Kintaŋ 14

Wír veé Israyi káykir, ghíʼ Nyùy

1Màŋgòŋ woó Isray nèn lò e dzə̀m, e bùr a dzə̀ tóŋ, e sìíy, e tòŋ, yì rán. 2Aá tóŋ bèy, báshi Mooser wùn Aaron, suuy jii, «Kí bòŋ ji bo vèr‑iì kpùkír é wòŋ Ejiv, kìn ji bo vèr kpùkír e woʼ fen. 3Nyùy Tàr li ver ji wun du, e yiì ka shó e nsay foo fèy? Ji vèr du, e kpùkír e shùu rər a? Vikìy vér wùn à mewón mer mè sí yìi kfən ji kiyínsam ké wìr vee fó. Bó yòʼ bòŋ ke vèr binkir, e kfə̀n é bàm é Ejiv à?» 4Áwune nèn bà ntaŋ áwune áwune ji á shóʼ á kilìmbìy, e bìnkìr, a kfən e Ejiv.

5Mooser wùn Aaron nèn gbùkìr e màŋgòŋ woó Isray si, e tsə̀m sí e nsay. 6Joshua woo wan Nun wùn Kalev woo wan Jefunne ló kév, a sàtì a dzə̀ ndzə̀y fó wùn. Vé‑eè dzə̀ é ŋgoo ye yì‑iì duùn, e shwèʼ woŋ. 7Áwune yòŋ e màŋgòŋ woó Isray jii, «Woŋ wo vèr‑iì tosin, e shwèʼé dzə̀ a wú bòŋ e ŋàŋén. 8A Nyùy Tàr lòo dzə, e kòŋ vèsən, bo wù yíi tsəəné vèsən, e nəə́ sho e nsay fèn, e fo e vèsən. Dzə̀ nsay, a vín nàʼ wùn à vilu vi tsəətìn fo tsə́ətin. 9Dzə̀ cáʼ ji lá á yòʼ tàv á kitú, e mèŋ Nyùy Tàr. Lá á yòʼ fàn a sa sí wìr vee fó. Áwune dzə̀ ji ncèm fo vèsən. Á tsə̀ʼ ne kikiŋ kév, a Nyùy Tàr kù dzə̀ kfə́ nshìy wòsən. Lá vèn yòʼ fàn áwune.» 10Yii bèy, màŋgòŋ kú a taamé ji á tsə́mrí á áwune e tíyí, e yùyrí.

Kù mo á taáme bèy, rán Nyùy Tàrí nèn bvə̀ysín e *kibàn ké ntàsín, wìr dzə̀m woó Isray yén. 11Nyùy Tàr nèn yòŋ e Mooser jii, «Wír vìne wíy ŋway mo ben, e dù, e meé e le? Áwune wíy ten fó a way shilív e mǒ wùn, e dù, e meé e le? Aá tén bèy, a m yií ne viŋgaʼnìn ve vinyò aáwuné mvəm nyanyày. 12M yíi teè áwune e kifə̀ʼ ki, e laàr, e fəə́r kitúm ke sən kí fo wò wùn, é kí kuʼ, e kfə̀n a ker vitaáví, e shaà áwune.»

