1 Kolinito 12
12
Nā Meālofa mai te Agaga Paia
1E tuha ai ma te mea na tuhi mai ai koutou e uiga kinā meālofa mai te Agaga Paia.
Te kau uho, ko au e fofou ke iloa e koutou te meamoni e uiga kinā mea iēnei. 2E vē ona koutou iloa i te taimi ka koi fakapaupau ai koutou, ko koutou nae fakahehē i nā itū e lahi, e ala i te koutou ifo ki nā tupua e hēai ni ola. 3Ko te mea ia, ko au e fofou ke koutou iloa, e hēai he tino e takitakia e te Agaga o te Atua e mafai ke “fetuku e ia ia Iehu!” ma e hēai he tino e ia mafai oi folafola “Ko Iehu ko te Aliki,” pe kāfai e hē takitakiagia ia e te Agaga Paia.
4E iei nā itūkāiga meālofa faka-te-agaga kehekehe, kae ko te Agaga lava e fokotahi te maua mai ai.#Lom 12.6-8 5E iei nā itūkāiga auala kehekehe e tautua ai, kae ko te Aliki lava e fokotahi te tautua ki ei. 6E iei nā itūkāiga mālamalama kehekehe e fakatino ai nā tautuaga, kae ko te Atua lava e fokotahi te maua ai te mālamalama e tagata uma, mo a lātou gāluega e tautua ai. 7Ko te fakatahi mai o te Agaga, i hētahi itū, e kitea e ala i tagata tau toka tahi, mo te lelei o tagata uma. 8E fōki e te Agaga ki tētahi tino te iloa ke tautala ai i te poto, kae ki tētahi tino, e fōki ki ei e te Agaga lava e fokotahi, te iloa ke tautala ai i te mālamalama. 9Ko te Agaga foki lava tēnei e fokotahi te ia fōkia te fakatuatua ki tētahi tino, kae ki tētahi, e ia fōkia ki ei te mana ke fakamālōlō ai nā tauale. 10E fōki e te Agaga ki tētahi tino te mana ke fai ai nā vāvega; ki tētahi te folafolaga o te fekau a te Atua; ma ki tētahi te mālamalama e ia iloa ai te kehekehega o nā meālofa e kaumai e te Agaga, ma nā meālofa e hē mai ia te ia. Ki tētahi tino e fōki ki ei te poto ke tautala ai i nā gagana kehekehe, ma ki tētahi, e fōki ki ei te poto ke fakamatala ai nā mea e tautala ai. 11Kae ko te Agaga lava e fokotahi te ia faia nā mea uma iēnei; i tana lava filifiliga, e ia fōkia ai nā meālofa kehekehe ki tagata tau tokatahi.
E Fokotahi te Tino kae Lahi Ona Vāega
12Ko te tino o Keliho e lahi ona vāega, e vē foki lava ko te tino o ho hētahi.#Lom 12.4-5 13E vēnā foki la kitātou uma, pe ko kitātou ni tagata Iutaia pe ni tagata nukukehe, pe ni pologa pe ni tagata haoloto; ko kitātou uma kua papatiho e te Agaga e fokotahi, ki loto o te tino e fokotahi, ma kua tuku e te Atua te Agaga tēnei e fokotahi, ki loto o nā loto o kitātou uma lele.
14Auā ko te tino o te tagata e hē fokotahi kae lahi ona itūtino. 15Kāfai te vae e lea, “Ona ko au e hē ko he lima, oi ko au e hē o te tino,” e hē mafai ke hē kavea ai te tapuvae ko he itūtino e o te tino. 16Ma kāfai te taliga e lea, “Ona ko au e hē ko he mata, oi ko au e hē o te tino,” e hē mafai ke hē kavea ai te taliga ko he itūtino e o te tino. 17Kāfai te tino kātoa kua nā ko he mata, e vēhea la ona lagona e ia? Ma kāfai kua nā ko he taliga, e vēhea la ona hogitia e ia? 18Kae ko te mea e iei, nā tuku lava e te Atua nā itūtino kehekehe o te tino ki te mea na fofou ia ki ei. 19E hē mafai ke iei he tino kāfai e fokotahi oioti lava tona itūtino! 20Kae ko te mea e iei, e lahi nā itūtino kae fokotahi te tino.
21Ko te mea ia, e hē mafai te mata ke lea ki te lima, “E hē ko manakomia koe!” E hē mafai foki te ulu ke lea ki te vae, “E hē ko manakomia koe!” 22Ko te meamoni, e hē mafai kitātou ke ola e aunoa ma nā itūtino o te tino e vē e hili te vāivai i te tātou kikila; 23ma ko nā itūtino e manatu kitātou e hē tāua lahi, ko nā itūtino ia e lahi atu to tātou taimi e fano ki ei i te tauhiga fakalelei; kae ko nā itūtino e mātagā i te kikila, e fai ki ei nā tauhiga fakapitoa ma te fakaaloalo; 24ni faiga e hē manakomia e nā itūtino e hili atu te mānanaia. Ko te Atua lava te na ia tuku fakatahia te tino, i he faiga ke ātili lahi ai ni vīkiga mo nā itūtino e tatau ke maua e kilātou. 25E hē tatau la ke iei he fevaevaeakiga i te tino, kae ko nā itūtino kehekehe uma o ia, e tatau ke tutuha te loto tuahā o tētahi ki tētahi. 26Kāfai he itūtino e fokotahi o te tino e āfāina, ko iētahi itūtino uma o te tino e āfāina fakatahi ma ia; kāfai he itūtino e vīkia, ko iētahi itūtino uma e vīkia fakatahi ma ia.
27Ko koutou uma ko te tino o Keliho, ma ko koutou tau toka tahi ni itūtino e o ia. 28Kua tōfia e te Atua i loto o te Ekalehia: muamua ko nā apohitolo, lua ko nā pelofeta, ma tona tolu ko nā faiākoga; oi hohoko ai nā tino fai vāvega, hohoko ai kilātou kua tuku ki ei te mana ke fakamālōlō ai nā tauale, pe ke fehoahoani ai ki iētahi tino, pe ke fakatonu ai kilātou, pe ke tautatala ai i nā gagana kehekehe.#Efe 4.11 29E hē ko kilātou uma ni apohitolo pe ni pelofeta pe ni faiākoga. E hē ko tagata uma e ia te kilātou te mana ke fai ai ni vāvega, 30pe ke fakamālōlō ai ni tauale, pe ke tautatala ai i ni gagana kehekehe, pe ke fakamatala ai ni mea kua uma te tautatala ai. 31Ko te mea ia, ke naunau outou loto ki nā meālofa e hili atu te tāua.
Ko te mea e pito hili te lelei, ka fakahino atu e au i te auala tēnei.
Currently Selected:
1 Kolinito 12: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
