Kenehe 15

Ko te Feagaiga a te Atua ma Apelamo

1Kua uma atu te mea tēnei, oi na fakakitea ai te Aliki kia Apelamo i he miti, e vāgana ve ake kia te ia, “Apelamo, ia koe nahe mataku. Ko koe ka puipui e au ma ka kō fōkiatua he taui lahi mo koe.”

2Ka kua tali atu ia Apelamo, “Te Aliki te Atua, heā nei te aogā o te taui ka kē fōki maia kia te au, ka ko au e hēai haku fānau? Oioti lava toku huli ko Eliehe o Tamaheko.#15.2 Oioti… Tamaheko E hē manino te uiga i te tuhituhiga Epelu 3Kikila, e hēai haku fānau kua fōki mai e koe, ma ka fai nei ma tofi o hētahi o aku pologa, nā meatōtino uma a aku?”

4Oi na toe lagona ai e ia te Aliki kua vāgana mai vē kia te ia, “Ko te pologa a koe ia Eliehe, e hē faia ma ona tofi nā meatōtino a koe; he ataliki lava o koe te ka kavea ma huli o koe.” 5Oi na kave ai e te Aliki ia Apelamo ki fafo o te falekie ma vāgana vē atu ki ei, “Kikila ki te vānimonimo ma nā fetū e iei pe kē mafaia oi faitau; ka vēnā foki lava te tokalahi o nā lāpuna o koe.”#Lom 4.18; Epe 11.12

6Ko Apelamo nae talitonu ki te Aliki, ma e ona ko te mea tēnei na fiafia ai te Aliki ma na ia talia ai ia, ko he tino āmiotonu.#Lom 4.3; Kal 3.6; Iak 2.23

7Ma na toe vāgana te Aliki kia Apelamo, “Ko au ko te Aliki, tē na takitaki kehea koe mai Uli te fenua o nā tino Kaletaia, ke fōki atu te fenua tēnei ke fai mo koe.”

8Kae na fehili atu ia Apelamo, “Te Aliki te Atua, e iloa vēhea e au ko te fenua ka kavea mo ōku?”

9Na tali mai te Aliki, “Kaumai kia te au he pōvi fafine, he oti fafine ma he māmoe poa e takitolu tauhaga te mātutua, he lupe vao, ma he tamā lupe.” 10Oi na kaumai ai e Apelamo nā manuvaefa ki te Atua, kua taki ihilua ma tuku takitahi ki nā itū i ni laina e lua e fakafehāgai; kae e hēki taki ihilua e ia nā manulele. 11Na ōifo nā manulele kai kanofi ki nā tino o nā manuvaefa, kae na tuli kehe kilātou e Apelamo.

12Kua fanaifo te lā ka goto, ka ko Apelamo kua moe mate; ma na hikomia ai ia i te pōuli, ma na mataku lahi lele ai.#Iop 4.13, 14 13Oi na vāgana ai te Aliki kia Apelamo, “Ke iloa lelei e koe, ko nā lāpuna o koe ka kavea ma tagata kehe i he fenua kehe; ka fai ma pologa i kinā, ma fai kino ki ei ia tagata mo ni tauhaga e fa helau.#Eho 1.1-14; Gāl 7.6 14Kae ka fakahala e au te mālō e fakapologa e ia kilātou, ma kāfai ka olokehe kilātou mai te fenua tēnā, ka olo ma kave te lahi o a lātou koloa.#Eho 12.40-41; Gāl 7.7 15Kae ko koe ka ola fiafia, ke pa ki te taimi e fano ai koe ki nā tupuna o koe i te fīlēmū, ma ka tanu ai koe ko he tagata kua matua lele. 16E fa ia augā tupulaga oi fātoā toe foki mai ai nā lāpuna o koe ki kinei, auā ka hē kō tuli keheagia nā tino ha-Amolī ke pa ki te taimi kua matuā kino ai a lātou āmio, ma kua tatau ai ke fakahalagia kilātou.”

17I te gotoga o te lā ma kua pōuli, kae teki lava kua kitea atu he ogāumu kua fakamumū i loto he afi ma he lama e mumū, e olo i te vā o nā itū manuvaefa. 18Oi ko kinā na fai ai te feagaiga a te Aliki ma Apelamo. Na vāgana vē te Aliki kia Apelamo, “Mo nā lāpuna o koe, e tuku atu e au ki ei te fenua tēnei mai te tuākoi o Aikupito ke pa ki te Vaitafe ko te Eufilate,#Gāl 7.5 19e i loto ai nā fenua o nā tino ha-Kenī, o ha-Kenihī, ma o ha-Katamonī, 20o ha-Hitē, o ha-Pelehī, o ha-Lepaimā, 21o ha-Amolī, o ha-Kananā, o ha-Kikahī ma ha-Iepuhī.”

Currently Selected:

Kenehe 15: TOKU

Highlight

Copy