1 Kolinito 3
3
Ko nā Kaukauna a te Atua
1Ko te meamoni, oku uho, e hēki kō mafaia oi tautala atu kia te koutou e vē oi tautala au ki nā tino kua ia te kilātou te Agaga; nae tautala atu au kia te koutou, ko koutou ni tino e o te lalolagi, ni fānau e i loto o te talitonuga faka-Kelihiano. 2Nae fafaga koutou e au i te huāhuhu, kae hē i nā meakai mākeke, auā ko hēki lava hāuni koutou ki ei. Ke pa mai lava nei, ko hēki lava hāuni lava koutou, #Epe 5.12-13 3auā ko koutou koi ola lava e vē oi ola ia tagata o tēnei lalolagi. Kāfai e iei te lotokino ia te koutou ma tauaimiha, e hē ko te fakamāoniga nei tēnā ko koutou e o te lalolagi, ma e fai e koutou nā uiga māhani o tagata? 4Kāfai e lea vē he tino o koutou, “Ko au e mulimuli kia Paulo,” ka ko tētahi e lea vē, “Ko au e mulimuli kia Apolo”—e hē ko nā uiga la iēnā o tagata o te lalolagi?#1 Kol 1.12
5Kae ko ai nei ia Apolo? Ko ai foki ia Paulo? Ko kimātou kua nā ni kaukauna na fakaaogā ke auala mai ai te koutou talitonu. Ko kimātou e gālulue i nā gāluega na tōfia ai kimātou tau toka tahi e te Aliki: 6Na totō e au te fatu, na fakahūhū e Apolo, kae ko te Atua te na fakaola e ia te lākau.#Gāl 18.4-11, 24-28 7Ko te tino na ia totōa ma te tino na ia fakahūhūa e hē tāua. Kae ko te Atua te tāua, auā na fakaola e ia te lākau. 8E hēai he mea e kehe ai te tino e ia totōa ma te tino e ia fakahūhūa; ka fōki e te Atua te taui o te tino e tuha ai ma tana gāluega kua fai. 9Auā ko kimātou ni tino e faigāluega fakatahi mo te Atua, ka ko koutou ko te fātoaga a te Atua.
Ko koutou foki ko te fale o te Atua. 10Ona ko te meālofa na fōki mai e te Atua kia te au, na fai ai e au te gāluega a he tino poto fau fale ma fakatū te fakavae, ma fau fakaopōpo ai e hētahi tino ki luga. Kae ko nā tino tau toka tahi e tatau ke fakaetēte i tana fau fakaopōpo e fai ki ei. 11Auā kua uma te fakatū e te Atua te fakavae e fokotahi, ko Iehu Keliho, ma e hēai he tahi fakavae e mafai ke toe fakatū. 12Ko iētahi tino ka kilātou fakaaogā nā aulo pe ko nā hiliva pe ko nā fatu mānanaia, i te fauga ki luga mai te fakavae; ko iētahi ka kilātou fakaaogā nā lākau pe ko nā mutia mamago, pe ko nā mutia loloa. 13Ma ko te lelei o gāluega a tagata tau toka tahi, ka kitea i te Aho o Keliho. Auā i te Aho tēnā, ko te afi te ka iloa ai ia gāluega a tagata tau toka tahi; ko te afi te ka fuafua ai ma iloa, pe na lelei moni nā gāluega a kitātou na fai. 14Kāfai te mea na fau ki luga o te fakavae e hao mai te afi, ka maua e te faufale he taui. 15Kae kāfai te gāluega e mū uma, ka lahi lele la te gau o te faufale e ui lava ka fakahao ia, e vē he tino na hao mai i loto o he afi.
16E hē koutou iloa ko koutou ko te mālumalu o te Atua, ma ko te Agaga o te Atua e nofo i loto ia te koutou?#1 Kol 6.19; 2 Kol 6.16 17Ka fakaumatia e te Atua te tino e ia fakakinoa tona mālumalu. Auā ko te mālumalu o te Atua e paia, ma ko koutou ko tona mālumalu.
18Ia koutou lele nahe fakahehēagia. Kāfai he tino o koutou e manatu ko ia e poto i nā mea o te lalolagi nei, e tatau i te tino tēnā ke kavea ma vale, kae ke poto moni ai ia. 19Auā ko te poto o te lalolagi ko te valea tēnā i te Atua. E vē oi lea mai te tuhituhiga paia, “E popoki e te Atua nā tino popoto i te māilei a to lātou lava poto”;#Iop 5.13 20ma e lea mai foki vē, “E iloa e te Aliki ko nā manatu o nā tino popoto e hēai he aogā.”#Hal 94.11 21Ko te mea ia e hē tatau ai ke fāfia he tino i nā mea e mafai ke fai e tagata. Ko te meamoni, ko nā mea uma lele e a koutou: 22pe ko Paulo, pe ko Apolo, pe ko Kefa, pe ko te lalolagi nei, pe ko te ola, pe ko te oti, pe ko te taimi nei, pe ko te lumanaki—ko nā mea uma iēnei e a koutou, 23ma ko koutou e a Keliho, ma ko Keliho e a te Atua.
Currently Selected:
1 Kolinito 3: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
