Ehoto 12
12
Ko te Pāheka
1 #
Lev 23.5; Nūm 9.1-5; 28.16; Teu 16.1-2 Kua vāgana atu te Aliki kia Mohe ma Alona i Aikupito, 2“Ko te māhina tēnei ka kavea ko te māhina muamua o te tauhaga mo koutou. 3Fakailoa ki tagata uma o Ihalaelu nā fakatonuga iēnei: I te hefulu o aho o te māhina tēnei, ka filifili ai e tāulelea tau toka tahi, he punuāmāmoe pe he punuāoti mo nā tino o tona kaukāiga. 4Kāfai tona kaukāiga e tokaitīti ātili ke kilātou kaia he manu kātoa, e mafai ke kakai ai tona kaukāiga fakatahi ma he kāiga e tuākoi ki ei, fuafua lava ki te tokalahi o nā tino ma te lahi e mafai ke kai e te tino e fokotahi. 5E pule lava koutou pe he māmoe pe he oti, kae e tatau ko he poa kua fokotahi te tauhaga, ma hēai he māila i tona tino. 6Ka kikila lelei ma tauhi e te kāiga te manu kua kilātou filifilia, ma i te afiafipō#12.6 afiafipō Te taimi mai te goto o te lā ki te taimi kua pōuli lele ai o te aho hefulu fa o te māhina, ka tāmate ai e te fakapotopotoga uma o tagata Ihalaelu nā manu. 7Oi kave ai e kilātou he vāega o te toto ma vali ai nā pou o nā faitotoka ma nā ulu faitotoka, i nā fale ka kai ai e kilātou nā manu. 8I te pō tēnā, ko nā kanofi o nā manu e tao, oi kai fakatahi ai ma te falaoa hē fakafefetea ma ni laulākau mamala fakamanogi meakai. 9Nahe otā he vāega pe haka, kae e tao kātoa fakatahi ma te ulu, nā vae, vēnā ma nā tōtōga. 10E hē fakatotoea lele he mea ki te tāeao; kāfai e iei he mea e totoe, e tatau ke huhunu. 11E vēnei kāfai koutou ka kakai: Fai outou kofu malaga#12.11 Epelu Fai outou fuhipaku ma outou hēvae, ma tāofi outou tokotoko i outou lima, oi kakai fakatāvavevave ai. Ko tēnā te Kaiga o te Pāheka a te Aliki.”
12“I te pō tēnā, ka kui ai au i loto o Aikupito ma tāmate nā ulumatua tama uma lele i te fenua, e hē gata i tagata kae e vēnā foki ma nā manu; ma ki luga o atua uma o Aikupito, ka fakatino ki ei taku fakamahinoga. Ko au ko te Aliki. 13Ko te toto i nā pou faitotoka ka kavea ma fakailoga e iloa ai nā fale e nonofo ai koutou. Kāfai e kitea e au te toto, oi pahi ake ai au i luga o koutou, ma ka hē āfāina koutou kāfai e pakū taku fakahalaga ki luga o Aikupito. 14#Eho 23.15; 34.18; Lev 23.6-8; Nūm 28.17-25; Teu 16.3-8Ko te aho tēnei e tatau ke fakamanatu pea e koutou e vē he aho fakamanatu tau tāpuakiga, ke manatua ai pea te mea a aku, te Aliki kua fai. Ke fakamanatu pea lava e koutou ke pa ki te hēgata.”
Te Kaiga Fakamanatu o te Falaoa hē Fakafefetea
15Kua vāgana te Aliki, “E fitu ia aho e hē kakai ai koutou ki ho he falaoa na fai ki ei he fefete—kakai oioti ki nā falaoa hē fakafefetea. I te aho muamua e tatau ke kave kehe e koutou nā mea fakafefete falaoa uma lele i loto o nā fale o koutou, auā kāfai he tino e kai ki he falaoa fakafefete i loto o nā aho iēnei e fitu, ka hē toe takua ia ko hētahi o oku tagata. 16I te aho muamua ma te fitu o aho, ko koutou e māopōpo mo autou tāpuakiga. E hēai ni gāluega e fai i nā aho iēnā, kae e fakataga ke tunu ni autou meakai. 17Tauhi ki te kaiga fakamanatu tēnei auā ko te aho ia na kō kaumaia ai koutou fai puikāiga, mai Aikupito. E fakamanatu pea lava e koutou ke pa ki te hēgata. 18Mai te afiafipō o te hefulu fa o aho o te māhina muamua, ke pa ki te afiafipō o te lua hefulu tahi o aho, ko koutou ka hē kakai lele ki ho he falaoa na fai ki ei he fefete. 19I nā aho e fitu iēnei, nahe iei lele ni mea fakafefete falaoa e maua i loto o nā fale o koutou, auā kāfai he tino e kai ki he falaoa kua fakafefete, ka vavae kehe ia mai te fakapotopotoga a tagata Ihalaelu, e tuha lava pe ko ia he tino kehe, pe ko he tagatā nuku lava o Ihalaelu. 20Ko koutou e hē kakai lele ki he mea e fai i te fefete. I nā fale uma lele o koutou, kakai oioti lava ki nā falaoa hē fakafefetea.”
