Ehoto 14
14
Kua Aha ia Ihalaelu ki Tētahi itū o te Tai Kukula
1Kua vāgana atu te Aliki kia Mohe, 2“Lea kia Ihalaelu ke toe liliu oi fakatū te lātou api i mua o te kakai ko Pi Hahilota, i te vā o Mikitolo ma te Tai Kukula, e pili ki Paala Hēpono i tētahi itū, i tafa o te tai. 3Oi ka vēake ai te tupu ko Falao i tona māfaufau, ‘Ko nā tino Ihalaelu e hē valevale i loto o te fenua, ma haitia ki loto e te toafa.’ 4Ma ka toe fakamakaka foki e au te loto o Falao, ma ka tuliloa ai koutou e ia. Kua fuafua e au te mea tēnei kae ke kitea ai toku mamalu e ala ia Falao ma tana kautau uma. Ma ka iloa ai e tagata Aikupito, ko au ko te Aliki.” Oi na api ai nā tino Ihalaelu i kinā e vē ona fakatonu ake ai kilātou.
5I te lagonaga e Falao ko nā tino Ihalaelu kua hōhola kehe, na toe hui ai tona māfaufau vēnā ma ana kaukauna; ma na lea vē ai kilātou, “Heā kō ta kitātou kua fai? Kua fakataga e kitātou nā tino Ihalaelu nae faia a tātou gāluega, ke hōhola kehe!” 6Oi na hāuni ai e Falao tana kaliota, vēnā ma tana kautau; 7ma na kave ai e ia ana kaliota e ono helau e hili te lelei, ma iētahi kaliota uma lele i Aikupito, nae i luga ai nā tino ōfiha uma o tana kautau. 8#Gāl 13.17 Ma na fakamakaka e te Aliki te loto o Falao te tupu o Aikupito, ma na tuli tatao ai e ia ia tagata Ihalaelu, ka koi olokehe atu kilātou mai Aikupito ma te loto totoa. 9Na tuliloa atu kilātou e nā tino Aikupito i nā holofanua, nā kaliota, nā tino kave kaliota ma nā fitafita hāvavali, ma na maua atu e kilātou ki te mea na fakatū ai ta lātou api, i tafa o te Tai Kukula, e pili ki Pi Hahilota ma Paala Hēpono.
10I te kitea maiga e nā tino Ihalaelu ko Falao ma tana kautau kua āgai atu ki te mea nae iei ai kilātou, oi na mātataku lele ai kilātou ma tau kālalaga ki te Aliki mo he fehoahoani. 11Kua lea atu kilātou kia Mohe, “Ona nei e hēai ni fenua tanu i Aikupito kua kē kaumaia ai kimātou ke tanu i te toafa? Heā te na kave kehe tauānoa ai e koe kimātou mai Aikupito? 12Nae hē lea atu kimātou kia te koe i Aikupito, ko tēnei te mea e pa ki ei? Na lea atu kimātou ke tukuvē kimātou ke fai ma pologa. Na hili lele ai te kavea pea o kimātou ma pologa i lo te feoti i kinei i te toafa.”
13Na tali atu ia Mohe, “Koutou nahe mātataku, kae loto tetele! Ka kikila koutou ki te mea e fai e te Aliki ke fakaola ai koutou i te aho nei; auā ko nā tino Aikupito e kitea e koutou i te aho nei, ka hē toe koutou kitea. 14Ko te Aliki te ka tau mo koutou, ma e hēai lele he mea e tatau ke fai e koutou.”
15Ma na vāgana atu ai te Aliki kia Mohe, “Heā te haga tagi mai ai pea lava koe kia te au mo he fehoahoani? Lea ki nā tino Ihalaelu ke hāvavali ki mua. 16Kae ko koe, hiki tō tokotoko ki luga ma fālō atu ki luga o te tai. Ka vāelua te tai, ma mafai ai ia tagata Ihalaelu ke hāvavali i luga o he kelekele mātūtū i loto o te tai. 17Ka fakamakaka e au ia loto o nā tino Aikupito ma ka olo ai oi tuliloa kilātou, ma ka kitea toku mamalu e ala i toku manumālō ia Falao, ana fitafita hāvavali, ana kaliota, ma ana kave kaliota. 18Kāfai e kō fakatōkilaloa kilātou, ka iloa ai e nā tino Aikupito ko au ko te Aliki.”
