Kintaŋ 15
15
Nsər see kùm cu
1 Nyùy Tàr yòŋ e Mooser ji 2wù fó á ntò se vinyò e wír veé Israyi, e naàrì a jii, «Vèn wíy nəə e nsay ye Nyùy Tàr fó e vèn ji kirə́ʼ kén ké dzə, 3lóo cù Nyùy Tàr e cu ye və́yí bin fo fo, ji kirəm ki wáa rə̀ʼtìn, a bòŋ wun, á kù tàʼ nyam cù a dzə̀ fó ŋgoo nàʼ, kìn fó ŋgoo bvəy. Kú a dzə kíwun, kìn dzə̀ cu ye á ton nyám e dzə̀m, kìn dzə̀ ye á rúner kilìʼ, kìn dzə̀ yé kimbòŋwùn, kìn dzə̀ yee bìʼ ŋkàʼ se á yí e ghan see shó. 4Wìr wo wù wiy e cúu, é wù wiy sá e meŋkfəŋ me kpuún mè kilu e mòʼón, aá shwír e meŋgvə́r me *oliv mè lita e mòʼón ji cu vifa ve yi. 5Wù lóo wìy e wàn njiì ji cu ye tonèné, kìn ji ye seeríné, wù wàa ker sa lita melùʼ ji cu melùʼ.
6«Lóo dzə kiyáʼ, á yiì cu vifa ve yi a dzə̀ e meŋkfəŋ me kpuún mè akilu abaà, aá shwír lita meŋgvə̀r me oliv sho e mòʼón e kimbéʼ ki, 7e kfə̀n fò cu melùʼ sa lita e mòʼón e kimbéʼ ki. Á kú a yiì cu sìn ji kirəm ki wáa rə̀ʼtìn, a bòŋ Nyùy Tàr.
8«Vèn li nàʼ woo lumèn, lóo cù Nyùy Tàr shó ji cu ye tonèné, kìn ji ye seeríné, ye á yii bìʼ kilìʼ, kìn ji cu kikòŋnìn, 9bo á yíi tatí wùn à cu vifa ve yii akilu meŋkfə̀ŋ me kpuún mè ataár, aá shwír meŋgvə́r me oliv sho alita abaà, 10e fo cu melùʼ sa alita abaà. Kù dzə̀ cu ye və́yí bin fo fo, a kirəm kfə́ kí boŋ Nyùy Tàr.
11«Á mo á yíi naŋsín nàʼ, kìn kiyáʼ, kìn dzə̀ wan njiì, kìn bvə́y ji cu Nyùy Tàr. 12Á ku yiì bèy, e nyàm cù e mòʼón mòʼón, a nyám si fə̀m dzə̀ sisìʼín, bo kù dzə̀ mo á bár vifá vìn sho. 13Wàn nsay lóo yiì cu ye və́yí bin fo fo, ji kirəm kfə́ kí wáa rə̀ʼtìn, a bòŋ Nyùy Tàr, bo wù kù yii a dzə̀ é dzəə fen.
14«Kiŋgwìy ki lóo dzə vèn áwune, kìn dzə̀ beèshaà, kìn dzə̀ ke kí sí dzə́ dzəə́n, kí lóo kòŋ ji wun wiy e cu ye və́yí bin fo fo, ye kirəm kfə́ kí rəʼtìn, boŋ Nyùy Tàr, bo wù kù yii sa réŋréŋ mo vèn yii. A sì nsər bèy, mo ŋgwàʼ sén sí wíy a dzə. 15Nsər kù wíy a dzə e mòʼón ye wìr dzə̀m jumrì mo ŋgwàʼ sén sí wíy a dzə, kìn dzə̀ wan nsay, kìn dzə̀ kiŋgwìy ke kí dzə́ vèn áwune. Kiŋgwìy wùn à wàn nsay kù dzə̀ réŋréŋ e Nyùy Tǎr si. 16Nsər kù dzə̀ e mòʼón, à fo vèn, à viŋgwìy ve ví dzə́ e věn mvəm ví. A sáʼ Nyùyi kù dzə̀ sá réŋréŋ bey.»
