1 Kolinito 2
2
Ko te Fekau e Uiga ki te Keliho na Fakahātaulo
1Oku uho, i toku fanatuga kia te koutou ke fakailoa atu te mealilo moni a te Atua,#2.1 mealilo moni a te Atua ko iētahi tuhituhiga e lea mai takutinoga e uiga ki te Atua e hēki kō fakaaogāgia ni kupu loloa pe he mālamalama lahi. 2Auā ka koi iei au ma koutou, na tonu i toku māfaufau ke tuku iētahi mea kae ke akoako atu oioti e uiga kia Iehu Keliho, kae maihe lava tona mate i luga o te hātaulo. 3Ma i te kāmataga, ko au nae vāivai ma tete i te mataku,#Gāl 18.9 4ma i aku akoakoga ma te tālakiga o te fekau, nae hē kō fakaaogā ni kupu loloto i te poto faka-te-tagata, kae na tuku lava e au ki te Agaga o te Atua ke fakaali tona mana. 5Ko te fakatuatua la o koutou, e hē fakalagolago ki te poto faka-te-tagata, kae e fakalagolago ki te mana o te Atua.
Ko te Poto o te Atua
6Kae e folafola e au he fekau e uiga ki te poto, ki nā tino kua mautū i te faka-te-agaga. E hē ko te poto o te lalolagi nei, pe o nā mālohiaga e pūleagia te lalolagi—nā mālohiaga e fano e uma te lātou pule. 7Ko te poto e folafola e kimātou, ko te poto lilo o te Atua tēia e mumuni mai tagata, kae kua uma te ia filifilia mo to tātou mamalu, ka ko hēki faia te lalolagi. 8E hēai he tupu o tēnei lalolagi na iloagia te poto tēnei. Ka na he mea na kilātou iloa, moinei ake e hēki kilātou fakahātauloa te Aliki mamalu. 9Kae e vē oi lea mai te tuhituhiga paia,#Iha 64.4
“Ko te mea ko heki kitea e he mata,
ko hēki lagona e he taliga,
ma ko hēki tau ki ei he māfaufau,
kua hāunia e te Atua mo kilātou
e alolofa kia te ia.”
10Auā kua fakailoa mai e te Atua tana mealilo kia te kimātou e ala i tona Agaga. Ko te Agaga e hākilikili ki nā mea uma, ke pa lava ki te lolotoga o fuafuaga a te Atua. 11Nā ko o tātou lava agaga i loto o kitātou, te iloagia nā mea uma e uiga kia te kitātou; e vēnā foki lava ona iloa oioti e te Agaga o te Atua, nā mea uma e uiga ki te Atua. 12E hē ko te agaga o te lalolagi te kua kimātou maua; kae ko te Agaga na uga mai e te Atua, kae ke mālamalama ai kimātou i nā mea uma kua fōki mai e te Atua mo kitātou.
13Ko te mea ia, ko kimātou e hē tautatala i ni kupu na akoako e te poto faka-te-tagata, kae tautatala i nā kupu na akoako e te Agaga, i nā taimi e fakamālamalama ai e kimātou nā meamoni faka-te-agaga, ki nā tino kua ia te kilātou te Agaga.#2.13 ki nā tino kua ia te kilātou te Agaga pe i nā kupu e kaumai e te Agaga 14Ko ai lava e hē ia te ia te Agaga, e hē ia maua foki nā meālofa e fōki mai e te Agaga o te Atua. Ko nā tino vēnei e matuā hē mālamalama lava; kia te kilātou e hēai he uiga, auā ko te tāua o nā mea iēnei e mafai oioti ke fuafua i te kikila faka-te-agaga. 15Kae ko ai lava e ia te ia te Agaga, e ia mafaia oi fakamahino ia mea uma, kae e hēai la he tino e mafai e ia ke fakamahino te tino tēnā. 16E vē oi lea mai te tuhituhiga paia,#Iha 40.13 (LXX)
“Ko ai te ia iloa te māfaufau o te Aliki?
Ko ai te ia mafaia oi kavatu kia te ia he fautuaga?”
Kae ko kitātou, kua ia te kitātou te māfaufau o Keliho.
Currently Selected:
1 Kolinito 2: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
