1 Kolinito 11
11
1Fakatakitaki mai la kia te au, e vē oi fakatakitaki au kia Keliho.#1 Kol 4.16; Fil 3.17
Nā Tūlāfono mo nā Tāpuakiga
2Ko au e fakamālō atu kia te koutou auā e koutou manatua pea lava au ma tauhi ki aku akoakoga na tuku atu kia te koutou. 3Kae ko au e fofou ke koutou manatua ko te ulu o ho he tino ko Keliho, ko te ulu o he fafine ko tana tāne, ma ko te ulu o Keliho ko te Atua. 4Ko te mea ia, ho he tamāloa e tatalo pe ia folafolagia te fekau a te Atua i he tāpuakiga kae tatao tona ulu, kua ia takuvaleagia tona ulu, ko Keliho tēnā. 5Ma ho he fafine e tatalo pe ia folafolagia te fekau a te Atua i he tāpuakiga kae hē tataoa tona ulu, kua takuvalea e ia tona ulu, ko tana tāne tēnā; e hēai he mea e kehe ai ia ma he fafine kua tafi tula tona ulu. 6Kāfai he fafine e hē tataoa tona ulu, e tatau la ke tipi tona lāulu. Ona ko he mea e takuvalea ai kāfai he fafine e tafi tula tona ulu pe tipi tona lāulu, e tatau ai la ke tatao tona ulu. 7Ko te tamāloa e hē tatau ke tatao tona ulu, ona ko ia te kitea ai ia fōliga ma te mamalu o te Atua. Kae ko te fafine e kitea ai te mamalu o te tamāloa; #Ken 1.26-27 8auā ko te tagata e hēki gaohia mai te fafine, kae ko te fafine mai te tagata.#Ken 2.18-23 9E hēki gaohia foki te tagata ona ko te fafine, kae ko te fafine na gaohia ona ko te tagata. 10Ona la ko te kau āgelu, e tatau ai te fafine ke tatao tona ulu, ke iloa ai ko ia ei lalo o te pule a tana tāne. 11Kae i to tātou olaga i te Aliki, ko te fafine e hē tūtokatahi mai te tagata, e hē tūtokatahi foki te tagata mai te fafine. 12Auā e vē ona gaohia te fafine mai te tagata, e vēnā foki ona fānau mai te tagata i te fafine; ma ko te Atua te na ia faia ia mea uma.
13Fuafua ake la e koutou; e tūlaga tatau ke tatalo he fafine ki te Atua i loto o he tāpuakiga kae hē tataoa tona ulu? 14E hē ko te nātula nei o mea te akoako atua, ko te lāulu loloa o he tāulelea e takuvalea ai lava ia, 15kae ki te fafine, ko he mea tēnā e fāfia ai? Auā ko tona lāulu e fōki ki ei ke fakaaogā e vē he pulupulu. 16Kae kāfai he tino e fehiligia e ia te mea tēnei, oi oti lava te mea e lea atu ai au, e hēai ni a tātou tu māhani i nā mea tau tāpuakiga, ma e vēnā foki iētahi Ekalehia a te Atua.
Ko te Kaiga a te Aliki
(Mat 26.26-29; Mlk 14.22-25; Luk 22.14-20)
17Kae i nā fakatonuga iēnei i lalo, ko au e hē fakamālō atu kia te koutou, auā ko autou māfutaga tau tāpuakiga, e hē ke lelei ātili ai, kae ke kino ātili ai. 18Ko te mea muamua, kua fakalogo au kāfai e fai autou māfutaga ko koutou e fevaevaeaki; ma ko au e talitonu e hako he vāega o nā mea iēnei kua fakalogo atu au ki ei. 19(E hē taumate e iei ni fekehekeheakiga ia te koutou, kae ke iloa ai pe ko ai o koutou e hako.) 20Kāfai koutou e māfuta fakatahi, e hē ko te Kaiga a te Aliki te kakai ai koutou. 21Auā kāfai koutou e kakai, e kai tāfakavave te tino lava ia, ma mākokona ai iētahi kae konanā iētahi. 22E hēai nei ni fale mo koutou lava ke kakai ma inu ai koutou? Pe ko koutou e inoino ki te Ekalehia a te Atua, ma fofou koutou ke fakamāhiahi nā tino mātitiva? Ka vēhea atu nei au? Ka fakamālō atu nei au kia te koutou? Hēai! E hē faia e au he mea vēnā!
23Auā na tuku mai e te Aliki kia te au, te akoakoga na kō fōkiatua kia te koutou e vēia: i te pō na fakalata ai te Aliki ko Iehu, na tago ai ki he falaoa, 24kua fakafetai ki te Atua, ma na tavaevae ai ma lea vē atu, “Ko toku tino tēnei, e mo koutou. Fai te mea tēnei ma fakamanatuga kia te au.” 25Na vēnā foki i te kua uma o te kakai, kua tago ki te ipu ma vē atu tana kupu, “Ko te ipu tēnei o te feagaiga fōu a te Atua, kua fakamau fakailoga i toku toto. Ho he taimi e inu ai koutou ki ei, ke fai tēnā ma fakamanatuga kia te au.”#Eho 24.6-8; Iel 31.31-34
26Ko te uiga o te mea tēnei, ho he taimi lava e kakai ai koutou ki te falaoa ma inu ki te ipu, e folafola e koutou te mate o te Aliki ke pa ki te taimi e toe haele mai ai. 27Kae ko ai lava e kai ki te falaoa a te Aliki ma inu ki tana ipu i he faiga e takuvalea ai ia, kua agahala ia ona ko tana mea kino kua fai ki te tino ma te toto o te Aliki. 28Ko te mea ia, e tatau ke muamua iloilo ifo e te tino tona lava loto, oi kua kai ai ki te falaoa ma inu ki te ipu. 29Auā kāfai e hē talia e koe te uiga o te tino o te Aliki i te taimi e kai ai koe ki te falaoa ma inu i te ipu, kua kē tuku atua lava koe ki te fakamahinoga. 30Ko te mea ia e fai vāivai ma tauāle ai te tokalahi o koutou, ma feoti ai iētahi. 31Ānei ake e kitātou mafaia oi hukehuke ifo muamua ki o tātou loto, ko kitātou e hē kavea ki te fakamahinoga a te Atua. 32Kae ko kitātou e fakamahino ma fakahala e te Aliki, kae ke nahe fakahalagia fakatahi ai kitātou ma te lalolagi.
33Ko te mea ia, te kau uho, kāfai koutou e māopōpo ke kakai i te Kaiga a te Aliki, fakatali ke māopōpo fakatahi uma mai. 34Ma kāfai he tino o koutou e fia kaia, e tatau ke kai i te fale, kae ke nahe lavea ai ia i te fakamahinoga a te Atua ka koi māopōpo koutou. Ko iētahi mea, ka fakatonu atu koutou e au kāfai au e pa atu.
Currently Selected:
1 Kolinito 11: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
