1 Kolinito 16
16
Fehoahoani Tupe mo Tagata Mātitiva o te Atua
1E vē la ki te mea na tuhi mai ai koutou ki he tupe ke hakili ke fehoahoani ki tagata o te Atua i Iutea: e tatau ke koutou faia te mea na fakatonu e au ki nā Ekalehia i Kalatia ke fai. #Lom 15.25-26 2I nā Aho Hā takitahi uma, e tatau ke tuku kehe e koutou tau toka tahi he tupe, e fua lava ki te tupe a te tino e maua, ma fakaputu, kae ke nahe toe tau aoa ai ni tupe kāfai au e pa atu. 3Ma kāfai au e pa atu, ka uga e au nā tino kua koutou filifilia ma he tuhi fakamāonia, ke kave tautou meālofa ki Ieluhalema. 4Kāfai e iei he kikilaga ko au e tatau ke fano, oi kua olo fakatahi ai kimātou.
Nā Fuafuaga a Paulo
5Ko au ka fanatu oi āhiahi atu kia te koutou kāfai e uma taku malaga ki Maketonia, auā ko au e tatau ke kui atu muamua i loto o Maketonia.#Gāl 19.21 6Hōvē pe i na nonofo kitātou mo he vāitaimi, pe ko te tau mālūlū kātoa, kae ke mafai ke fehoahoani mai koutou kia te au oi fakaauau taku malaga, pe ko fea lava hētahi mea ka fano au ki ei. 7Ko au e hē fofou ke māfuta ma koutou mo he taimi pukupuku; ko au e fofou ke mataloa he taimi e māfuta ai au ma koutou, kāfai e finagalo ki ei te Aliki.
8Ko au ka nofo i kinei i Efeho ke pa ki te aho Penitekoho. #Lev 23.15-21; Teu 16.9-11 #Gāl 19.8-10 9E iei te avanoa tāua i kinei ke fai ai ni aku gāluega aogā, e ui lava e tokalahi nā tino e teteke mai kia te au.
10Kāfai ia Timoteo e fanatu ki kinā, kikila lelei ifo ki ei ke nahe iei he mea e fakapopolegia ai, auā ko he tino e galue mo te Aliki, e vē foki lava ko au. #1 Kol 4.17 11Nahe tino lele e faikino ki ei, kae e tatau ke fehoahoani koutou ki ei oi fakaauau tana malaga i te fīlēmū, kae ke toe foki mai ai kia te au; auā ko au e fakatalitali atu ke toe ōmamai ma iētahi uho Kelihiano.
12Kae e vē la ki to tātou uho ko Apolo, e lahi nā taimi nae fakamālohi ai au ki ei ma iētahi uho Kelihiano, ke āhiahi atu kia te koutou, kae e hē talitonu#16.12 hē talitonu pe e hē ko te finagalo o te Atua ko te taimi tēnei e tatau ke fanatu ai ia. Kae kāfai loa e maua he avanoa, oi kua fanatu ai.
Ko nā toe Kupu
13Koutou ke mataala, tūmau i te fakatuatua, loto tetele ma fakamākekeke. 14Fai autou gāluega uma i te alofa.
15E iloa e koutou ia Hetefana ma tona kāiga; ko kilātou nā tino muamua na liliu ma Kelihiano i Akaia, ma kua ofo atu kilātou ke tautua ki tagata o te Atua. Ko au e fakamālohi atu kia te koutou te kau uho, #1 Kol 1.16 16koutou ke mulimuli ki te takitakiga a nā tino vēnei, ma ho hētahi tino e gālulue fakatahi ma kilātou.
17Ko au na fiafia lele i te ōmamaiga o Hetefana, Fotunato ma Akaiko, auā i to lātou i kineiga, kua vē ai lava ko koutou foki e i kinei, 18ma kua kilātou fakafiafiagia au, e vē foki lava ona kilātou fakafiafiagia koutou. Ko nā tino vēnei e tatau ke amanakia lelei e koutou.
19E momoli atu nā fakamanuiaga mai nā Ekalehia i te itūmālō o Ahia mo koutou; ko Akula ma Pihila ma te Ekalehia e fai a lātou māfutaga i to lā fale, e momoli atu a lātou fakamanuiaga lahi i te igoa o te Aliki. #Gāl 18.2 20E momoli atu nā alofaaga mai te kau uho Kelihiano uma i kinei.
Fakafeiloaki tētahi e tētahi i te feāhogi o te fīlēmū.
21I toku lima e tuhi ai e au te mea tēnei: Alofaaga mai ia Paulo.
22Ko te tino e hē alofa ki te Aliki—ke fakamālaiagia ia!
Marana tha—To mātou Aliki, haele mai!
23Ke ia te koutou te alofa tūnoa o te Aliki ko Iehu.
24Ko toku alofa e ia te koutou uma e ala ia Keliho Iehu. Amene.
Currently Selected:
1 Kolinito 16: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
