1 Kolinito 14
14
Ko Iētahi Meālofa mai te Agaga
1Ko te alofa la te tatau ke tauhiniō koutou ki ei. Ke naunau outou loto ki nā meālofa faka-te-agaga, kae maihe lava te meālofa tau ki te folafolaga o te fekau mai te Atua. 2Ko nā tino e tautatala i nā gagana kehekehe, e hē tautatala ki iētahi tino kae e tautatala ki te Atua, auā e hēai he tino e mālamalama ia te kilātou. E tautatala i nā meamoni fakalilolilo i te mana o te Agaga. 3Kae ko nā tino e folafola e kilātou te fekau mai te Atua, e tautatala ki tagata i nā kupu e maua ai e tagata ni fehoahoaniga, ni fakamālohiga, ma ni fakamāfanafanaga. 4Ko nā tino e tautatala i nā gagana kehekehe, e fehoahoani oioti kia te kilātou lava, ka ko nā tino e folafola e kilātou te fekau mai te Atua, e fehoahoani ki te Ekalehia kātoa.
5Ko au e fofou ko koutou uma ke tautatala i nā gagana kehekehe; kae e hili atu toku fofou ke ia te koutou te meālofa ko te folafolaga o te fekau mai te Atua. Auā ko te tino e folafola e ia te fekau mai te Atua, e hili atu tona tāua i lo te tino e tautala i nā gagana kehekehe—vaganā ai la e iei he tino i kinā i te taimi tēnā, e ia mafaia oi fakamatala, kae ke mālamalama ai te Ekalehia kātoa. 6Kāfai la au e fanatu kia te koutou te kau uho, heā toku aogā kia te koutou pe kāfai au e tautala i nā gagana kehekehe? E hēai lele he aogā, vaganā ai e kō kavatua kia te koutou ni fakaaliga, pe ni itūkāiga mālamalama, pe ni fekau mai te Atua, pe ni akoakoga.
7E hē kehe te mea tēnei ma nā lākau faipehe e hēai ni ola, e vē ko te fagufagu pe ko te kītala—e vēhea ona iloa e he tino te fati o te pehe e ta, pe kāfai e hē manino lelei te tagi o nā nota? 8Ma kāfai te tino e ia ilia te pu e logo ai te taua e hē ia fakamaninoa leleia te tagi o te pu, ko ai te ka hāuni mo te taua? 9E vēnā foki lava oi hē mālamalama he tino i te mea e lea ai koe, kāfai e hē manino te fekau e tautala ai koe i nā gagana kehekehe. Ko au kupu ka mou ki te ea! 10E lahi lele ia gagana kehekehe i te lalolagi, ma e hēai he gagana e fokotahi e hēai hona uiga. 11Kae kāfai au e hē mālamalama i te gagana e fakaaogā, ko nā tino e tautatala ai ka vē ni tagata nukukehe i taku kikila, ma ka kavea au e vē he tagata nukukehe i te lātou kikila. 12Ona ko koutou e naunau ke koutou maua nā meālofa mai te Agaga, e tatau ai koutou ke taumafai ke fakaaogā lahi atu kilātou iēia e fehoahoani ki te atiakega o te Ekalehia.
13Ko te tino la e tautala i nā gagana kehekehe, e tatau ke tatalo mo te mana ke fakamatala ai nā kupu e tautala ai ia. 14Auā kāfai au e tatalo i te auala tēnei, ko toku agaga e tatalo, kae ko toku māfaufau e hē iei. 15Heā la te tatau ke kō faia? Ka tatalo nei au i toku agaga ma tatalo foki i toku māfaufau; ka pehe nei au i toku agaga, ma ka pehe foki i toku māfaufau. 16Kāfai koe e fakafetai ki te Atua i te agaga oioti, e vēhea la ona lea he tino kehe e iei fakatahi i te māfutaga, “Amene” i te fakaikuga o tau tatalo fakafetai, kāfai e hē mālamalama i au kupu e tautala ai koe? 17E tuha lava pe heā te lelei o tau tatalo fakafetai ki te Atua, kae e hēai lele he fehoahoani e maua e iētahi tino.
18E fakafetai au ki te Atua ona e hili atu toku tautala ho i nā gagana kehekehe, i lo ho he tino o koutou. 19Kae i nā faigālotu, e hili atu toku tautala i ni kupu e lima e mafai ke mālamalama ai, kae ke akoako ai iētahi tino, i lo toku tautala i ni kupu e hefulu afe i he gagana kehe.
20Te kau uho, koutou nahe vē ni tamaiti i nā manatu o koutou; koutou ke vē ni pepe e tuha ai ma nā mea e kino, kae ke vē ni tino mātutua e tuha ai ma nā manatu o koutou. 21I nā Tuhituhiga Paia, e tūhia vēia,
“E ala i tagata e tautatala i gagana kehekehe
ka tautala ai au ki oku tagata, kua vāgana ai te Aliki.
