Efeho 5
5
Ola i te Mālama
1Ona ko koutou ni fānau fakapelepele e a te Atua, e tatau ai koutou ke taumafai ke vē koutou ko ia. 2E tatau nā olaga o koutou ke pūlea e te alofa, e vē ko te alofa o Keliho kia te kitātou ma na fōki ai tona ola mo kitātou, ke fai ma tāulaga manogi e fiafia ai te Atua. #Eho 29.18; Hal 40.6
3Ko koutou ni tagata e o te Atua, e hē tatau lele la ke tākua i autou talatalanoaga nā uiga tuinanau ki te tino, pe ko nā uiga mātagā, pe ko te fakaloloto. 4E hē tatau foki ke fakaaogā e koutou ni kupu kino, pe ni tala valea, pe ni kupu palapalā. Kae e tatau koutou ke fakafetai ki te Atua. 5Ke mautinoa e koutou iloa te mea tēnei: E hēai he tino e faia ni uiga tuinanau ki te tino, pe ni uiga mātagā pe ko te manako lahi (auā ko te manako lahi e tuha lava kua ifo ki tupua), e maua hona vāega o te tofi i te Mālō o Keliho ma o te Atua.
6Ia koutou nahe fakahehēa e he tino i ni kupu e hēai ni uiga; ko nā mea iēnei te ka pakū ai te tōkahā o te Atua ki luga o kilātou e hē uhitaki kia te ia. 7Koutou la nahe fakapipiki ki nā tino vēnei. 8Ko koutou foki nae māhani oi ola i te pōuli, kae talu lava te kavea o koutou ma tagata o te Aliki, ko koutou kua i te mālama. Ko koutou la e tatau ke ola e vē ko nā tino o te mālama, 9auā ko te mālama#5.9 mālama ko iētahi tuhituhiga e lea mai Agaga te kaumaia he helehelega o nā itūkāigā mea lelei uma lele, te āmiotonu ma te meamoni. 10Taumafai ke iloa e koutou te mea e fiafia ai te Aliki. 11Ia koutou lele nahe kau ki nā mea e hēai he uiga e fai e tagata; nā mea e fai i te pōuli. Kae kaumai ki fafo ki te mālama. 12(Ko he mea e fakamā lele ke tautala e uiga ki nā mea e fai munimuni e kilātou.) 13Ma kāfai nā mea uma e kaumai ki fafo ki te mālama, oi ka kitea lelei ai o lātou uiga moni; 14auā ho he mea e kitea manino e fai tēnā ma mālama.#5.14 ho he mea… tēnā ma mālama pe ko te mālama te kitea manino ai ia mea uma E vē oi tūhia,
“Ala ake, ia koe tēnā e moe!
Tū ake ki luga mai te mate;
ko te mālama o Keliho
ka huhulu atu ki ō luga.”
15Kikila lelei la pe ko heā te itūkāiga olaga e ola ai koutou. Koutou nahe ola e vē ko nā tino e hē iloa he mea, kae ola e vē ko nā tino popoto. 16Fakaaogā lelei nā avanoa uma e maua e koutou, auā ko nā aho iēnei ni aho kino.#Klh 4.5 17Koutou la nahe vālelea, kae taumafai oi hākilikili pe heā te fofou te Aliki ke fai e koutou.
18Koutou nahe konanā i te uaina, auā e takitaki ai koutou ki te kino; kae ko koutou e tatau ke fakatumu i te Agaga. 19Tautala tētahi ki tētahi i nā kupu o nā Halamo, i nā pehe lotu ma i nā pehe faka-te-agaga; pepehe atu i nā vīkiga ki te Aliki ma outou loto kātoatoa. #Klh 3.16-17 20Ke fakafetai pea lava koutou ki te Atua te Tamana mo nā mea uma lele, i te igoa o to tātou Aliki ko Iehu Keliho.
Ko Fafine ma a Lātou Tāne
21Ke tuku atu kātoatoa tētahi ki te pule a tētahi ona ko te koutou fakaaloalo lahi kia Keliho.
22Koutou fafine, tuku atu koutou kātoatoa ki te pule a autou tāne, e vē ona fai e koutou ki te Aliki. #Klh 3.18; 1 Pet 3.1 23Auā ko te tāne e ia te ia te pule ki tana āvaga, e vē foki lava ona ia Keliho te pule ki te Ekalehia, tona tino, ma ko ia foki lava ko te Fakaola. 24Ko te mea ia e tatau ai nā fafine ke tuku atu kātoatoa kilātou kia lātou tāne, e vē foki lava oi tuku atu kātoatoa te Ekalehia kia Keliho.
25Koutou tāne, alolofa ki autou āvaga e vē foki lava ona alofa ia Keliho ki te Ekalehia, ma na ia tuku atua ai tona ola mo te Ekalehia.#Klh 3.19; 1 Pet 3.7 26Na ia faia te mea tēnei ke fakapaia ai te Ekalehia mo te Atua e ala i tana kupu (ka kua uma ai te fakamamāgia e ia i te vai), 27kae ke ia tukulima atu ai te Ekalehia kia te ia lava, i tona gali kātoatoa—e mamā ma hēai he hehē, e hēai he māila pe he mānuminumi, pe ko hētahi lava mea e hē kātoatoa te lelei. 28E tatau ia tāulelea ke alolofa kia lātou āvaga, e vē foki lava oi alolofa kilātou ki o lātou lava tino. Ko te tino e alofa ki tana āvaga, e alofa kia te ia lava. 29(E hēai he tino e inoino ki tona lava tino, kae e fafaga e ia ma tauhi lelei ki ei, e vē foki lava oi fai e Keliho ki te Ekalehia, 30auā ko kitātou ni vāega e o tona tino). 31E vē oi lea mai te tuhituhiga paia, “Ko te mea ia ka tukua ai e te tamāloa tona tamana ma tona mātua, kae fakatahi ma tana āvaga, ma kavea ai kilāua e toka lua ma tino e tahi.” #Ken 2.24 32Ko te mealilo tēnei kua fakaalia e ala i te tuhituhiga paia, e matuā loloto lava te uiga. I toku mālamalama, e fakatatau kia Keliho ma te Ekalehia. 33Kae e fakatatau foki kia te koutou: ko tāne tau toka tahi uma e tatau ke alolofa kia lātou āvaga, ma e vēnā foki ia fafine tau toka tahi uma, e tatau ke āva kia lātou tāne.
Currently Selected:
Efeho 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
