Efeho 6
6
Ko Fānau ma Mātua
1Koutou te fānau, ko he tiute faka-Kelihiano e o koutou#6.1 Ko iētahi tuhituhiga e hē i loto ai te he tiute faka-Kelihiano e o koutou te uhitaki ki outou mātua, auā ko te mea tonu tēnā e tatau ke koutou faia.#Klh 3.20 2“Āva ki tō tamana ma tō mātua” ko te fakatonuga muamua ia kua iei te folafolaga e fakaopōpo ki ei: #Eho 20.12; Teu 5.16 3“kae ke hōloga lelei ai ia mea uma mo koe, ma fakaloaloa ai tō ola i te lalolagi.”
4Ko koutou tamana, nahe koutou tautatala pe faia ni mea e fakatupu ai te loto ita o te fānau kia te koutou. Kae tauhi ma akoako i nā fakahinoga faka-Kelihiano. #Klh 3.21
Pologa ma Matai
5Ko koutou pologa, uhitaki ki outou matai faka-te-tino i te mataku ma te gatete; fai te mea tēnei ma te loto fakamāoni moni, e vē lava ko koutou e kaukauna kia Keliho. #Klh 3.22-25 6Nahe koutou faia oioti kāfai kilātou e kikila atu, kae ke taku leleia ai koutou; kae fai ma te loto kātoatoa, koutou nā pologa a Keliho, te mea e finagalo ki ei te Atua. 7Fakatino autou gāluega ma te loto fiafia, e vē lava ko koutou e kaukauna ki te Aliki, kae hē nā ki tagata oioti. 8Ke manatua e koutou, pe ni pologa kitātou pe hēai, ka fōki mai e te Aliki kia te kitātou tau toka tahi te taui, mo a tātou gāluega lelei uma e fai.
9Ko koutou matai, ke vēnā foki autou faiga ki autou pologa, ma nahe faia ni faiga ke fakamataku ai kilātou. Ke manatua e koutou, ko koutou ma autou pologa, e a te Matai lava e fokotahi i te lagi, ma e hē fakapito ia ki he tino. #Teu 10.17; Klh 3.25; 4.1
Nā Kofutau Kātoatoa o te Atua
10Ko te toe mea e lea atu ai au, koutou ke fakamākekeke i te māfutaga a koutou ma te Aliki, e ala i tona mana hilihili kehe. 11Kokofu i nā kofutau kātoatoa uma e fōki atu e te Atua, kae ke koutou mafaia ai oi teteke atu ki nā togafiti kino a te Tiāpolo. 12Auā ko kitātou e hē tau ma tagata, kae ko kitātou e fakahaga tau ki nā pūlega kino faka-te-agaga i te lagi, ki nā tupu, nā taupulega, ma nā mālohiaga i luga i te vāteatea. 13Ko te mea ia, kokofu loa i te kofutau kātoatoa o te Atua! Kāfai la e pa mai te aho kino, e koutou mafaia oi teteke atu ki nā ohofakiga a te fili; ma kāfai e uma te taua, ka hē māluelue lele autou tutū.
14Tutū la ma hāuniuni! Ke kavea te kupu moni ke vē he fuhipaku e fuhi ai outou taugātiti, ma te āmiotonu ke vē he talipupuni fatafata mo koutou, #Iha 11.5; 59.17 15ma ke kavea ma hēvae o koutou te koutou naunau ke tālaki te Tala Lelei o te fīlēmū.#Iha 52.7 16Ke kavea te koutou fakatuatua ke vē he talipupuni i taimi uma; auā ko te talipupuni tēnei e mafai ai e koutou oi titina nā āū mumū uma e tafana e Tē e Kino.#6.16 pe Hatani 17Ma ke kavea te fakaolataga ke vē he pūloutau, ma te kupu a te Atua ke vē ko te pelu e tuku atu kia te koutou e te Agaga. #Iha 59.17 18Fai nā mea uma iēnei i te tatalo, e gogō atu ai ki te fehoahoani a te Atua. Tatalo i taimi uma ma mulimuli ki te mea e lea atu ai te Agaga. Ko te mea la ia, koutou ke mataala ma nahe fakavāivai lele, kae tatalo pea lava mo tagata uma o te Atua. 19Tatalo foki mo oku, ke tuku mai e te Atua kia te au he fekau kāfai au kua lava hāuni ke tautala, kae ke tautala ai au e aunoa ma he mataku, ke fakailoa ki tagata te mea lilo e uiga ki te Tala Lelei. 20Ko au na uga mai ke fakatino te gāluega tēnei, ma ko te māfuaga ia kua falepuipui ai au. Tatalo ke maua e au te lototele kāfai au e tautala e uiga ki te Tala Lelei.
Nā toe Kupu
21Ko Tuhiko, to mātou uho pele ma ko he kaukauna fakamāoni i te gāluega a te Aliki, ka maua ai e koutou nā fakamatalaga uma e uiga kia te au, kae ke koutou iloa ai te tūlaga e iei ai au.#Gāl 20.4; 2 Tim 4.12 #Klh 4.7-8 22Ko te mea ia kua uga atu ai e au kia te koutou—ke fakailoa atu te tūlaga e iei kimātou uma i kinei, ma ke fakamālohi atu ki outou loto.
23Ke maua e te kau uho Kelihiano uma te fīlēmū vēnā te alofa ma te fakatuatua mai te Atua te Tamana ma te Aliki ko Iehu Keliho. 24Ke ia te koutou uma e alolofa pea lava ki to tātou Aliki ko Iehu Keliho, te alofa tūnoa o to tātou Atua.
Currently Selected:
Efeho 6: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
