Kalatia 4
4
1Ko te uiga o te mea e lea atu ai au—ko te tamaiti e tuku e maua e ia nā meatōtino a tona tamana, e hē kehe lele ia ma he pologa ka koi tamaiti ai, e ui lava ko nā mea uma lele e a ia. 2Ka koi tamaiti ai, e iei nā tino e kilātou tauhiagia ia ma kikilāgia ana meatōtino, ke pa ki te taimi kua uma te fuafua e tona tamana. 3Nae vēnā foki lava kitātou i nā aho nae tamaiti ai kitātou. Ko kitātou nae fai ma pologa a nā agaga e pule i te lalolagi ma te vāteatea kātoa, 4Kae i te pa maiga o te taimi tonu na fuafuagia, oi na uga mai ai e te Atua tona lava Ataliki. Na fānau mai i he fafine, ma na ola ake i lalo o nā Tūlāfono Iutaia, 5kae ke togiola ai nā tino nae mulimuli ki te Tūlāfono, ma kavea ai kitātou ma fānau a te Atua. #Lom 8.15-17
6Ona ko koutou ni fānau e a te Atua, na ia uga maia ai te Agaga o tona Ataliki ki o tātou loto, te Agaga tēia e kalaga vē, “Te Tamana, toku Tamana!” 7Ko te mea ia, ko koutou kua hē toe ni pologa kae ni fānau e a te Atua, ma ka fōki atu e ia kia te koutou ana mea uma, mo tana fānau.
Ko Popōlega o Paulo ki tagata o Kalatia
8I nā aho kua teka, nae hē koutou iloa te Atua, ma nae fai koutou ma pologa a ni atua e hē ni atua moni. 9Kae nei la kua koutou iloa te Atua—pe i hētahi fakakupuga, kua iloa e te Atua koutou—e vēhea ona toe fia liliu koutou ki nā agaga vāivai ma hēai he aogā e pūleagia te lalolagi ma te vāteatea? Heā te toe fia kavea ai koutou ma a lātou pologa? 10E iei nā aho, nā māhina, nā vāitaimi o te tauhaga ma nā tauhaga, e fakamanatu e koutou. 11Ko au te popole na meakē ko aku gāluega uma e fai mo koutou, e fakahēaogāgia?
12Te kau uho, ko au e aioi atu kia te koutou, ko koutou ke vē ko au, auā ko au foki kua kavea e vē lava ko koutou. E hēai he koutou hehē kia te au. 13E manatua e koutou pe aiheā na kō tālakia atu ai te Tala Lelei i te taimi muamua; ona ko au nae tauale. 14E ui lava nae lahi nā fakafītāuli na feagai ma koutou ona ko toku faitauale, kae e hēki kavea tēnā ma mea ke inoino mai ai koutou kia te au, pe teteke mai ai foki. Kae na koutou talia au e vē oi talia e koutou he āgelu mai te lagi; na koutou talia au e vē oi talia e koutou ia Keliho Iehu. 15Ko koutou nae fiafia lele. Heā te kua tupu ki te koutou fiafia nae iei? E talitonu au kana he mea e koutou mafaia, na hali kehe e koutou outou mata ma fōki mai kia te au. 16Ko au nei la kua fai ma outou fili auā ko au e tautala atu kia te koutou i te meamoni?
17Ko iētahi tino iēnā e tuahā atu kia te koutou, kae e hē ni manatu lelei to kilātou. Oioti lava te mea e fofou kilātou ki ei, ke vavae kehe koutou ma au, kae ke tuahā ake ai koutou kia te kilātou e vē oi tuahā kilātou kia te koutou. 18Ko he mea e lelei te tuahā ki he mea, pe kāfai ko te māfuaga e lelei—ko te mea tēnei e hako i taimi uma, kae e hē vē e hako oioti i nā taimi e i kinā ai au. 19Taku fānau pele! E vē oi lagona nā tīgā e he mātua kāfai ka fānau, e vēnā foki oi lagona e au nā tīgā, ke pa lava ki te taimi e kavea ai koutou e vē ko Keliho. 20Kai au te fia i kinā ma koutou i te taimi nei, kae ke mafai ai ke hui te fakakupu atuga o aku kupu kia te koutou. Ko au te popole kia te koutou!
Akoakoga mai te Tala o Hākā ma Hala
21Ke fehili atu au ki nā tino o koutou e fofou ko kilātou ke i lalo o te pule a te Tūlāfono; e hē koutou lagona nei te mea e lea mai ai te Tūlāfono? 22E lea mai ko Apelaamo e toka lua ona ataliki, ko tētahi i he fafine pologa, ma tētahi i he fafine haoloto. #Ken 16.15; 21.2 23Ko tona ataliki i te fafine pologa, na fānau mai lava i te auala māhani, kae ko tona ataliki i te fafine haoloto, na fānau mai e ala i he folafolaga na fai e te Atua. 24Ko nā mea iēnei e iei tētahi ona fakauigaga. Ko nā fafine e toka lua e fakatuhagia ki nā feagaiga e lua na fai e te Atua ma ona tagata. Ko Hākā, te fafine pologa, e fakatuhagia ia ki te feagaiga na faia i luga o te Mauga ko Hinai. Ho he tino e fānau mai ai, e kavea ma pologa. 25Ko te igoa Hākā, e fakatatau ki te Mauga ko Hinai i Alapi,#4.25 Hākā… Alapi ko iētahi tuhituhiga e leamai Ko Hinai ko he mauga i Alapi ma e ma e fakatuha i nā aho nei, ki te kakai ko Ieluhalema e nofo pologa fakatahi ma ona tagata uma. 26Kae ko te Ieluhalema i te lagi, e haoloto, ma ko te mātua ia o kitātou. 27Auā kua tūhia i te tuhituhiga paia,#Iha 54.1
“Koe ke fiafia, te fafine hē manava ola,
ma ko hēki fānaua lele he tamaiti!
Pehe ma tau kekē fiafia koe te fafine
ko hēki lagona ia tīgā o he fafine e fānau!
Auā ko te fafine na tīaki, ka tokalahi atu tana fānau;
i lo te fānau a te fafine e hēki tīakia e tana āvaga.”
28Ko te mea ia te kau uho, ko koutou ni fānau e a te Atua e ala i tana folafolaga, e vē foki lava ko Ihaako. 29I te taimi tēnā, ko te ataliki na fānau mai i te auala māhani, kua fakahāuā ki te ataliki na fānau mai ona ko te Agaga o te Atua; ma kua vēnā foki lava i te taimi nei. #Ken 21.9 30Kae e vēhea mai te tuhituhiga paia? E leamai, “Tuli kehe te fafine pologa ma tona ataliki; auā ko te ataliki o te fafine pologa, e hē maua hona tofi fakatahi ma te ataliki o te fafine haoloto, i nā mea a tona tamana.” #Ken 21.10 31Ko te mea ia te kau uho, ko kitātou e hē ni fānau a he fafine pologa, kae e a he fafine haoloto.
Currently Selected:
Kalatia 4: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