13Yii bèy, Mooser suúy e Nyùy Tàr jii, «Wír veé Ejivi yíi yu kinyo kìn, a wò‑oò fə̀ə́r ne wír vìn e vitaáví vé vi fo áwuné mvəm, 14e nèn bi wír veé nsay fèn sho. Éè Nyùy Tàr, áwune yù ne ji à dzə̀ e wír vìné mvəm. Nyùy Tàr, á yù ne ji à dìn a kitú ké e wír vée, aá yén wò moo mbàʼ ye yì tíy aáwuné kitu. Á kì ji à du a e wír vée mbìy e mvə̀m kitom ke mbàʼ e shùy, kfə̀n du aáwuné mbìy e mvə̀m kitom ke və̀y vitsə́ʼə́. 15Aà lò lèn, e laàr wír vìn, bo vitúm ve ví yuun leŋ wó vi yíi a suúy jii, 16‹Kí kòóy bèn, bìʼ fo Nyùy Tàr mùmèn ne ntéŋ fó lì wír vìn, e nəə́ sho e nsay ye wù‑uù kàʼàn atǎr ram yév, e lìʼ ji wun wíy fo aáwune. Á bèy, wù nen laàr áwune láarin, é woʼ.› 17Kii wò Nyùy Tàr, ku yiì, aá wáa yen vitaáví vé ve wiiwíy ví. Ku yiì mo wò‑oò kàʼàn, e yòŋ jii, 18à yòʼ yii táv shwiiy kilòŋ, à yii din koŋ yé ye wiyí e wír vée. À yii laysìn vinyo ve wíri buʼtì, kfə̀n laysìn shóʼór ye á shóʼor nsər sé. Yii bèy, a bó yòʼ dzə̀ à màʼtì á ŋgaà jay, é wù boy. À yii fó ŋgeʼlàʼ e wóné bìʼ jay atàr vév, kfə̀n fó e wón woné, à wón wón woné. 19M nén a lon ji à ku làysìn a liì kisaŋ wír vìn, bìʼ koŋ yé ye wiyí. Ku làysìn jay wov mo wò‑oò sí laysìnè, e kèʼ mo vé‑eè loòn fó Ejiv, e wìy shem lán.»

20 Nyùy Tàr bìnèr jii, «M kù làysìn ne bìʼ jí sé. 21Yii bèy, e ké ru kí, mo m dzəə̀n e tin, à mo vikuʼùy vém ví wíy run kitú ke nsay, 22bó wìr fo wír vìne yòʼ wíy nəə́ e wòŋ wo á du sho. Vé‑eè lo yèn rán yém ye ghaʼáné, e kfə̀n a yen viŋgaʼnìn ve vinyò ve mò‑oò yii e Ejiv, kfə̀n yii e woʼ fen, e kù a ghiʼ mo ghíʼín kàŋ e ghvə̀m, e tèn fó yu jí yem. 23Áwune yòʼ wíy shov woŋ woo shooy e si. Woŋ wo mò‑oò kàʼàn atǎr ram yév shó, e lìʼ. Bó wìr wo wù ŋwáy mo yòʼ wíy yen fó. 24Yii bèy, ké ŋgaà lìm wom woo Kalev mo wù kér shilív sə́ jeéy, ghán e mǒ mbòv shilív shimòʼón, m wíy lì wun, e dù, e nəə́ sho e nsay ye wù‑uù duùn, e yèn, é rám rəə́ yov fó. 25Lèn, mo wír veé Amalek wùn à veé Kanane dzə́ e mboʼ fèy, vèn bvəə́shi, á bìnkìr, a dù fo dzəə ye yì kiʼ Rìbà Ndzə̀v wo Baar.»

