1 Kolinito 15
15
Ko te Toetū o Keliho
1I te taimi nei, e fia fakamanatu atu e au kia te koutou oku uho, te Tala Lelei kua uma te folafola atu e au kia te koutou, tēia kua talia e koutou ma kua mautū ai te koutou fakatuatua. 2Ko tēnā te Tala Lelei, te fekau kua folafola atu e au kia te koutou. Ko koutou e fakaola e te Tala Lelei, pe kāfai koutou e pipiki mau ki ei—vaganā ai la pe kāfai e hēai he uiga o te koutou talitonu.
3Na kō tuku atua kia te koutou te mea na kō maua, ko te mea ia e pito hili te tāua; ko Keliho na oti mo a tātou agahala, e vē oi tūhia i nā Tuhituhiga Paia; #Iha 53.5-12 4na tanu, ma toe fakatū mai ai i te oti i te tolu o aho, e vē ona tūhia i nā Tuhituhiga Paia; #Hal 16.8-10; Mat 12.40; Gāl 2.24-32 5na fakakitea ia kia Petelu#15.5 I te gagana Eleni Kefa ma vēnā ki te kau apohitolo e toka hefulu lua. #Mat 28.16-17; Mlk 16.14; Luk 24.34, 36; Ioa 20.19 6Oi na fakakitea ai i te taimi lava tēnā, ki nā tino e toka lima helau ma ona tupu nae mulimuli kia te ia, ko te tokalahiga o kilātou iēnei koi ola mai, e ui kua feoti iētahi. 7Oi na fakakitea ai ia kia Iakopo, ma mulimuli ake, na fakakitea ai foki ki te kau apohitolo uma.
8Kae mulimuli ake, na fakakitea mai ai ia kia te au—e ui lava ko au e vē he tino na fānau mai i he taimi hehē.#Gāl 9.3-6 9Auā ko au te pito fakatauvā i nā apohitolo uma—e hē aogā foki au ke takua he apohitolo, auā ko au nae fakahāuā ki te Ekalehia a te Atua.#Gāl 8.3 10Kae ko te alofa tūnoa o te Atua kua kavea ai au ke vēnei, ma ko tona alofa tūnoa kia te au e hēki māumau. Kua hili atu toku galue mālohi i lo hētahi o te kau apohitolo, e ui lava e hē ona ko he mea na kō faia, kae ko te alofa tūnoa o te Atua e galue ma au. 11Ko te mea ia, pe na fanatu ia te au pe na hau ia te kilātou, ko te mea tēnei e folafola e kimātou uma, ma ko te mea ia e talitonu koutou ki ei.
Ko te Toe Tutū o ki Tātou mai te Oti
12Kāfai e folafola e kimātou ko Keliho kua toe fakatū mai i te oti, e vēhea la oi lea iētahi o koutou ko nā tino kua oti ka hē toe tutū mai te oti? 13Kae kāfai e hēai he toetū, ko tona uiga ko Keliho e hēki toe fakatūa mai i te oti; 14ma kāfai ia Keliho e hēki toe fakatūa mai te oti, ko tona uiga e hēai he aogā o te tālakiga a kimātou, ma e hēai he mea e talitonu koutou ki ei. 15Kae hili atu ai la, ka kavea kimātou ma tagata faitala pepelo e uiga ki te Atua, auā kimātou na lea na ia fakatūa ia Keliho mai te oti—ma kāfai e hako ko nā tinooti e hē toe fakatutūa mai te oti, ko tona uiga e hēki fakatūa e ia ia Keliho mai te oti. 16Auā kāfai nā tinooti e hē fakatutūa, e hēki fakatūa foki la ia Keliho. 17Ma kāfai ia Keliho e hēki fakatūa, tona uiga ko te koutou fakatuatua e māumau ma ko koutou koi nonofo lava i te agahala. 18Ko tona uiga foki la, ko nā tino kua feoti kae nae mulimuli kia Keliho, kua mālaia. 19Kāfai ko to tātou fakamoemoe kia Keliho e lelei oioti mo te olaga tēnei, ko tona uiga ka hili atu te fakaalofa o te tūlaga e iei kitātou i lo iētahi tino uma i te lalolagi.
