofa mai kia te au”; oi na fakaigoa ai e ia tona ataliki kia Leupena.#29.32 Leupena Ko te igoa tēnei e tāli tutuha ma te fakaleoga o te kupu Epelu mo te kikila, he ataliki ma kua kitea toku puapuagā 33Na toe faitama ia Leaha, ma na fānau ai e ia hētahi ataliki, ma na lea vē ai, “Kua toe fōki mai e te Aliki te ataliki tēnei, auā kua ia lagona ko au e itagia”, oi na fakaigoa ai e ia kia Himeona.#29.33 Himeona Ko te igoa tēnei e tāli tutuha ma te fakaleoga o te kupu Epelu mo te lagona 34Na toe faitama foki ia Leaha ma fānau ai e ia hētahi ataliki, ma kua lea vē, “Ko te taimi nei ko taku āvaga ka pipiki mau mai kia te au, auā kua kō fānau maia ni ataliki e toka tolu mo ia”; oi na fakaigoa ai e ia kia Levi.#29.34 Levi Ko te igoa tēnei e tāli tutuha ma te fakaleoga o te kupu Epelu mo te pipiki 35Ma na toe faitama foki ia Leaha ma fānau ai e ia hētahi foki ataliki, ma kua lea vē, “Ko te taimi nei ko au ka viviki ki te Aliki”; oi na fakaigoa ai e ia kia Iuta.#29.35 Iuta Ko te igoa tēnei e tāli tutuha ma te fakaleoga o te kupu Epelu mo te viviki Ma na hēki toe faitama lele ai.
Currently Selected:
Kenehe 29: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
