1 Kolinito 10
10
Fakaetēte i nā Tupua
1Te kau uho, e fia fakamanatu atu e au kia te koutou, te mea na tupu ki nā tupuna o kitātou na mulimuli kia Mohe. Nae i lalo uma kilātou o te puipuiga a te ao, ma na kui loto uma kilātou o te Tai Kukula ma te haogalēmū.#Eho 13.21-22; 14.22-29 2I loto o te ao ma loto o te tai, na papatiho uma kilātou ma hoko o Mohe. 3Na kakai uma kilātou ki te falaoa faka-te-agaga e fokotahi,#Eho 16.35 4ma feinu uma i te vai faka-te-agaga e fokotahi. Na feinu kilātou mai te papa faka-te-agaga na olo fakatahi ma kilātou; ma ko te papa tēnā ko Keliho.#Eho 17.6; Nūm 20.11 5Kae e ui i tēnei, ko te Atua e hēki fiafia ki te tokalahi o kilātou, ma na fakaumatia ai kilātou i te toafa.#Nūm 14.29-30
6Ko nā mea uma iēnei ni fakatakitakiga mo kitātou, kae ke fakaetēte ai kitātou i te faia o nā mea e kino, e vē ona kilātou faia,#Nūm 11.4 7ke nahe ifo ai ki nā tupua, e vē ona faia e iētahi o kilātou. E vē oi leamai te tuhituhiga paia, “Kua nonofo ki lalo ia tagata ke kakai ma inu, oi tutū ai ki luga kua hihiva i mua o te tupua.”#Eho 32.6 8E hē tatau ke fai e kitātou nā āmioga mātagā, e vē ona fai e iētahi o kilātou—i te aho e fokotahi, e toka luahefulutolu afe kilātou na pakukū ma feoti.#Nūm 25.1-18 9E hē tatau ke tuku atu e kitātou ia Keliho#10.9 ia Keliho Ko iētahi tuhituhiga e lea mai te Aliki ki te tofotofoga, e vē ona fai e iētahi o kilātou—ma na fakaumatia ai kilātou e nā gata. #Nūm 21.5-6 10E hē tatau ke fāitio kitātou e vē ona fai e iētahi o kilātou—ma na fakaumatia ai kilātou e te Āgelu o te Oti.#Nūm 16.41-49
11Ko nā mea uma iēnei na tutupu kia te kilātou ke fai ma fakatakitakiga ki iētahi tino, ma na tūhia ki lalo kae ke fai ma mea ke fakaetēte ai kitātou. Auā kua pili mai i te taimi nei e ola ai kitātou, te ikuga o nā mea uma.
12Kāfai koutou e manatu e mau lelei autou tutū, fakaetēte la nā koutou e pakukū. 13Ko nā tofotofoga kua pa koutou ki ei, ko te itūkāiga lava e tahi e maua ai foki ia tagata uma. Kae ko te Atua e tauhi ki tana folafolaga, ma e hē ia tukua koutou ki he tofotofoga e hili atu i lo te koutou mālohi ke mau lelei ai autou tutū; i te taimi e tofotofo ai koutou, ka fōki atu e ia te mālohi ke maua ai e koutou te onohai, ma mafai ai ke hao kehe koutou.
14Ko te mea ia, te kau uho pele, koutou ke kalo kehe mai te ifo ki tupua. 15Ko au e tautala vēnei atu kia te koutou, ko koutou ni tino e mālamalama; fakamāhinohino ifo e koutou nā kupu e tautala ai au. 16Kāfai kitātou e inu ki te ipu o te Fakamanatuga tēia e lea kitātou ki te Atua ke fakamanuia, e hē ko te inu fakatahi nei tēnā o kitātou ki te toto o Keliho? Kāfai kitātou e kakai ki te falaoa e tavaevae e kitātou, e hē ko te kakai fakatahi nei tēnā o kitātou ki te tino o Keliho?#Mat 26.26-28; Mlk 14.22-24; Luk 22.19-20 17Ona e fokotahi te falaoa, ko kitātou uma, e ui e tokalahi, kae e tahi i te tino, auā ko kitātou uma e kakai ki te falaoa e fokotahi.
18Tātou māfaufau ake ki tagata o Ihalaelu; ko nā tino e kakai i nā mea e ofo atu ma tāulaga, e kau fakatahi i nā tautuaga i te fata faitāulaga ki te Atua. #Lev 7.6 19Ko te uiga nei la o taku lea atu, ko he tupua pe ko nā meakai e ofo atu ki ei, e iei he uiga? 20Hēai! Ko te uiga o taku lea atu, ko nā mea e ofo atu ma tāulaga e tagata fakapaupau, e ofo atu ki nā tēmoni kae hē ki te Atua. Ko au e hē fofou ko koutou ke fai ma hoa o nā tēmoni.#Teu 32.17 (LXX) 21E hē mafai koutou ke inu ki te ipu a te Aliki ma inu foki ki te ipu a nā tēmoni; e hē mafai koutou ke kakai i te laulau a te Aliki ma kakai foki i te laulau a nā tēmoni. 22Pe ko kitātou e fofou ke fuā te Aliki? E mākekeke atu nei kitātou i lo te Aliki?#Teu 32.21
23E lea nā tino, “E taga kitātou ke fai ho he mea.” Io e hako, kae e hē vēakē ko mea uma e lelei. “E taga kitātou ke fai ho he mea”—kae e hē ko mea uma e fehoahoani ke ati ake ai.#1 Kol 6.12 24Nahe iei he tino o koutou e hakili ki hona lava ia lelei, kae hakili ki he lelei mo iētahi tino.
25E taga te kakai o koutou ki ho he mea mai te māketi e fakatau ai nā kanofi manu, e aunoa ma ni fehili tau ki te lotofuatiaifo. 26Auā e vē oi leamai te tuhituhiga paia, “Ko te lalolagi ma mea uma e iei, e a te Aliki.”#Hal 24.1
27Kāfai koe e valakaulia e he tino fakapaupau ke kakai ma ia ma kua talia e koe tana kalaga atu, kai ki ho he meakai e laulau atu mo koe, e aunoa ma he fehili ona ko tō lotofuatiaifo. 28Kae kāfai he tino e lea atu, “Ko te meakai tēnei na ofo atu mo nā tupua,” nahe kē kai la ki ei, mo te lelei o te tino tēnā kua lea atu, ma mo te lelei o te lotofuatiaifo— 29ko te uiga o taku lea atu, e hē ko tō lotofuatiaifo, kae ko te lotofuatiaifo o tētahi tino.
E ono fehili vē he tino, “Heā la te ka fua tauānoa ai te haolotoga ia te au ke fai ai ho he mea, ki te lotofuatiaifo o hētahi tino? 30Kāfai au e fakafetai ki te Atua mo aku meakai, heā la te fāitio tauānoa mai ai he tino kia te au e uiga ki nā meakai kua uma toku fakafetai ai?”
31Ko te mea ia, pe heā lava ta koe e fai, pe ko koe e kai pe inu, fai uma nā mea iēnei mo he vīkiga o te Atua. 32Nahe koutou faia he mea e tauhūai ai nā tino Iutaia, pe ko tagata nukukehe, pe ko te Ekalehia a te Atua. 33Fakatakitaki oioti ki nā mea e kō faia; e taumafai lava au ke fakamaliegia ia tagata uma i nā mea e kō faia, e aunoa ma he manatu ki he lelei mo oku lava, ka ko he lelei mo tagata uma, kae ke fakaola ai kilātou.
Currently Selected:
1 Kolinito 10: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
