1 Kolinito 9
9
Ko Āiātatau ma Tiute o he Apohitolo
1E hē ia te au nei te haolotoga? E hē ko au nei he apohitolo? E hēki kō kitea nei ia Iehu to tātou Aliki? E hē ko koutou nei kua vēnā ona ko taku gāluega mo te Aliki? 2Kāfai iētahi tino e manatu ko au e hē he apohitolo, ko te mea hili tēnā e koutou iloa. Ona ko te olaga o koutou i te māfutaga ma te Aliki, kua kavea ai koutou ma fakamāoniaga ko au ko he apohitolo.
3Kāfai au e fehiligia e tagata, ko tēnei taku tali atu ki ei: 4E hē ia te au nei te āiātatau ke fōki mai ai haku mea ke kai, ma haku vai ke inu, e tuha ai ma taku gāluega e fai? 5E hē ia te au nei te āiātatau, ke fakatakitaki ai ki nā mea nae fai e iētahi apohitolo ma nā uho o te Aliki ma Petelu,#9.5 I te gagana Eleni Kefa i toku fano ma kave haku āvaga Kelihiano i aku faigāmalaga? 6Pe ko te mea ko kimāua oioti lava ma Panapa te tatau ke gālulue mo ni totogi ke tauhi ai lava kimāua? 7Ko ai ni fitafita e totogi lava e kilātou nā mea e ola ai ma nā mea e fakaaogā e kilātou? Ko ai ni faifātoaga e hē kakai lele ki ni vine mai o lātou lava tōvine? Ko ai ni leoleomāmoe e hē kilātou fakaaogā nā huāhuhu mai a lātou lava māmoe?
8He pule nei e āku te lea atu ai au i nā mea iēnei? E hē tākua nei foki i te Tūlāfono te mea tēnei? 9Auā e tūhia i te Tūlāfono a Mohe, “Nahe nonoagia te gutu o he pōvi poa kāfai e fakaaogā e koe ke holia te haito.” Ko te pōvi poa nei te popole ki ei te Atua? #Teu 25.4; 1 Tim 5.18 10E hē ko kitātou nei te fakaaga ki ei tana kupu tēnei? Io, ko kitātou, auā ko te tino e hua e ia te kelekele ma te tino e holi e ia te haito, e gālulue ma te fakamoemoe e maua ni o lā vāega o te helehelega. 11Kāfai na kimātou totōagia nā mea lelei faka-te-agaga ia te koutou, e hē fetaui nei kāfai e helehele e kimātou ni mea ke tauhi ai kimātou, mai ia te koutou? #Lom 15.27 12Kāfai e i iētahi tino te āiātatau ke tauhi ai kilātou e koutou, ka hē hili atu nei la ta mātou āiātatau?
E ui i tēia, e hēki kimātou fakaaogā te āiātatau tēnei. Ka kua onohai kimātou i nā mea uma, kae ke nahe kavea ma mea e tulave ai te Tala Lelei e uiga kia Keliho. 13E moni nei lava e hē koutou iloa ko nā tino e gālulue i te Mālumalu e maua a lātou meakai mai te Mālumalu, ma ko nā tino e faia nā tāulaga i te fata faitāulaga e maua to lātou vāega mai nā tāulaga? #Teu 18.1 14Na vēnā foki lava ona fakatonu mai e te Aliki, ko kilātou e tālakia te Tala Lelei, e tatau ke maua he mea ke ola ai kilātou mai te Tala Lelei. #Mat 10.10; Luk 10.7
15Kae e hēki kō fakaaogāgia lele nā āiātatau iēnei, ma ko au foki e hē tuhi atu kae ke maua ai e au. E hili atu ai toku oti, i lo te kave kehea e he tino o te mea e fāfia ai au. 16Auā kāfai e tālaki e au te Tala Lelei, e hēai la he mea ke fāfia tauānoa ai au. Ko au na fakatonugia ke faia te mea tēnei. Kae heāloa la au kāfai e hē kō tālakia te Tala Lelei! 17Ānei taku gāluega na fai i toku loto malie, ko au e fakamoemoe ki hoku totogi; kae e fai e au ona ko he tiute kua tōfia ai au e te Atua. 18He totogi ā la to oku e maua? Ko te avanoa ke tālaki ai te Tala Lelei e aunoa ma he totogi, e aunoa ma hoku tagi ki aku āiātatau i taku galue mo te Tala Lelei.
19E ui lava ko au he tino haoloto ma e hēai hoku matai, kae kua kō faia au ma pologa ki tagata uma, kae ke kō kaumaia ai ni tino e tokalahi kia Keliho. 20Ka koi galue au mo nā tino Iutaia, ko au nae ola e vē he Iutaia kae ke maua ai e au kilātou; ma e ui lava ko au e hē aofia i te Tūlāfono a Mohe, kae kāfai au e galue mo nā tino e aofia ai, ko au e ola e vē lava he tino e aofia ai, kae ke kō maua ai kilātou. 21E vēnā foki la kāfai au e galue mo tagata nukukehe, ko au e ola e vē he nukukehe i fafo o te Tūlāfono Iutaia, kae ke maua ai e au ia tagata nukukehe. E hē vē la ko au e hē uhitaki ki te tūlāfono a te Atua; ko au e i lalo o te tūlāfono a Keliho. 22I te mea e iei nā tino e vāivai to lātou fakatuatua, ko au foki e vāivai e vē ko kilātou, kae ke kō maua ai kilātou. Oi e fai ai lava e au ho he mea e kō mafaia, ke fakaola ai ni tino o kilātou.
23E fai e au nā mea uma iēnei mo te Tala Lelei, kae ke iei fakatahi ai au i nā fakamanuiaga e maua mai ai. 24E iloa e koutou e tokalahi nā tino fetutuli i he tūkuga, kae e fokotahi oioti te tino e maua e ia te fakailoga. Fetutuli la kae ke maua te fakailoga. 25Ko nā tino fetutuli tau toka tahi uma, e koleni fakamāoni ma e pūlea i mea uma, kae ke fakapale kilātou i te pale e fano e pala. Kae e fai e kimātou ke maua ai e kimātou te pale e hē pala ke pa ki te fakavavau. 26Ko te mea ia e vili hako ai au ki te laina tini; ko te mea ia e vē ai au ko he tino fuhu e hē fakamāumaua ni ana tuki. 27E fakamākeke e au toku tino i te tatuki ma pūlea ki toku loto kātoa, nā ia au e fakahala ma tuli kehe ma te tākaloga, tēia kua uma toku kalaga ki iētahi tino ke ōmamai oi tākakalo ai.
Currently Selected:
1 Kolinito 9: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