Nyùy Tàr máʼ ŋgeʼ e wír veé Israyí kitu

26 Nyùy Tàr nèn yòŋ e Mooser wùn Aaron jii, 27«Màŋgòŋ liì kisaŋ və̀n wíy sày mo ben, e dù, e meé e le? M yù ne say ye wír veé Isray vìne say mo. 28Suúy aáwune jii, mo m dzəə̀n shó e tin, kinyo ke áwune yòŋèn, m yú ki dzə̀ kíwun ke m yíi yiì aáwune. Yoŋ a mo woo Nyùy Tàr. 29Dzə́n sév sí yíi a neŋnín e woʼ fen. Dzə́n sé wìr dzə̀m ve vé‑eè sàyìn mo, wìr dzə̀m woo kèʼ fó kiya mbaà, a dù duùn fó mbìy, vee shooy ve vé‑eè taŋen é ghan sé kintaŋ. 30Bó wìr mòʼón fo áwune yòʼ wíy shov woŋ wo mò‑oò kàʼàn ji m wíy lèm áwune fó. Kù mày Kalev woo wan Jefunne wùn Joshua woo wan Nun. 31Yii bèy, fo ké wón wír vìn ve áwune yoŋ ji á yíi lò, a dzə kiyínsam, m yíi tsəəné áwune, e way fo, aá wìy nə̀ə́ e nsay ye atàr véví nyaŋsin. 32Fo ké atàr vév kí, dzə́n sév sí wíy a neŋnín e woʼ fen. 33A wón véví wíy jìŋ e woʼ kiyá mkweè, e yen ŋgeʼ atàr vév ve bó á yoʼ wày shilív e mǒ wùn, e kù a yen, e meé mo ŋgaà bàm wíy kpu, é dzə́né wáa neŋ e woʼ. 34Mo kí‑iì yiìn kishiíy mkweè, é bo á shwéʼ woŋ, bo dzə̀ ji kishiíy kimòʼón ki yíi a dzə kiyá kimòʼón ke ŋgeʼ, aáwune yén ŋgeʼ yee bìʼ yii yév kisaŋe kiyá mkweè, e nèn kìíy mo wìr méŋ mo, kí wàa dzə. 35Mo woo Nyùy Tàr, m yòŋ ne. Ké ru kí, m kér fóo yiì kinyo kìn e màŋgòŋ liì kisaŋ və̀n e dzə̀m, wo wù baʼtin, e ŋwày mo. Áwune yíi jìŋ e woʼ fen, e kpukír.»

36-37Nyùy yoŋ bèy, a ké wìr ve Mooser‑iì tumen, á dù, e shwèʼ woŋ, e kfə̀n e sáʼka kisaŋ ki dzə̀ jii, vé‑eè kpùkír a dzə̀ kifə̀ʼ e Nyùy Tǎr si. Vé‑eè lò, e fìʼtì ntum kisaŋ, e yiì, màŋgòŋ dzə̀m wáa sày Nyùy. 38Ku mày Joshua woo wan Nun wùn Kalev woo wan Jefunne ve vé‑eè gòʼòn atin fo mvə̀m wìr ve vé‑eè duùn ji á shwéʼ á woŋ.

Á kóʼ ji á ton nsay Kanan, e mùm ntéŋ

(Remrí 1.41‑46)

39Mooser tiísí vinyo vidzə̀m ve Nyùy Tàr‑iì yòŋèn e wír veé Israyi, áwune dìy e ŋàŋén. 40Yii bèy, áwune bvəə́shí, e ŋàʼáy kijàvndzə kijàvndzə, e nèn a koʼ abam vé a dù e wòŋ agwan, kóʼ bèy, suuy jii, «Ver víne. Vèr dzə̀, aá jáy rú. Yii bèy, vèr kù‑úù kóʼ, e bàʼ e wòŋ wo Nyùy Tàr kàʼàn ver shó.»

41Mooser dzə́r jii, «Vèn káy jí Nyùy Tàr ji ka? Kí yòʼ yíi dù. 42Lá vèn yòʼ kòʼ fo aŋgaà vén vibàné yúyrí ven. Bó Nyùy Tàr yòʼ dzə̀ vèn áwune. 43Wír veé Amalek wùn à veé Kanane yíi fəə, e tòn ven, é vèn kpúkír é shùu rər, bìʼ fo vèn bìnèn ndzə̀m e Nyùy Tàr. Bó Nyùy Tàr yòʼ yíi a dzə vèn áwune.»

44Yii bèy, áwune ku tàŋèn, e kòʼ é wòŋ agwan, a bó ŋkùv mensàŋ Nyùy Tàr yoʼ lò fo kibeèy, a bó Mooser yoʼ lò sa. 45Kù bey, wír veé Amalek wùn à veé Kanan ve vé‑eè dzə́ e wòŋ agwan fèyi nèn fəə̀, e sə̀y, e tòn áwune, e jùm, e dù, e mèé e Horma.

Currently Selected:

Kintaŋ 14: LNB

Highlight

Copy