20Kae ko te meamoni, ko Keliho kua toe fakatū mai te oti, ko te tino muamua ia kua pa ki he mea vēnei, ke fai ma fakamāoniga kia te kilātou kua momoe atu, ko kilātou ka toe fakatutū mai te oti. 21Auā e vē ona maua te oti e ala i he tagata, e vēnā foki ona maua te toetū e ala i he tagata. 22Auā e vē ona pa ia tagata uma ki te oti ona ko to lātou hokotaga ma Atamu, ka vēnā foki lava ona toe fakatutū ia tagata uma ki te ola ona ko te lātou māfutaga ma Keliho. 23Kae ko tagata tau toka tahi ka fakatutū i he fakahologa e tūlaga tatau: E muamua lava ia Keliho, ma i te taimi e toe haele mai ai, oi hohoko ai ki ei ia tagata o te Atua. 24Oi ka pa mai ai te ikuga; ka fakatōkilalogia e Keliho ia tupu faka-te-agaga uma, ia taupulega ma mālohiaga uma, ma ka tuku atu e ia te Mālō ki te Atua te Tamana. 25Auā ko Keliho e tatau ke pule pea ke pa ki te taimi e fakatōkilalo ai e te Atua ona fili uma, ma tuku atu ai kilātou ki lalo o ona vae.#Hal 110.1 26Ko te fili mulimuli ka fakatōkilalo, ko te oti. 27Auā e lea mai te tuhituhiga paia, “Kua tuku e te Atua nā mea uma ki lalo o ona vae.” E manino lele la ko te fakakupuga, “mea uma” e hē aofia ai te Atua e ia tukua nā mea uma ki lalo o te pule a Keliho. #Hal 8.6 28Kae kāfai nā mea uma lele kua uma te tuku ki lalo o te pule a Keliho, oi ka tuku atu ai ia, te Ataliki, e ia lava ki lalo o te pule a te Atua, tē na ia tukuagia ia mea uma ki lalo o tona Ataliki; ma ka pule ai te Atua ki nā mea uma.
29E vē la ki nā tino e kilātou papatihoa nā tino kua oti. Heā te fofou kilātou ke kilātou maua? Kāfai e hako, e vē oi lea iētahi ko nā tino kua oti e hē toe fakatutūa ki te ola, heā la te papatiho ai nā tino kua oti? 30Kae ko kitātou la—heā te ka tuku ai pea o tātou ola ke lamatia i taimi uma? 31Te kau uho, ko toku ola e lamatia pea lava i aho uma! Ko toku mitamita ona ko koutou i te māfutaga ma Keliho Iehu to tātou Aliki, kua mafai ai au ke lea vēnei atu. 32Kāfai au na tau ma “manu fekai” i Efeho ona ni manatu faka-te-tagata, heā nei ta āku na maua ai? Kae kāfai nā tinooti e hē toe fakatutūa ki te ola, oi ka vē ai la ko te fakakupuga māhani, “Keina tātou kakai ma inu, auā tāeao ko kitātou ka mamate.”#Iha 22.13
33Ia koutou nahe fakahehēa lele. “Ko te fakapipiki ki nā tino kino e fakahēaogā ai te lelei o te āmio.” 34Toe tukutuku tonu lelei outou māfaufau, ma ke nahe toe faia e koutou te agahala. Auā e iei nā tino o koutou e hē kilātou iloa te Atua. Ko au e lea vēnei atu kae ke lagona ai e koutou te māhiahi.
Ko te Tino o te Tagata kāfai e Toetū mai te Oti
35E ono fehili vē he tino, “E vēhea oi toe fakatutū nā tino mai te oti? Ni itūkāiga tino vēhea to kilātou te ka iei?” 36Ko koe te fāvalevalea! Kāfai e totō e koe he fatu lākau i te kelekele, e hē mafai ke ola ake heiloga kua mate. 37Ma ko te mea e totō e koe ko te fatu oioti, pe he fatu haito pe hētahi lava fatu lākau, kae e hē ko te tino tēia e ola ake mulimuli ma tupu ki luga. 38E fōki e te Atua ki te fatu lākau tēnā te tino e fofou ia ki ei; ma e fōki e ia ki nā fatu lākau takitahi uma o lātou lava tino.
