1 Kolinito 7
7
Nā Fakahinoga e Uiga ki te Fakaipoipo
1I te taimi nei, ko au ka tautala atu e uiga ki nā mea na tākua e koutou i te koutou tuhi.
E lea koutou, “E lelei te hē fakaipoipo o he tamāloa.” 2Kae ona ko te lahi o nā fakaohōhoga ke fai ai nā āmioga mātagā, e tatau ai ia tamāloloa tau toka tahi ke iei hana āvaga, ma fafine tau toka tahi ke iei hana tāne. 3E tatau te tamāloa ke fai tona tiute ko ia ko te tāne, ma tatau te fafine ke fai tona tiute ko ia ko te āvaga, ma e tatau kilāua ke fakamalie e tētahi ia manakoga o tētahi. 4E hē ko te āvaga te pule ki tona lava tino, kae ko tana tāne; e vēnā foki oi hē ko te tāne te pule ki tona lava tino, kae ko tana āvaga. 5Nahe tetekea e tētahi tētahi, vaganā ai e mālilie muamua koulua ke fai vēnā mo he vāitaimi, kae ke mafai ai ke fakafano houlua taimi i te tatalo; oi kua toe kāmata ai nā hokotaga fakaulugāliki. I te auala tēnei, ka hē mafai ai koutou ke fakaohōhogia e Hatani ona kua hē ia te koutou te loto onohai.
6E hē ko he fakatonuga tēnei kae ko he fakatagaga mai ia te au, ke fai ai te mea tēnei e koutou, pe kāfai ko te mea ia e fofou koutou ki ei. 7Ko te meamoni lava, e hili atu toku fofou ko koutou ke vē ko au; kae e tofu lava te tino ma te meālofa fakapitoa mai te Atua, ko tētahi tino ko tēnei tana meālofa, ko tētahi ko tēnā tana meālofa.
8Mo koutou ko hēki fakaipoipo ma koutou kua oti autou tāne, e hili atu mo koutou kāfai koutou e nonofo nā ko koutou e vē ko au. 9Kae kāfai e hē lava te loto onohai o koutou, e tatau la koutou ke fakaipoipo—e hili atu te fakaipoipo i lo te mū i te nauloto.
10Mo nā tino kua fakaipoipo, ko tēnei taku fakatonuga, e hē āku kae e a te Aliki: ko te fafine e hē tatau ke tīaki e ia tana tāne; #Mat 5.32; 19.9; Mlk 10.11-12; Luk 16.18 11kae kāfai e fai e ia te mea tēnei, e tatau ke nofo ai loa vēia tautahi auā ka hēai, kua tatau loa la ke toe fakalelei ma tana tāne; ma ko te tāne e hē tatau ke tatala e ia tana fakaipoipoga.
12Mo iētahi tino, ko au (ko au kae hē ko te Aliki) e lea atu vēnei: kāfai he tamāloa Kelihiano e nonofo ma he fafine e hē ko he Kelihiano kae kua malie te fafine ke nonofo pea kilāua, e hē tatau ke tatala e ia te fakaipoipoga a kilāua. 13Ma kāfai he fafine Kelihiano e fakaipoipo ki he tamāloa e hē he Kelihiano ma kua malie te tamāloa ke nonofo pea kilāua, e hē tatau ke ia tatalagia te lā fakaipoipoga. 14Auā ko te tāne e hē he tino kua talitonu, e talia i mua o te Atua kāfai e fakatahi kilāua ma tana āvaga Kelihiano, ma ko te āvaga e hē he fafine kua talitonu, e talia i mua o te Atua kāfai e fakatahi kilāua ma tana tāne Kelihiano. Kāfai e hē faia vēia, ko te fānau a kilāua ka vē he fānau e a ni tino fakapaupau, kae e talia lava kilātou i mua o te Atua. 15Kae kāfai te tino e hē he Kelihiano e fofou ke tīaki tona hoa Kelihiano, tuku vē ke fai. I nā mea vēnei, kua haoloto te hoa Kelihiano, pe ko te tāne pe ko te āvaga, ke fai te mea e fofou ia ki ei. Auā kua kalaga atu te Atua ko koutou ke ola i te fīlēmū. 16Ko koe te āvaga Kelihiano, e vēhea ona kē iloa e mafai e koe oi fakahao tau tāne? Ko koe te tāne Kelihiano, e vēhea ona kē iloa e mafai e koe oi fakahao tau āvaga?