19Oi na fano ai te āgelu a te Atua, tēia nae i mua o te kautau a Ihalaelu, ki tua o kilātou. Na vēnā foki oi gaoi te poutū ao, 20kua fano oi tū i te vā o nā tino Aikupito ma nā tino Ihalaelu. Na fai e te ao ke pōuli ki nā tino Aikupito, kae mālama ki nā tino Ihalaelu,#14.20 E ono vē te tuhituhiga: Na fai… tino Ihalaelu E hē manino te uiga i te tuhituhiga Epelu ma ko te mea ia na hēki mafai ai nā kautau e lua ke tafapili tētahi ki tētahi, i te pō kātoa.
21Oi na hiki ake ai te lima o Mohe ki luga o te tai, ma na fēke ai e te Aliki te tai i he matagi mālohi mai hahae. Na agi te matagi i te pō kātoa, ma na kavea ai te tai ma kelekele mātūtū. Na vāelua te tai, 22#1 Kol 10.1-2; Epe 11.29ma na olo ai nā tino Ihalaelu kua kuiloto o te tai i luga o he kelekele mātūtū, ma te huāvai kua vē ni puipui i nā itū takitahi. 23Na tulitatao atu e nā tino Aikupito ia tagata Ihalaelu ma mulimuli ki ei ki loto o te tai ma nā holofanua, nā kaliota, ma nā kave kaliota uma lele. 24Ma i te vaveao kua tāli tafa ia ata, na kikila ifo ai te Aliki mai te poutū afi ma te poutū ao ki te kautau a Aikupito, ma na tupu ai to lātou popole ma te hē mau tonu. 25Na fai ai e ia nā uili o a lātou kaliota ke mau i te pala ma na faigatā lele ai ke olo ki mua; ma na lea vē ai nā tino Aikupito, “Tātou hōhola kehe, auā ko te Aliki e tū mo nā tino Ihalaelu, ke tau ma kitātou.”
26Oi na vāgana ai te Aliki kia Mohe, “Hiki tō lima ki luga ma fālō atu ki luga o te tai, ma ka toe foki mai ai te huāvai ki luga o nā tino Aikupito, a lātou kaliota ma nā kave kaliota.” 27Oi na hiki ake ai te lima o Mohe ma fālō atu ki luga o te tai, ma i te taimi kua oho ake ai te lā, na toe foki ai te huāvai ki te loloto nae iei ai muamua. Na taumafai nā tino Aikupito ke hōhola kehe mai te huāvai, kae na togi lava kilātou e te Aliki, ki loto o te tai. 28I te toe fokiga o te huāvai ma tatao kātoa ai nā kaliota, nā kave kaliota ma te kautau uma a Aikupito na tulitatao atu e kilātou nā tino Ihalaelu ki loto o te tai, e hēki iei he tino e fokotahi o kilātou na hao. 29Kae ko nā tino Ihalaelu na hāvavali kuiloto o te tai i he kelekele mātūtū, ma te huāvai kua vē ni puipui i nā itū takitahi.
30I te aho tēnā, na fakahao e te Aliki ia tagata Ihalaelu mai lima o nā tino Aikupito, ma na kitea e tagata Ihalaelu nā tino Aikupito kua mamate i luga o te matāfaga. 31Ma i te kiteaga e tagata Ihalaelu te mālohi lahi na fakaaogā e te Aliki ke fakatōkilalo ai nā tino Aikupito, oi na ofo lele ai kilātou ma na lagona lava to lātou mātataku; ma na talitonu ai kilātou ki te Aliki, ma vēnā foki kia Mohe tana kaukauna.
Currently Selected:
Ehoto 14: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