39Ma ko te kakano o nā mea uma e iei te ola, e hē tutuha; ko nā tinoola e iei tētahi o itūkāiga, ko nā manuvaefa e iei tētahi, ko nā manulele e iei tētahi, ma nā ika e iei tētahi.
40Ma e iei nā tino o nā mea uma i te vāteatea ma nā tino o nā mea uma i te lalolagi; ko te mānanaia o nā tino o nā mea i te vāteatea e kehekehe ma te mānanaia o nā tino o nā mea i te lalolagi. 41Ko te lā, e kehe lava tona ia mānaia, e kehe foki te mānaia o te māhina, ma kehe te mānanaia o nā fetū; ma e pa foki lava ki nā fetū, e iei nā itūkāiga mānanaia e kehekehe ai.
42E vēnei la te mea ka pa ki ei, kāfai nā tino kua oti e toe tutū mai i te oti. Kāfai te tino e tanu, e fano e pala, kāfai e toe fakatū mai i te oti, e hē toe pala. 43Kāfai e tanu, e mātagā ma vāivai; kāfai e toe fakatū mai i te oti, ka mānaia ma mālohi. 44Kāfai e tanu, ko he tino faka-te-tagata tēnā; kāfai e toe fakatū mai i te oti, ka kavea ma tino faka-te-agaga. Kāfai e iei he tino faka-te-tagata, e tatau foki ke iei he tino faka-te-agaga. 45Auā e tūhia i te tuhituhiga paia, “Ko te uluaki tagata, ia Atamu, na gaohia ma tagataola”; ka ko te Atamu mulimuli, ko te Agaga e puna mai ai te ola.#Ken 2.7 46E hē ko te faka-te-agaga te hau muamua, kae ko te faka-te-tagata, oi hau ai loa te faka-te-agaga. 47Ko te uluaki Atamu na gaohia i te kelekele, na hau mai te kelekele; ko te lua o Atamu na fanaifo mai te lagi. 48Ko kilātou e ō te kelekele e vē ko te tino na gaohia i te kelekele; ko kilātou e ō te lagi e vē ko te tino na fanaifo mai te lagi. 49E vē ona fōliga kitātou ki te tino na gaohia i te kelekele, ke vēnā foki ona fōliga kitātou ki tē na fanaifo mai te lagi.
50Ko te uiga o taku lea atu, te kau uho, ko te mea e gaohia i te kakano ma te toto, e hēai hona inati i loto o te Mālō o te Atua, ma ko te mea e fano e pala, e hē mafai ke hē pala.
51-52Fakalogo ki te mealilo tēnei: ko kitātou uma e hē feoti, kae kāfai te toe pu e ili, ko kitātou uma ka huia i he taimi vave lele, e vave e vē ko te kemo o te mata. Auā kāfai te pu e ili, ko nā tino kua oti ka toe fakatutū, ma hē toe oti lele, ma ka huia uma kitātou.#1 Teh 4.15-17 53Auā ko te mea e fano e pala e tatau ke hui ki he mea e hē mafai ke pala; ko te mea e fano e oti e tatau ke hui ki he mea e hē mafai ke oti. 54Kāfai la te mea tēnei e tupu, ma kua huia te mea e fano e pala ki te mea e hē mafai ke pala, oi ka taunuku ai te kupu i te tuhituhiga paia e leamai: “Ko te oti kua fakatāugā; ko te manumālō kua kātoatoa!”#Iha 25.8
55“Te oti e, tēfea tō manumālō?
Te tugamau e, tēfea tō tui?”#Hoh 13.14 (LXX)
56Ko te mālohi o te oti e fakaogohia ai, e maua mai i te agahala; ko te mālohi o te agahala e maua mai i te Tūlāfono. 57Kae fakafetai ki te Atua, na ia tuku maia te manumālō e ala i to tātou Aliki ko Iehu Keliho!
58Ko te mea la ia, te kau uho pele, ke mau autou tutū ma ke nahe māluelue. Gālulue pea i autou gāluega mo te Aliki, auā tēnā kua koutou iloa e hēai he mea e koutou faia e tautua ai ki te gāluega a te Aliki, e hēai hona aogā.
Currently Selected:
1 Kolinito 15: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