Ola i te Olaga kua Filifilia e te Atua mo Koutou
17Tuku vē ki te tino lava ia, ke ola i te olaga nae iei ai i te taimi na filifilia ma kalagagia ai e te Atua ke kavea mo ia. Ko te mea tēnei e fakatonu lava e au ki nā Ekalehia uma. 18Kāfai na kalagagia koe e te Atua ka kua uma ai te pelitome o koe, ia koe nahe taumafai ke kave kehe nā māila o te pelitome; kāfai na kalagagia koe e te Atua ka ko hēki pelitome ai koe, nahe taumafai ke pelitome koe. 19Pe kua pelitome he tino pe hēai, e hēai lele he mea e iei; ko te mea e fakatāua ko te uhitaki ki nā fakatonuga a te Atua. 20E tatau ke ola pea lava te tino i te olaga nae iei ai i te taimi na kalagagia ai ia e te Atua. 21Nae he pologa nei koe i te taimi na kalaga atu ai te Atua kia te koe? Nahe kē popole la ki te itū tēnā; kae kāfai e maua e koe he avanoa ke fakahaoloto ai koe, fakaaogā.#7.21 kae kāfai e maua e koe he avanoa ke fakahaoloto ai koe, fakaaogā pe kae e tuha lava pe maua e koe he avanoa ke fakahaoloto ai koe, e tatau ke fakaaogā lelei e koe te avanoa na kavea ai koe ma pologa 22Auā ko he pologa na kalagagia e te Aliki, ko he tino tēnā e haoloto i te Aliki; e vēnā foki la he tino e haoloto na kalagagia e te Aliki, e kavea ia ma pologa a Keliho. 23Ko koutou na fakatau e te Atua i he tau; nahe kavea la koutou ma pologa a tagata. 24Oku uho, pe ko heā lava te tūlaga nae iei ai koutou tau toka tahi i te taimi na kalaga atu ai te Atua kia te koutou, ke tūmau ai pea koutou i te māfutaga fakatahi ma te Atua.
Nā Tino e Hēki Fakaipoipo
25E vē la ko te mea na tuhi mai ai koutou e uiga ki nā tino e hēki fakaipoipo: E hē ia te au he fakatonuga mai te Aliki, kae e kavatu hoku lagona, ma e mafai ke talitonu mai koutou kia te au, ona kua fakaalia te alofa tūnoa o te Aliki kia te au.
26Ona ko nā fakafītāuli e iei i te taimi nei, e manatu ai au, e lelei atu mo he tino ke tūmau i te mea e iei ai nei. 27Kua fakaipoipo koe? Nahe kē tīakia la tau āvaga. Ko hēki fakaipoipo koe? Nahe kē fakaipoipo la. 28Kae kāfai koe e fakaipoipo, e hē ko he agahala te mea tēnā; ma kāfai he teine ko hēki fakaipoipo e fakaipoipo, e hē ko he agahala tana mea tēnā e fai. Kae e hili atu toku fofou ke kō puipuia koutou ke nahe maua i nā fakafītāuli ka feagai ma nā tino e fakaipoipo.
29Ko te uiga o taku tala, oku uho, ko tēnei: kua hē lava he taimi e totoe; ma e kāmata atu nei ko nā tino kua uma te fakaipoipo e tatau ke ola e vē lava ni tino e hēki fakaipoipo; 30ko nā tino e faitatagi, e vē lava ni tino e hē fakanoanoa; ko kilātou e faikakata, e vē lava ni tino e hē fiafia; ko kilātou e fakatau ni mea, e vē lava ni tino e hēai ni a lātou mea; 31ko kilātou e fakatāuagia ia koloa o te lalolagi, e vē lava ni tino e hē tuahā moni ki ei. Auā ko te lalolagi tēnei, e vē ko te taimi nei, ka hē mataloa oi mou kehe atu.
