Kalatia 5
5
Ko te Haolotoga mai ia Keliho
1Kua ia te kitātou te haolotoga—ko kitātou kua fakahaoloto e Keliho! Fakamākekeke la ma tūmau i te haolotoga, ma ke nahe toe kavea lele koutou ma pologa.
2Fakalogo lelei mai! Ko au ko Paulo, ma e lea atu au kia te koutou, kāfai e talia e koutou ko koutou ke pelitome, ko tona uiga e hēai lele la he aogā o Keliho kia te koutou. 3E toe lapataki atu au ki ho he tamāloa e ia talia ko ia ke pelitome; kāfai e kē faia te mea tēnei, ko koe la e tatau ke uhitaki ki te Tūlāfono kātoa. 4Ko koutou iēnā kua taumafai ke fakalelei te koutou vā ma te Atua e ala i te uhitaki ki te Tūlāfono, kua koutou momotu kehea lava koutou ma Keliho. Kua hē koutou maua te alofa tūnoa o te Atua. 5Kae e vē la kia te kimātou, ko to mātou fakamoemoe ke fakalelei e te Atua to mātou vā ma ia; ma ko te mea tēnei e hākilikili kimātou ki ei ona ko te mana o te Agaga o te Atua, e galue ia te kimātou e ala i to mātou fakatuatua. 6Auā kāfai kitātou e i te hokotaga ma Keliho Iehu, e hēai lele he mea e kehe ai, pe kua pelitome pe hēai. Oioti lava te mea e tāua ko te koutou fakatuatua e mafai ai koutou ke alolofa ki iētahi tino.
7Ko koutou nae fetutuli lelei lele! Ko ai te kua fakalavelave atu kia te koutou ma kua hē mafai ai koutou ke talitonu ki te meamoni? 8E hē ko te Atua, auā ko ia te taukalaga atu ko koutou ke ōake kia te ia. 9#1 Kol 5.6E vē oi lea mai tētahi fakakupuga, “Ko te tamākīkī mea fefete e fefete ai te paluga kātoa.” 10Kae e tūmau pea lava toku talitonu kia te koutou. Ko to tātou olaga i te hokotaga ma te Aliki, e mautinoa ai e au ka hē koutou taliagia ni manatu e kehe mai i oku manatu, ma ko ai lava e taumafai ke fakahehē kia te koutou, ka fakahalagia ia e te Atua.
11Kae e vē la kia te au, te kau uho, kāfai e tālaki pea e au ko te pelitome ko he mea e tatau ke fai, heā la te koi fakahāuā mai ai pea ia tagata kia te au? Kāfai au e lea ki nā tino ko te pelitome ko he mea e tatau ke fai, ko tona uiga ko te fekau e folafola e au e uiga ki te hātaulo, e hē tatau ke fai ma fakalavelave kia te kilātou. 12Kai au te fofou ko nā tino e fakahehēa koutou, ke hē gata e pelitome, kae ke tatipi ai foki ma ni iētahi mea!
13Kae e vē la kia te koutou, te kau uho, ko koutou na kalaga atu ki ei te Atua kae ke maua ai e koutou te haolotoga. Kae nahe kaveagia te haolotoga tēnei ma mea ka pūlea ai koutou e tuinanauga o te tino. Kae ke kavea te alofa ke mafai ai oi tautua tētahi ki tētahi. 14Auā ko te Tūlāfono kātoa e aofia i loto o te fakatonuga e fokotahi: “Alofa ki tō tuākoi e vē oi alofa koe kia te koe lava.” #Lev 19.18 15Kae kāfai koutou e tūmau pea te takati ma te fakaogohia o tētahi e tētahi e vē ko uiga o nā manu fekai, koutou la ke mataala auā e i na ka fakaumatia kātoa tētahi e tētahi.
Ko te Agaga o te Atua ma te Nātula Faka-te-Tagata
16Ko te mea e lea atu ai au ko tēnei: tuku ki te Agaga ke ia takitakia outou olaga, oi ka hē fakamaliea ai e koutou ia manakoga o te nātula faka-te-tagata. 17Auā ko to tātou nātula faka-te-tagata e teteke ki te mea e fofou ki ei te Agaga, ma ko nā mea e fofou ki ei te Agaga, e teteke ki ei to tātou nātula faka-te-tagata. Ko nā mea iēnei e lua e fetekenaki lava tētahi ki tētahi, ma ko tona uiga e hē koutou mafaia oi fai he mea e fofou koutou ki ei.#Lom 7.15-23 18Kāfai koutou e takitaki e te Agaga, ko koutou la e hē āfāina i te Tūlāfono.
19Ko te mea e fai e te nātula faka-te-tagata e manino lele. Ko te hahau ki te tino, ko te āmiokino, ma te fai āmio mātagā; 20ko te ifo ki tupua ma te fai mea fakataulāitu. Ko te fevaevaeaki ma tauaimiha; ko te loto kino, ko te ita ma te manatu fakapito. Ko te fetekeaki ma te fakaitū kau; 21ko te mata pipiko, ko te konā ma te fai pātī ma iētahi mea vēnei. Ko au e lapataki atu i te taimi nei, e vē foki lava ona lapataki atu au muamua: ko nā tino e fai e kilātou nā mea iēnei, ka hēai ho kilātou tofi i te Mālō o te Atua.
22Kae ko te Agaga e fua mai ai te alofa, te fiafia, te fīlēmū, te onohai, te agalelei, nā uiga lelei, te fakamāoni, 23te loto maulalo, ma te loto pūlea. E hēai he tūlāfono e teteke ki nā mea iēnei. 24Ma ko nā tino e ia Keliho Iehu, kua tāmate e kilātou o lātou nātula faka-te-tagata, fakatahi ai ma te nauloto ma nā tuinanauga ki te tino. 25Kāfai kua fōki mai e te Agaga te ola kia te kitātou; e tatau foki la ke takitaki kitātou e te Agaga. 26Kae nahe kitātou fia hihili, pe fakatīgā loto tētahi ki tētahi, pe mata pipiko tētahi ki tētahi.
Currently Selected:
Kalatia 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