Ka tautala au e ala i laugutu o tagata nukukehe,
kae ui i tēnā, ka hē fakalogo mai lava
oku tagata kia te au.”#Iha 28.11-12
22Ko te mea ia, ko te meālofa ko te tautala i nā gagana kehekehe, ko he fakamāoniga tēnā mo tagata e hē talitonu, kae e hē mo tagata e talitonu; ma ko te meālofa ko te folafolaga o te fekau a te Atua, ko he fakamāoniga tēnā mo tagata e talitonu, kae e hē mo tagata e hē talitonu.
23Kāfai la te Ekalehia kātoa e māopōpo fakatahi ma kāmata oi tautatala ia tagata tau toka tahi i nā gagana kehekehe—ma kāfai ni tino kehe pe ni tino hē talitonu e ōmamai ki loto, e i na hē lea nei ko koutou e vālelea? 24Kae kāfai e folafola e kilātou te fekau a te Atua kae ōmamai ni tino kehe ki loto, ka mautinoa lelei e kilātou a lātou agahala, e ala i nā mea kua fakalogo ki ei. Ka fakamahino kilātou i nā mea uma lele e fakalogo kilātou ki ei, 25ka kaumai ki fafo mai o lātou loto, o lātou mānatunatuga lilo, ma ka fakapakukū ki o lātou tulivae ma ifo atu ki te Atua ma te lātou takutinoga, “E moni lava ko te Atua e i kinei fakatahi ma koutou!”
Ko nā Tāpuakiga e Tatau ke Fakatūlaga Tonu
26Ko tēnei te uiga o taku lea atu, te kau uho. Kāfai koutou e māfuta mo nā tāpuakiga a koutou, e pehe tētahi, e akoako tētahi, e fakamatala e tētahi he fakaaliga mai te Atua, e folafola e tētahi he fekau i nā gagana kehekehe, ma tētahi la e fakamatala e ia te uiga o nā kupu e tautatala ai. Ko nā mea uma e tatau ke fai mo te atiakega o te Ekalehia. 27Kāfai he tino e tautala i nā gagana kehekehe, e tatau ke iei ni tino e toka lua pe toka tolu kae hē hili atu ki luga, ke tautatala fakaholo takitahi, ma iei he tino e ia fakamatalagia te uiga o nā kupu e tautatala ai. 28Kae kāfai e hēai he tino ke ia fakamatalagia, e tatau la te tino e tautala i nā gagana kehekehe ke nahe piha i loto o te tāpuakiga, ma ke tautala oioti kia te ia lava ma ki te Atua. 29E tatau ke tautatala he toka lua pe he toka tolu kua fōki ki ei te fekau a te Atua, kae fuafua tatau e iētahi tino nā mea e lea ai kilātou. 30Kae kāfai he tino i loto o he tāpuakiga e ia maua he fekau mai te Atua, e tatau ke tāofi loa lava te tino e tautala. 31Auā e mafai e koutou uma oi folafola te fekau a te Atua fakaholoholo tau toka tahi, kae ke iloa uma ai e koutou ma fakamākekeke ai. 32Ko te meālofa ko te folafolaga o te fekau a te Atua, e tatau ke i lalo o te kikilaga a te tino e ia folafolagia, 33auā e hē fofou te Atua ko kitātou ke i he tūlaga fakahētonu, kae e fofou ke maua e kitātou te fealofani ma te fīlēmū.
E vē ko te tūlaga e iei nā Ekalehia uma a tagata o te Atua, 34e tatau ia fafine ke nonofo fīlēmū nahe kīkī i nā tāpuakiga. E fakahā kilātou oi tautatala; e vē oi lea mai te Tūlāfono Iutaia, e hē tatau ke kavea kilātou ma takitaki. 35Kāfai e fia mālamalama kilātou i he mea, e tatau ke fehili kia lātou tāne i te fale. Ko he mea mātagā he fafine ke tautala i loto o he māfutaga a te Ekalehia.
36Ko te kupu a te Atua e hēki kui mai ia te koutou, ma e hē nā ko koutou oioti nā tino na kaumai ki ei. 37Kāfai he tino e manatu ko ia ko he pelofeta, pe kua ia te ia he meālofa faka-te-agaga, e tatau ke ia hāfia ko te mea e tuhi atu ai au, he fakatonuga e a te Aliki. 38Kae kāfai e hē talia e ia te mea tēnei, e hē tatau foki la ke talia e koutou te tino tēnā.
39Ko te mea ia te kau uho, ke naunau outou loto ki te folafolaga o te fekau a te Atua, kae nahe fakahā te tautala i nā gagana kehekehe. 40Ko nā mea uma e tatau ke fai i he auala e talafeagai ma tūlaga tonu.
Currently Selected:
1 Kolinito 14: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
