Ehoto 13
13
Kua Fakatonu e te Aliki ke Ofo atu nā Ulumatua mo Ia
1Kua vāgana te Aliki kia Mohe, 2#Nūm 3.13; Luk 2.23“Ofo mai mo oku nā ulumatua tama uma o Ihalaelu, vēnā ma nā ulumatua poa a nā manu a koutou. Ko nā mea uma iēnā e a aku.”
Kaiga Fakamanatu o te Falaoa hē Fakafefetea
3Kua lea atu ia Mohe ki nā tino, “Ke manatua e koutou te aho tēnei—te aho na olo kehe ai koutou mai Aikupito, te fenua nae nofo pologa ai koutou. Ko te aho na kave kehe ai koutou e te Aliki i tona lima mālohi. E hēai he falaoa fakafefete e kai ai. 4I te aho tēnei, i te māhina muamua, te māhina o Apipa, e olokehe ai koutou mai Aikupito. 5Na fai te folafolaga a te Aliki ki nā tupuna o koutou, e ia kavatua mo koutou nā fenua o nā tino ha-Kananā, ha-Hitē, ha-Amolī, ha-Hivī ma ha-Iepuhī. Kāfai e takitaki koutou e ia ki te fenua tēnā e tafe ai te huhu ma te meli, e tatau ke fakatino e koutou te kaiga fakamanatu tēnei i te māhina muamua o tauhaga takitahi. 6E fitu ia aho e kakai ai koutou ki nā falaoa hē fakafefetea, ma i tona fitu o aho e fai ai e koutou he kaiga fakamanatu ke vīkia ai te Aliki. 7E fitu ia aho ko koutou e hē kakai ki he falaoa e fai ki ei te fefete; e hē tatau lele ke iei ni fefete pe ni falaoa fakafefete i ho he mea i te koutou fenua kātoa. 8Ma i te aho tēnā, e tatau ke lea vē te tino ki tana fānau, ‘E fakamanatu ai te mea na fai e te Aliki kia te au i toku fano kehega mai Aikupito.’ 9Ko te aho fakamanatu tēnei ka vē he fakailoga ke nonoa ki outou lima, pe ki outou muāulu: ka manatua ai pea e koe ke tauloto ma hukehuke ki te Tūlāfono a te Aliki, auā ko te Aliki te na ia kaumaia koutou mai Aikupito i tona lima mālohi. 10Ko te mea la ia, fakatino te kaiga fakamanatu tēnei i te taimi kua fakatonu atu ke fai ai, i tauhaga takitahi.
Ko nā Ulumatua
11“Ka kaumai koutou e te Aliki ki te fenua o nā tino ha-Kananā, tēia na folafola e ia kia te koutou ma nā tupuna o koutou. Kāfai e fōki atu e te Aliki te fenua, 12#Eho 34.19-20; Luk 2.23e tatau ke ofo atu e koutou mo te Aliki nā ulumatua tama uma a koutou. Ko nā ulumatua poa uma foki a nā manu a koutou e a te Aliki, 13kae e tatau ke toe totogi e koe i he punuāmāmoe mo te ola o au āhini ulumatua poa takitahi uma. Kāfai e hē kē faia te mea tēnei, oi e tatau ke gagau e koe tona ua. Ko nā ulumatua tama uma a tau fānau, e tatau ke toe totogi e koe mo nā ola o kilātou. 14I nā tauhaga e hau, kāfai e fehili atu tau fānau pe heā te fai ai e koe te mea tēnei, ka tali vē atu koe ki ei, ‘Ko te mālohi o te lima o te Aliki na mafai ai ke kaumai kimātou mai Aikupito, te fenua nae nofo pologa ai kimātou. 15Ko te makaka o te loto o te tupu o Aikupito na hē ia talia ai ke tuku kimātou ke olokehe, oi na tāmate ai e te Aliki nā ulumatua tama uma lele i luga o Aikupito, nā ulumatua tama a tagata ma vēnā a nā manu a kilātou. Ko te mea ia e ofo atu ai e kitātou nā ulumatua poa uma lele a nā manu, ma tāulaga ki te Aliki, kae ke toe totogi ai mo te haolotoga o a tātou ulumatua uma. 16Ka kavea tēnā e vē he fakailoga e nonoa ki o tātou lima pe ki o tātou muāulu, ke fakamanatu mai ai kia te kitātou, ko kitātou na kaumai e te Aliki mai Aikupito i te mālohi o tona lima.’ ”
Kua Malaga ia Tagata Ihalaelu mai Hukota ki Etama
17I te tuku atuga o tagata Ihalaelu e te tupu o Aikupito ke olo, e hēki takitakia kilātou e te Atua i te auala e kui atu i te matāfaga ki Filihitia, e ui lava ko te auala ia e hili te pukupuku. Na vē ake te manatu o te Atua, “Kāfai ka ohofaki kilātou e o lātou fili, e ono toe hui o lātou māfaufau ma toe liliu ki Aikupito.” 18Kae kua takitaki e te Atua ia tagata Ihalaelu fakatāmilo i loto o te toafa āgai ki te Tai Kukula.#13.18 Epelu Tai o te Mutiavai E fakaaga (1) ki ni vaitūloto ma ni taihala, pe ni kelekele e toka ai te vai i te vā o te pito lele ki luga o te Faga o Hueha ma te Tai Metitelani, te kogāfenua e talitonu na tutupu ai nā mea e tākua i te Ehoto 13, ma e fakaaogā foki ke manino ai te (2) Faga o Hueha, ma (3) te Faga o Akapa Ma i te ō ifoga o kilātou mai Aikupito, na tāpena kilātou mo he taua. 19#Ken 50.25; Ioh 24.32Ma na kave e Mohe te tino o Iohefa, auā na fakatautō e Iohefa nā tino Ihalaelu ke kilātou faia te mea tēnei. Na lea vē ia Iohefa, “Kāfai koutou e lāveaki e te Atua, olo ma kave e koutou oku pogāivi mai te fenua tēnei.”
20Oi na olokehe ai nā tino Ihalaelu mai Hukota ma na fakatū ai te lātou api i Etama, e tuākoi ki te toafa. 21I nā ao, ko te Aliki nae muamua ia te kilātou i loto o he poutū ao ke taki ai to lātou auala, kae i nā pō, nae muamua ia te kilātou i loto o he poutū afi, ke mālama ai mo kilātou, kae ke fakaauau ai ta lātou malaga i te ao ma te pō. 22Ko te poutū ao nae i mua pea lava o kilātou i te ao, ma te poutū afi i te pō.
Currently Selected:
Ehoto 13: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