Te Pāheka Muamua
21Oi na fakamāopōpo ai e Mohe nā takitaki uma o Ihalaelu, ma lea vē atu kia te kilātou, “Koutou uma tau toka tahi, olo oi filifili he punuāmāmoe pe he punuāoti ma tāmate, kae ke mafai ai ke fakamanatu e nā kāiga o koutou te Pāheka. 22Kave he lālā ihopo oi lolō ki te pēhini e i loto ai te toto o te manu, ma vali i te toto nā pou faitotoka ma nā ulu faitotoka o nā fale o koutou. E hēai lele he tino o koutou e fano kehe ma tona fale ke pa ki te tāeao. 23#Epe 11.28Kāfai te Aliki e kui i loto o Aikupito ke tāmate ia tagata Aikupito, ka ia kitea te toto i nā ulu faitotoka ma nā pou faitotoka ma ka hē ia tukua ai te Āgelu o te Oti ke ulu atu ki nā fale o koutou ke tāmate koutou. 24Ko koutou ma autou fānau e tatau ke tauhi pea lava ki te poloakiga tēnei ke pa ki te hēgata. 25Kāfai e taunuku koutou ki te fenua kua uma te folafola e te Aliki e ia fōki atua kia te koutou, e tatau koutou ma autou fānau ke tauhi ki te poloakiga ma fakaauau pea te hāuniga tēnei. 26Kae kāfai autou fānau e lea atu kia te koutou, ‘Heā te uiga o te hāuniga tēnei?’ 27ka tali vē atu koutou ki ei, ‘Ko te tāulaga tēnei o te Pāheka mo te Aliki, auā na pahi ake te Aliki i luga o nā fale o tagata Ihalaelu i Aikupito. Na tāmate e ia nā tino Aikupito kae fakahao kitātou.’ ”
Na pūnonou ifo loa ki lalo te fakapotopotoga o Ihalaelu ma tāpuaki ki te Aliki. 28Oi na olo ai kilātou ma fakatino nā mea na poloaki ai te Aliki kia Mohe ma Alona ke fai.
Kua Feoti nā Ulumatua a Aikupito
29 #
Eho 4.22-31
I te tūlua o te pō na tāmate ai e te Aliki nā ulumatua tama uma a Aikupito, e kāmata mai i te ataliki o te tupu, tēia ka huia tona tamana i te nofoāliki, ke pa ki te ataliki ulumatua a te pagotā i te potu i lalo o te kelekele. Ko nā ulumatua uma foki a nā manu na tāmate. 30Na ala ki luga te tupu ko Falao i te pō tēnā, vēnā ma ana kaukauna ma nā tino Aikupito uma. Ma na lagona te tagiauē i loto o Aikupito kātoa, auā e hēai he fale e hē i loto ai he ataliki kua oti. 31I te pō lava tēnā na fekau ai e te tupu ia Mohe ma Alona ma na lea vē atu ai kia te kilāua, “Olo kehe loa ma toku fenua, koutou ma tagata Ihalaelu uma; olo oi tāpuaki ki te Aliki e vē ona fakatagi mai ai koutou. 32Kave autou lafumāmoe, lafuoti, ma nā lafupōvi ma olo loa e vē oi leamai ai koutou. Tatalo foki kō la mo he fakamanuiaga mo oku.”
