1 Kolinito 4
4
Ko nā Apohitolo a Keliho
1E tatau ke ia te koutou te manatu ko kimātou ni kaukauna e a Keliho, ni tino kua tōfia ke kikilāgia nā mealilo moni a te Atua. 2E hē gata la i tēnā, e manakomia nā kaukauna vēnei, ke fakamāoni ki to lātou matai. 3E hēai lele la hoku popole pe kāfai au e fakamahino e koutou, pe i loto o ho he fale fakamahino o tagata. Ko te meamoni, e hē kō fakamahinoa foki au. 4E hēai he mea e kō iloa e hehē ai au, kae e hē vēake ai la ko au e mamā. E nā ko te Aliki lava te ia fakamahinoa au. 5E hē tatau la ke fakailoa e koutou te ikuga o te fakamahinoga o ho he tino, ka ko hēki pa ki te taimi tatau. Ko te ikuga o te toe fakamahinoga e tatau ke fakatali, ke pa ki te taimi e haele mai ai te Aliki; ka ia kaumaia ki te mea mālama nā mea nae mumuni i te pōuli, ma fakailoa ia fuafuaga lilo i nā māfaufau o tagata. Oi ka maua ai e kilātou uma te vīkiga e tatau ai, mai te Atua.
6Ko nā mea uma iēnei oku uho, kua uma te fai e kimāua ma Apolo, ke fakafaigōfie ai mo koutou. Kua kavea to mā toka lua ma fakatakitakiga, kae ke mālamalama ai koutou i te uiga o te fakakupuga e vē mai, “Fakamamalu nā tūlāfono moni.” Nahe iei lele he tino o koutou e fiafia ki tētahi tino, kae inoino ki tētahi. 7Na hei faia nei koutou ke hili atu i lo iētahi tino? E hēki fōkiatua nei e te Atua nā mea uma kia te koutou? Heā la te fāfifia tauānoa ai koutou, e vē lele ko nā mea ia te koutou, e hē ko he meālofa?
8Kua maua nei e koutou nā mea uma e manakomia e koutou? Kua maukoloa nei koutou? Kua fai nei koutou ma tupu, e ui lava ko kimāua e hē ni tupu? I hētahi itū, māumau ake ko koutou moni kua kavea ma tupu, kae ke kavea ai foki kimāua ma tupu fakatahi ma koutou. 9Auā e fōliga kua tuku e te Atua kimātou te kau apohitolo ki he tūlaga e pito hili te maualalo, e vē ni tino kua fakahala ke feoti i mua o tagata, ma ke fakamātamata ki ei te lalolagi kātoa o te kau āgelu, ma o tagataola uma. 10Ona ko Keliho, e kavea ai kimātou ma tagata vālelea; kae ko koutou e popoto i te māfutaga ma Keliho! Ko kimātou e vāivai, kae ko koutou e mālolohi! Ko kimātou e inohia, kae ko koutou e fakaaloalogia e tagata! 11Ke pa mai ki te taimi nei, ko kimātou e fia kakai ma fia inu; e kokofu i nā kofu gāhaehae; e kini; e hēai ni mea e nonofo ai; 12ma e fakaaogā o mātou lima i nā gāluega fītā. Kāfai kimātou e fetuku e tagata, e fakamanuia e kimātou; kāfai kimātou e maua i nā hāuāga, e onohai kimātou;#Gāl 18.3 13kāfai e fai kupu kino mai ia tagata kia te kimātou, e tali kimātou ki ei i nā kupu alofa. Ke pa mai nei, ko kimātou e vē ni otaota i te kikila a tagata; e vē ko nā mea pala uma o te laukelekele!
14Ko au e hē tuhi vēnei atu ke fakamāhiahi koutou, kae ke fakatonu atu koutou nā fānau e pele ia te au. 15Auā e tuha lava pe 10,000 ia takitaki o koutou i te olaga faka-Kelihiano, e fokotahi oioti lava te koutou tamana. Kua fai au ma outou tamana, i te māfutaga ma Keliho Iehu, ona na kō kaumaia te Tala Lelei kia te koutou. 16Ko au la e fautua mālohi atu kia te koutou, ko koutou ke mulimuli ki aku fakatakitakiga.#1 Kol 11.1; Fil 3.17 17Ko te mea ia ka uga atu ai e au kia te koutou ia Timoteo, toku ataliki pele ma te fakamāoni i te olaga faka-Kelihiano. Ka ia fakamanatu atua kia te koutou nā mea tāua e mulimuli au ki ei i te olaga fōu fakatahi ma Keliho Iehu, e vē oi akoako atu e au ki nā Ekalehia uma i nā koga kehekehe.
18Ko iētahi o koutou kua fia popoto, ona nae hē manatu koutou ko au e āhiahi atu kia te koutou. 19Kae ko au ka fanatu i he taimi pili mai, pe kāfai e finagalo ki ei te Aliki. Ma ka iloa ai e au te meamoni, e hē gata i nā kupu a nā tino fia popoto, kae pe ia te kilātou moni te mana o te Agaga Paia. 20Auā ko te Mālō o te Atua e kitea i olaga o tagata e ala ia lātou gāluega e fai, kae hē ia lātou kupu. 21Heā nei te fofou koutou ki ei? Ke fanatu au ma te kini kia te koutou, pe fanatu au i te agaga o te alofa ma te agamalū?
Currently Selected:
1 Kolinito 4: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