32Ko au e hē fofou ko koutou ke popole. Ko te tino e hēki fakaipoipo e fano tona māfaufau ki te gāluega a te Aliki, auā e taumafai ke fai e ia te mea e fiafia ai te Aliki. 33Kae ko te tino kua fakaipoipo, e fano tona māfaufau ki nā mea o te lalolagi, auā e taumafai ke fai e ia nā mea e fiafia ai tana āvaga, 34ma e fetoho tona māfaufau ki nā itū e lua. Ko he fafine e hēki fakaipoipo pe he tāupou, e fano tona māfaufau ki te gāluega a te Aliki, auā e fofou ke ofo atu ia mo te Atua i te tino vēnā ma te agaga; ka ko he fafine kua fakaipoipo e fano tona māfaufau ki nā mea o te lalolagi, auā e fofou ke fai e ia nā mea e fiafia ai tana tāne.
35Ko au e lea atu vēnei mo te koutou lelei. Ko au e hē taumafai ke tāofiofi koutou i nā mea e fofou koutou ke koutou faia. Kae ko au e fofou ke fai e koutou te mea e hako ma tonu, ma ke ofo atu outou tagata kātoatoa ki te gāluega a te Aliki e aunoa ma he fakafehili.
36I te tūlaga o he toka lua kua uma te fakamau ke fakaipoipo, kae kua toe hui o lā māfaufau: kāfai e manatu te tamāloa e hē hako ona uiga e fai ki te fafine muli, ma kāfai kua mālohi lahi tona nauloto ki ei ma kua lagona ai e ia ko kilāua e tatau ke fakaipoipo, tuku ke fai te mea e fofou ia ki ei:#7.36 o he toka lua… fofou ia ki ei pe o he tamāloa ma hona afafine ko hēki fakaipoipo: kāfai e iloa e te tamāloa e hē hako ona uiga e fai ki tona afafine, ma kāfai te afafine kua i te matua e tatau ai ke fakaipoipo, e tatau ke fai te mea e fofou ia ki ei, ma tuku atu tona afafine ke fakaipoipo E hē he agahala te mea tēnā. 37Kae kāfai he tamāloa e hēki fakamālohia kae kua tonu i tona loto ke nahe fakaipoipo,#7.37 ke nahe fakaipoipo pe nahe tuku atua tona afafine ke fakaipoipo ma kāfai e ia mafaia oi pūlea kātoatoa ki ona lagona ma kua tonu i tona lava māfaufau te mea e tatau ke fai—oi e hili atu mo ia kāfai e hē fakaipoipo ki te fafine muli.#7.37 e hē fakaipoipo ki te fafine muli pe e ia tuku atua tona afafine ke fakaipoipo 38Ko te mea ia, e lelei kāfai te tamāloa e fakaipoipo,#7.38 fakaipoipo pe e tuku e ia tona afafine ke fakaipoipo kae e hili atu la te lelei mo te tamāloa e hē fakaipoipo.#7.38 e hē fakaipoipo pe e hē ia tuku atua tona afafine ke fakaipoipo
39Ko te fafine kua fakaipoipo e hē haoloto lele pe kāfai koi ola pea lava tana tāne; kae kāfai e oti tana tāne, oi fakataga ai ia ke toe fakaipoipo ki ho he tamāloa e fofou ia ki ei, ma ko te tamāloa e tatau ko he tino Kelihiano. 40Kae e hili atu tona fiafia kāfai e nofo vē pea i te mea e iei ai. Ko tēnā toku manatu, ma e manatu au e ia te au te Agaga o te Atua.
Currently Selected:
1 Kolinito 7: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
