1 Kolinito 13
13
Ko te Alofa
1Kāfai au e tautala i nā gagana a tagataola ma āgelu—kae e hē ia te au te alofa, ko taku lāuga e hēai he mea e kehe ai ma te pākēkē o he lali, pe ko te tagitagi o he logo. 2Kāfai e ia te au te mana ke folafola ai te fekau a te Atua; kāfai e ia te au te poto uma lele ma te mālamalama i nā mealilo uma; kāfai e ia te au te fakatuatua e mafai ai ke fakagaoi ia mauga—kae e hē ia te au te alofa, e hēai lele hoku aogā.#Mat 17.20; 21.21; Mlk 11.23 3Kāfai e fōki e au aku mea uma mā iētahi tino, ma tuku atu e au toku tino ke huhunu#13.3 ke huhunu ko iētahi tuhituhiga e fakaopōpo ki ei te kae ke fāfia ai au—kae hē ia te au te alofa, e hēai he aogā o iēnei mea mo oku.
4Ko te alofa e onohai ma agalelei; e hē fuā pe fakamaualuga pe fāfia; 5ko te alofa e hē āmio kino pe fakapito pe fakafiufiu; ko te alofa e hē ia mātaua nā mea hehē a iētahi tino; 6ko te alofa e hē fiafia ki te kino, kae fiafia ki te meamoni. 7Ko te alofa e hē fiu gōfie; ma e hē uma lele tona fakatuatua, tona fakamoemoe, ma tona onohai.
8Ko te alofa e fakavavau. E iei te mana e folafola ai te fekau mai te Atua, kae e hē tūmau; e iei te mana e tautatala ai i nā gagana kehekehe, kae e fano e uma; e iei te mālamalama, kae e fano e mavae. 9Auā ko te mālamalama o kitātou, ma te mana e kitātou folafola ai te fekau mai te Atua, e hē kātoatoa; 10kae kāfai tē e kātoatoa te lelei e hau, oi ka kave kehea ai loa te mea e hē kātoatoa.
11Ka koi tamaiti au, ko taku tautala, ko oku lagona, ma oku manatu nae vē e o he tamaiti; nei ko au kua matua, kua hē toe kō fakaaogāgia oku uiga fakatamaiti. 12Ko te mea e kitea e kitātou i te taimi nei, e vē he ata nenefu i loto o he fakaata; kae i he taimi mulimuli, oi kitātou kitea lelei ai i te fakafehāgai ma ia. Ko te mea e iloa e au i te taimi nei e hē kātoatoa; oi ka kātoatoa ai—e vē ko te kātoatoa o te iloa e te Atua e uiga kia te au.
13Ko nā mea la iēnei e tolu e tūmau: ko te fakatuatua, ko te fakamoemoe ma te alofa; kae ko te mea e hili i nā mea iēnei, ko te alofa.
Currently Selected:
1 Kolinito 13: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
