1 Kolinito 5
5
Nā Āmio Mātagā i Loto o te Ekalehia
1Kua tākua mai, e iei nā tino o koutou e faia nā āmioga mātagā, ni āmio e pa ki tagata nukukehe e hē kilātou faia. Ko te fakamatalaga kua maua e au, e iei he tamāloa kua nonofo ma tona mātua fai, te āvaga a tona tamana.#Teu 22.30 2E vēhea ake nei la ona fāfifia koutou! E hē tatau nei koutou ke māhiahi? Ko te tino kua ia faia tēnei mea, e tatau ke tuli kehe ma te koutou māopōpoga. 3E ui lava ko au e hē fakatahi ma koutou i te tino, ka ko au e i kinā ma koutou i te agaga; ma kua kō faia te fakaikuga o te tamāloa na ia faia te mea tēnei, 4e vē lava ko au e i kinā fakatahi ma koutou. Kāfai koutou e māopōpo, ma iei ai ma toku agaga fakatahi ma te mana o to tātou Aliki ko Iehu, 5ke tukulima atu e koutou te tamāloa kia Hatani ke ia fakaumatiagia ia i te faka-te-tino, kae ke hao ai tona agaga i te Aho o te Aliki.
6E hē tatau koutou ke fāfifia. E hē koutou iloa ko te tamākīkī mea fefete e fefete ai te paluga kātoa? #Kal 5.9 7E tatau ke koutou kave kehea te mea fakafefete tuai o te agahala, kae ke mamā kātoatoa ai koutou. Oi ka vē ai koutou he paluga fōu e hēai he fefete e iei, e vē ona mautinoa e au, ko koutou e vēnā. Auā ko Keliho, te tātou punuāmāmoe o te Kaiga o te Pāheka, kua uma te ofo atu ma tāulaga.#Eho 12.5 8Ke kitātou fakamanatua la te Pāheka, i te falaoa e hēai he fefete, te falaoa o te fakamāoni ma te meamoni, kae hē ko te falaoa e iei ai te fefete tuai o te agahala ma te āmiokino.#Eho 13.7; Teu 16.3
9I taku tuhi na tuhi atu kia te koutou, na lea atu au ko koutou ke nahe fakapipiki ki nā tino e faia nā āmio mātagā. 10Ko au e hē lea atu ko nā tino fakapaupau uma o te lalolagi e hē ni Kelihiano, e fai āmio mātagā, pe manako lahi, pe kaihohoa, pe ifo ki tupua. Auā heiloga ko koutou kua olo kehe uma mai te lalolagi, oi fātoā hē koutou maua ai ni tino vēnei. 11Ko te uiga o taku lea atu, ia koutou nahe fakapipiki ki he tino e lea ko ia ko he Kelihiano, kae fai āmio mātagā, pe manako lahi, pe ifo ki tupua, pe tau fakakino, pe konā, pe kaihohoa—nahe nonofo foki ki lalo ma kakai fakatahi ma he tino vēnei.
12Auā heā nei taku fekau e fakamahino ai e au nā tino i fafo ma e hē i loto o te Ekalehia? E hē ko nā tino nei i loto o te Ekalehia te tatau ke koutou fakamahinoa? 13E fakamahino e te Atua nā tino i fafo e vē oi lea mai te tuhituhiga paia, “Kave kehe te tino kino mai te koutou māopōpoga.”#Teu 13.5; 17.7 (LXX)
Currently Selected:
1 Kolinito 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
