Kalatia 6
6
Ke Fehoahoani Tētahi ki Tētahi
1Te kau uho, kāfai he tino e ia faia ho he itūkāiga āmio kino, e tatau koutou iēnā kua takitakia e te Agaga, ke fakatonu kia te ia i te agaga maualalo. Ma ko koutou foki ke mataala, nā meakē ka fakaohōhogia ai foki ma koutou. 2Fakatau fehoahoani tētahi ki tētahi i nā mea e fītatā ai koutou, ma e kitea i te faiga tēnei ko koutou ka uhitaki#6.2 ka uhitaki ko iētahi fakamaumauga e leamai kua uhitaki ki te tūlāfono a Keliho. 3Kāfai he tino e manatu e tāua atu ia i lo hētahi tino, kae ko te meamoni e hē ko he tino e tāua, ko tona uiga kua fakahehē lava ia e ia. 4E tatau ke kikila totoka ifo lava te tino ki ana lava gāluega kua fai. Kāfai e lelei ana gāluega, oi e tatau ai lava la ke ia lagona te fāfia i tona loto. Kae nahe ia fakatuhatuhagia ki ni mea a hētahi tino kua fai. 5Auā ko kitātou, e amo lava te kavega a te tino.
6Ko te tino kua uma te akoakogia i te fekau faka-Kelihiano, e tatau ke fakaaogā fakatahi e ia nā mea lelei a ia kua maua, ma tona faiākoga.
7Ia koutou i nā fakahehēa; e hēai he tino e ia fakavaleagia te Atua, ma e helehele lava e te tino te mea na ia totōa. 8Kāfai e totō e koe i te kelekele o te nātula faka-te-tagata, mai i kinā, ka fakaputu mai e koe te helehelega, ko te oti; kāfai e totō e koe i te kelekele o te Agaga, mai te Agaga ka fakaputu mai e koe te helehelega, ko te ola e fakavavau. 9Ki tātou la nahe fakavāivai oi fai nā mea e lelei; auā kāfai kitātou e hē fakavāivai, e hau te taimi ka maua ai e kitātou te helehelega. 10Ko te mea ia, i taimi uma e maua ai e kitātou he avanoa, e tatau ke fai e kitātou nā mea lelei ki ho he tino, kae maihe lava kilātou i loto o te tātou kāiga Kelihiano.
Ko te toe Lapatakiga
11E koutou kitea te matamata lalahi o nā mataituhi kua tuhi ai taku tuhi mo koutou i toku lava lima! 12Ko nā tino e taumafai ke fakamālohia koutou ke pelitome, ko kilātou lava iēnā te fia iloa ma fāfifia i nā mea i te kikila atu i fafo. Kae oioti lava te mea e fai ai e kilātou te mea tēnei, ona e mātataku nā kilātou e kupugia kāfai e tālaki e kilātou e uiga ki te hātaulo o Keliho. 13Ke pa foki lava ki nā tino kua uma te pelitome, e hē mulimuli ki te Tūlāfono; e fofou ko koutou ke pelitome kae ke fai ai o lātou fāfifia, ko koutou na pelitome ona ko kilātou. 14Kae e vē la kia te au, ko au e fāfia oioti lava ona ko te hātaulo o to tātou Aliki ko Iehu Keliho. Auā ia te au, ko te lalolagi kua mate e tuha ai ma te hātaulo, ma ko au kua mate e tuha ai ma nā mea iēnei o te lalolagi. 15E hē tāua pe pelitome he tino pe hēai; oioti lava te mea e tāua, ko te toe kavea o koe ko he tino fōu. 16Kae vē la kia te kilātou uma e mulimuli ki te tūlāfono tēnei, ke ia te kilātou te fīlēmū ma te alofa tūnoa, ma ke vēnā foki ona iei i tagata uma o te Atua.
17E i toku tino nā māila e fai ma fakamāoniga ko au ko he pologa e a Iehu. Nahe iei la he tino e toe fakatāutala mai kia te au.
18Te kau uho, ke ia te koutou uma te alofa tūnoa o to tātou Aliki ko Iehu Keliho! Amene.
Currently Selected:
Kalatia 6: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