33Na fakatātopetope e nā tino Aikupito ia tagata Ihalaelu ke olo kehe vave loa mai to lātou fenua; kua lea vē atu kilātou, “Ko kimātou e feoti uma lele kāfai koutou e hē olokehe.” 34Oi na utu tūtumu ai e nā tino Ihalaelu a lātou apa tao falaoa i nā paluga hē fakafefetea, ma āfīfī i nā kie ma amo i o lātou takuau. 35#Eho 3.21-22Na fai foki e kilātou e vē ko te mea na lea ai ia Mohe ke kilātou faia, ma na kaitagōgō ki nā tino Aikupito mo o lātou tēuga e fai i te aulo ma te hiliva, ma o lātou kofu. 36Ma na fakatupu e te Aliki te loto fakaaloalo o nā tino Aikupito ki tagata Ihalaelu, ma na fōki ai e kilātou ho he mea na gogō ake ai ia tagata Ihalaelu. I te faiga tēnei, na olo kehe ai ia tagata Ihalaelu ma kave e kilātou te tamaokāiga o tagata Aikupito.
Kua Olokehe nā Tino Ihalaelu mai Aikupito
37Na kāmata loa te malaga a tagata Ihalaelu, kua hāvavali atu mai Lamehe ki Hukota. Pe tuha ma te ono helau afe ia tāulelea, kae e hē faitaua ai ia fafine ma tamaiti. 38E tokalahi lele foki nā tino kehe na olo ma kilātou, ma kave ai ma te lahi o nā lafumāmoe, lafuoti, ma nā lafupōvi. 39I te mālōlōga muamua a kilātou, na tunu ai e kilātou nā falaoa hē fakafefetea mai nā paluga na kilātou kaumaia mai Aikupito. E hēki palua ki nā falaoa iēnei ni fefete ona ko tagata na tuli kehe fakavave mai Aikupito, ma na hēki lava ai he taimi ke tapena lelei ai a lātou meakai, pe ke fai ai ni a lātou palugā falaoa fakafefete.
40 #
Ken 15.13; Kal 3.17 E fa helau tolu hefulu ia tauhaga na nonofo ai ia tagata Ihalaelu i Aikupito. 41I te aho tonu lava na kātoa ai te fa helau tolu hefulu tauhaga o kilātou i Aikupito, na olokehe fai puikāiga ai ia tagata uma o te Aliki mai Aikupito. 42I te pō tēnei, nae kikila pea lava kilātou e te Aliki kae ke takitaki kehe ai kilātou e ia mai Aikupito. Oi ko te pō la tēnei e o ia, ma e tatau ke fakamanatu i tauhaga takitahi e tagata Ihalaelu, i augā tupulaga uma.
Nā Tūlāfono mo te Pāheka
43Kua vāgana te Aliki kia Mohe ma Alona, “Ko nā tūlāfono iēnei e uiga ki te Pāheka: E hēai he tino kehe e kai i te kaiga o te Pāheka, 44kae ko ho he pologa na fakatau e koe e mafai ke kai ki ei, pe kāfai e mua pelitome e koe. 45E hēai he tino kehe e hē nofo tūmau, pe he tino faigāluega totogi, e kai ki ei. 46#Nūm 9.12; Ioa 19.36Ko te kaiga kātoa e kai lava i loto o te fale na hāuni ai; e hē kavea ki fafo, ma e hē gagaua foki he pogāivi o he manu. 47E tatau ke fakatino e tagata uma o Ihalaelu te kaiga fakamanatu tēnei, 48kae e hēai he tāulelea e hēki pelitomea e kai ki ei. Kāfai he tino kehe e nofo i te mea e iei koutou e fofou ke auai ki te Pāheka ke viviki ai ki te Aliki, e tatau ke pelitome muamua e koe nā tāulelea uma o tona kaukāiga. Oi ka kavea ai ia e vē ko he tagatā nuku o Ihalaelu, ma mafai ai ke kau fakatahi ia ki te Kaiga o te Pāheka. 49Ko nā tūlāfono iēnei e tutuha lava mo tagatā nuku o Ihalaelu, ma mo nā tino kehe kua nonofo i te mea e iei koutou.” 50Na uhitaki uma lele ia tagata Ihalaelu ma na fai e kilātou nā mea uma na poloaki ai te Aliki kia Mohe ma Alona. 51Ma i te aho lava tēnā, na kave kehe ai e te Aliki ia tagata uma o Ihalaelu fai puikāiga, mai loto o Aikupito.
Currently Selected:
Ehoto 12: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
