Kintaŋ 13
13
Á tsə́nsí vé ŋkiyi é Kanan
(Remrí 1.19‑33)
1 Nyùy Tàr suúy e Mooser jii, 2«Túm wíri, aá du, e shwèʼ woŋ Kanan wo m sí yìi fo e wír veé Israyi. À yíi tum wír e mòʼón mòʼón fo ram yee shó, a kù dzə̀ wír wo dzəə̀n kilìmbìy e wun ram.» 3Á bèy, Mooser nèn tùm wíri, aá dzə̀ é woʼ yee Paran, a wìr dzə̀m kù dzə̀ kilìmbìy kímóʼ kí fo kfəə́ se wìr veé Isray si. 4A yír sév sí‑iì dzə̀ jii:
Fo rám Ruben, yì‑iì dzə̀ Shammua woo wan Sakkur.
5Fo rám Simeon, wáa dzə Shafat woo wan Hori.
6Fo rám Juda, wáa dzə Kalev woo wan Jefunne.
7Fo rám Issakar, wáa dzə Igal woo wan Joosev.
8Fo rám Efrayim, wáa dzə Hoshea woo wan Nun.
9Fo rám Benjamin, wáa dzə Palti woo wan Rafu.
10Fo rám Sebulun, wáa dzə Gaddiel woo wan Sodi.
11Fo kfə́ə Joosev ye dzəə̀n rám Manasse, wáa dzə Gaddi woo wan Susi.
12Fo rám Dan, wáa dzə Ammiel woo wan Gemalli.
13Fo rám Asher, wáa dzə Setur woo wan Mayker.
14Fo rám Navtali, wáa dzə Nahbi woo wan Vofsi.
15Fo rám Gad, wáa dzə Gewuel woo wan Maki.
16Á yír sé agwèy ve Mooser‑iì tumen ji á du, e shwèʼ woŋ. Ké Hoshea woo wan Nun, Mooser‑iì lò, e shù kfə́ yír rə́ ji Joshua.#13.16: Hoshea, Joshua: Yír sin si kù kér nsàv e mòʼón e Lǎm Hibru, a yì dzə̀ jii, «Nyùy Tàr dzə̀ Ŋgaà Lùŋèr.»
17Mooser‑iì lóo tum áwune ji á du, e shwèʼ á woŋ Kanan, e naàrì jii, «Vèn kóʼ, e shaà Negev, e dù fo mbìy, e kòʼ, e nə̀ə́ fo agwane dzəə̀n. 18Vèn leéy, e yèn mo woŋ woo shooyi dzəə̀n, e kfə̀n lèéy ji wíri sà dzə̀ ashàr moo akuʼùn á? Sà dzə̀ antav moo anjoó á? 19Vèn ku kfə̀n lèéy ji nsay ye áwune dzə́ sho sà bòŋ mo yì bìr á, e kfə̀n lèéy ji ŋkà se laʼ se áwune dzə́ sho si sà dzə̀ tèéter mo sí kér vikum ve kày a? 20Vèn ku shwèʼ ji nsay yee fó sà bòr mo yì bìr á, e kfə̀n lèéy ji kóv sí sà dzə̀ fó mo sí yòʼ dzə̀ á? Vèn ku kùr tímé, e kàv báŋ se vici símóʼ sí fó nsay foo fèy, e wìy sho. A wù yoŋ bèy, a sì é ghan se á yii koy ŋgòn se baŋ se *vayin.»
21Á bèy, aŋgàa ŋkiy vìyi nèn kòʼ, e shwèʼ woŋ, e kèʼ fo woʼ yeé Tsin, e dù, e bàʼ e Rehov, fo á sí lò, a nəə́ e nsay Hamat. 22A vé‑eè lò, e kòʼ é Negev, e nèn wìy e Hebron. A Hebron‑eè sì ŋkàlaʼ yee fó ŋgùʼ, a vé‑eè bòm, viyá vi shaà saàmbà, bo á wìy bom Tsoan woó Ejiv. Á meé fó, e yèn viŋgáʼ ve wìr veé kfəə Anak, aá dzə̀ rám sitaár, yé Ahiman wùn à yé Sheshayi, e lì yé Talmay.
23Á wìy, e mèé e Kiwoóy ké Eshkol, e gwàr tám kitiír ké vayin, a báŋ si koóm shó e ŋkàŋkaʼ. Á gwàr bèy, wíri toór abaà. Á kfən kòy sa *grenadin wùn à *fig, e wìy sho. 24Vé‑eè yoŋ kiwoóy kee shooy ji Eshkol#13.24: Eshkol: Nsàv dzə̀ jii, «ŋkàŋkaʼ kifa.» bèy, a dzə̀ bìʼ ŋkàŋkaʼ tútúʼ melùʼ wo wír veé Israyi‑iì gwàrìn fó fo.
25Vé‑eè dù, e shwèʼ woŋ bèy, kishiíy kí shaà mkweè, bo áwune kfə́n é bàm. 26Á wìy, e yèn Mooser wùn à Aaron, à màŋgòŋ e dzə̀m, aá dzə̀ é Kadesh e woʼ yee Paran, e naàrì mo ghán yéví‑iì dzəə̀n, e dìn báŋ se vici seé nsay foo fèy. 27Vé‑eè naàrì e Mooser jii, «Vèr dù e wòŋ fo wò‑oò tumen ver rúrú, a dzə̀ woŋ wo vín nàʼ wùn à vilu vi tsəətìn fo tsə́ətin. Báŋ se vici see fó si síne. 28Yii bèy, a wír ve á dzə́ e nsay foo fèyi dzə̀ antav, bo taaka rám Anak ye vèr yenen fó. Ŋkà sév sé laʼ si dzə̀ vikum, e kfə̀n a dzə sikuʼkìn. 29Wír veé Amaleki dzə́ e nsay Negev, a veé Hit wùn à veé Jebus, à veé Amori dzə́ kév é wòŋ agwan, a veé Kanane dzə́ e ŋguùŋè rìbà ndzə̀v, e kfə̀n a dzə e ghaŋ se ndzəv yee Jordan.»
30Kalev nèn lò kfə́, e sə̀r wíri mo vé‑eè baʼtin e Mooser si, e sùúy jii, «Vèsən kóʼ fó kàŋ mòʼón, e dù, e yòv fó. A dzə̀ vèsən tòn fó, e sə̀.» 31Yii bèy, wír ve wùn áwune‑eè duùné nèn nyàysì nyàysìn jii, «A dzə̀ la vèsən yòʼ yiì kifá aáwune. Á tàvkír, e shaà vèsən.» 32Áwune nyàysì bèy, e nèn sàmèr sáʼka kisaŋ e wír veé Israyí mvəm kùm nsay ye vé‑eè duùn, e shwèʼ, e sùúy jii, «Nsay yee fó dzə̀, a yì senèr wíri sénerin. Kímóʼ kí ji vèr yèn wíri fó, a kù dzə̀ vigha ve wíri. 33Vèr kfən yèn wír veé Nefilim fo, vimà vé wìr ve dzəə̀n kfə́ə Anak. Vèr‑iì dzə̀ kér fó moo vintàn, a kù dzə̀ sá mo áwune‑eè yén ver bey.»
Currently Selected:
Kintaŋ 13: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
