1 Kolinito 8
8
Ko te Fehili e Uiga ki nā Meakai kua Ofo ki nā Tupua
1E vē ko te mea na tuhi mai ai koutou e uiga ki nā meakai kua ofo atu mo nā tupua:
E hako e “ia te kitātou uma te mālamalama,” e vē oi lea ai kilātou. Ka ko he mālamalama vēnā, e fefete ai he tino i te fāfia; kae ko te alofa, e fakatau fehoahoani ai tētahi ki tētahi. 2Ko te meamoni, ko nā tino e manatu e kilātou iloa he mea, ko hēki kilātou iloa nā mea e tatau ke kilātou iloa. 3Kae ko te tino e alofa ki te Atua, e iloa ia e te Atua.
4Ko te mea ia, e vēia ki te kakai ki nā meakai kua ofo mo nā tupua: E iloa e kitātou e hēai he tupua i te lalolagi e iei hona ola; ma e fokotahi oioti lava te Atua. 5E ui lava e lahi nā mea e takua ni “atua,” pe e i te lagi pe e i te lalolagi, ma e ui lava e lahi nā “atua” vēnei ma nā “aliki,” 6kae mo kitātou, e fokotahi oioti lava te Atua, ko te Tamana, na ia gaohia ia mea uma, ma ko kitātou e ola mo ia; ma e fokotahi oioti lava te Aliki, ko Iehu Keliho; e ala ia te ia na gaohia ai ia mea uma, ma e ala ia te ia kua ola ai kitātou.
7Kae e hē ko tagata uma te kilātou iloa te meamoni tēnei. Ko iētahi tino kua māhani lava ki nā tupua ma ke pa mai lava nei, kāfai e kakai ki nā meakai vēnei, e manatu lava kilātou ni meakai iēnei e mo he tupua; e faigatā lele mo kilātou ke iloa te mea e hako mai te mea e hehē,#8.7 faigatā lele… mea e hehē pe vāivai lele to lātou lotofuatiaifo ma e manatu ai kilātou, ko kilātou e hē mamā i nā meakai. 8Kae e hē fakaleleia e nā meakai to tātou vā ma te Atua; e hēai he āfāina kāfai kitātou e hē kakai ki nā meakai iēnei, oi e hēai foki he āfāina kāfai kitātou e kakai ki ei.
9Kae e tatau lava koutou ke fakaetēte, ke nahe kaveagia te haolotoga o koutou i nā mea iēnei, ma ala e pakukū ai ki te agahala kilātou e vāivai i te fakatuatua. 10E vēhea kāfai he tino e vāivai tona lotofuatiaifo e ia kitea koe, tē e iei te “mālamalama” e kai i te mālumalu o he tupua; ka hē kavea nei tēnā ma mea ka fakamālohia ai ia ke kai ki nā meakai kua ofo mo nā tupua? 11Ma ko te tino vāivai tēnei, te uho o koutou na oti mo ia ia Keliho, ka fakaumatia ona ko tō “mālamalama” e tākua! 12Kāfai koutou e agahala ona kua āfāina he uho o koutou e vāivai te lotofuatiaifo, ko koutou la kua agahala kia Keliho. 13Ko te mea ia, kāfai ko nā meakai e agahala ai he tino kua talitonu, ko au ka hē toe kai lele ki nā kanofi o nā manu, kae ke nahe agahala ai he tino kua talitonu.
Currently Selected:
1 Kolinito 8: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
