1 Kolinito 6
6
Mōliaga e he Kelihiano o hētahi Kelihiano
1Kāfai he tino o koutou e iei he mea e hē lelei ai ma hētahi uho Kelihiano, e kave nei e koe tau tagi ki mua o nā fakamahino fakapaupau? Pe kave e koe ki mua o tagata o te Atua ke kilātou faia he tonu? 2E hē koutou iloa ko tagata o te Atua te kilātou fakamahinoagia te lalolagi? Kāfai la ka fakamahino e koutou te lalolagi, e hē mafai nei la e koutou oi fakamahino nā tamā mea? 3E hē koutou iloa ko nā āgelu e fakamahino e kitātou? Ma kāfai la e vēnā, ko tona uiga e mafai e kitātou oi fakamahino ho he mea i tēnei olaga. 4Kāfai nā mea vēnei e tutupu, ka kave nei lava e koutou ke fai ki ei he fakaikuga a nā tino e hē i loto o te Ekalehia? 5Koutou te hē mamā! E tatau lava ke iei he tino o koutou e mālamalama, ma ia mafaia oi fai he fakaikuga i he mea e kehekehe ai ni uho Kelihiano. 6Ka ko te mea e iei ai nei, e kave e tētahi Kelihiano tētahi uho Kelihiano ki te fakamahinoga, ma tuku atu ai ki he fakamahino e hē talitonu ki te Atua, ke ia faia te fakaikuga.
7Ko nā tagi a koutou ki te fakamahinoga e mōlia ai e tētahi te tētahi, kua iloa ai lava ko koutou kua matuā fāiaina lava. Heā la te hē keina talia ai nā mea hehē ma tuku ai lava vēia? Heā te hē keina tuku ai vēia ke kaihohoa e iētahi tino nā mea a koutou? 8Ka ko te mea e iei ai, ko koutou lava te faia nā mea hehē e tētahi ki tētahi, ma kaihohoa e tētahi ia mea a tētahi, ke pa lava ki nā mea a iētahi uho Kelihiano! 9E hē koutou iloa ko nā tino āmiokino, e hē mafai ke fai mo kilātou te Mālō o te Atua? Ia koutou la e i na fakahehēa; ko nā tino e faia nā āmio mātagā, te ifo ki tupua, te mulilua, nā tamāloloa e hahau ki nā tino o iētahi tamāloloa, 10te kaihohoa, te manako lahi, nā tino konanā, te faitala fakakino, pe ko nā tino fāomea—e hēai ni tino vēnei e fai mo kilātou te Mālō o te Atua. 11Ko iētahi o koutou nae vēnei. Kae ko koutou kua uma te fakamamāgia mai te agahala; ko koutou kua uma te ofo atu mo te Atua; kua uma te fakalelei o te koutou vā ma te Atua e te Aliki ko Iehu Keliho ma te Agaga o to tātou Atua.
Fakaaogā Outou Tino ke Maua ai he Vīkiga mo te Atua
12 #
1 Kol 10.23
E mafai ke lea vē he tino, “E taga ke fai e au ho he mea.” Io; kae e hē ko mea uma e lelei mo koe. E mafai ke lea au e taga ke fai e au ho he mea, kae e hē fakataga e au ho he mea e fokotahi, ke ia faia au ma ana pologa. 13E mafai ke lea vē he tino, “Ko nā meakai e mo te manava, ma ko te manava e mo nā meakai.” Io; kae e fakaumatia e te Atua nā mea uma iēnei e lua. Ko te tino o te tagata e hē fakaaogā mo nā āmioga mātagā, kae e fakaaogā ke tautua ai ki te Aliki; ma e fōki mai e te Aliki nā mea e tauhi ai te tino. 14Ko te Atua na ia fakatūa te Aliki mai te oti, ma ka ia fakatutūa foki kitātou i tona mana.
15E hē koutou iloa ko outou tino ni itūtino e o te tino o Keliho? Ka kave nei la e au he itūtino o te tino o Keliho ke fai ma itūtino o te tino o he fafine talitāne? E matuā hē mafai lava. 16E hē koutou iloa ko te tamāloa e ia tuku fakatahia tona tino ma te tino o he fafine talitāne, kua kavea ia ma tino e tahi ma te fafine? E vē ona tūhia manino i nā tuhituhiga paia, “Ko nā tino e toka lua ka kavea ma tino e tahi.” #Ken 2.24 17Kae ko ai lava e ia tuku fakatahia tona tino ma te Aliki, ka tahi kilāua ma te Aliki i te faka-te-agaga.
18Kalo kehe mai nā āmioga mātagā. Ko ho hētahi agahala a he tamāloa e fai e hē āfāina ai tona tino; kae ko te tamāloa e faia nā āmioga mātagā, kua agahala ia ki tona lava tino. 19E hē koutou iloa ko outou tino ko te mālumalu ia o te Agaga Paia, e nofo i loto ia te koutou, ma na fōki atu e te Atua kia te koutou? Ko koutou e hē a koutou kae e a te Atua; #1 Kol 3.16; 2 Kol 6.16 20na ia fakataua koutou i he tau. Ko te mea ia, fakaaogā outou tino ke maua ai he vīkiga mo te Atua.
Currently Selected:
1 Kolinito 6: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