17 Nyùy Tàr kfən yòŋ e Mooser ji 18wù fó á ntò se vinyò símóʼ sí e wír veé Israyi jii, «Vèn wíy nəə e nsay yee fo Nyùy Tàr li ven, e dù sho, 19vèn keʼ, lóo laár vifá ve yi veé nsay foo fèy, vèn bàr vímóʼ ví ji cu Nyùy Tàr. 20Vèn ton kibán ke mbìy ki, vèn fə̀ə́r ntuʼ fo fo, e yiì cu ye nanèné shó réŋréŋ mo vèn yii e cu ŋgòn se vifa vee lò fó riimé ví. 21Mo ŋgwàʼ sén sí wíy a dzə, kù dzə̀ mo vèn wíy a yiì bèy, a fo kibán ke mbìy ki e Nyùy Tàr ji cu ye nanèné.
Cu yee bìʼ jay woo yiì là kiíy
22«A dzə̀ kí kòóy ji vèn lo, e jày kinyo là kiíy, e làa yòʼ jùmrì nsər se Nyùy Tàr foon e Mooser sidzə̀m. 23Ghanmóʼó wìy sìíy jày wón vén, kìn wón won mo ŋgwàʼ sén sí wíy a dzə, e làa yòʼ ghar nsər sidzə̀m se Nyùy Tàr foon e vèn, e shaà fo Mooser. 24Kí koóy bey, jay və̀n wáa dzə, a màŋgòŋ woó Isray yii là kiíy, bo màŋgòŋ yíi tatí e dzə̀m, e wìy e nàʼ woo lumèn ji á yii á cu ye tonèné shó, é kirəm kfə́ kí wáa bòŋ Nyùy Tàr. Á ku bàr sá cu vifa ve yi e ghaŋ wo, à yé melùʼu mo nsər naarì, e kfə̀n fò kibév ji cu yee bìʼ jay. 25Á wiy sho, é taà cù nèn yiì cu, e màn jay màŋgòŋ woó Isray sho. Wù máné, é Nyùy nèn làysìn jay wov, bìʼ fo á yòʼ‑oò lo jày e kúmé, bo taaka mo á kfə̀n wìyìn ne e cu see bìʼ jay wov sí, e cù Nyùy Tàr e cu ye və́yí bin fo foo, e kfə̀n yiì cu ajay. 26Á bèy, é Nyùy ku nèn làysìn jay wìr dzə̀m woó Isray, e làysìn sa wo viŋgwìy ve ví dzə́ wùn áwune, bìʼ fo jay woo shooy‑iì kùmèn wir dzə̀m.
27«A lò a dzə, a jáy wir mòʼón kinyo là kiíy, bo wù wiy e kifum ke bvəy kee kiyá kifur ki ji cu jay. 28Wiy sho, é taà cù nèn màn vinyo ve ŋgaàŋ sho e Nyùy Tǎr si, bìʼ jay wo wù jayin là kiíy, é Nyùy nèn làysìn. 29Kù dzə̀ nsər yee shó e mòʼón fo wìr wo wù jayin kinyo là kiíy, kìn dzə̀ wir Isray, kìn dzə̀ kiŋgwìy ke kí dzə́ wùn áwune.
30«Yii bèy, a wìr gbù nsər e kúmé, kìn dzə̀ wan nsay, kìn dzə̀ kiŋgwìy, bo wù tàʼ a dzə̀ Nyùy Tàr ntéŋ, á nèn kù fə̀ə́r wun fo wír vəə́ mvəm. 31Mo wù ŋwayin a dzə̀ jí Nyùy Tàr, e shòʼór nsər rə e kúmé, aá ku fə̀ə́r wun ŋkuuŋkùŋ, é lòn vəə́ kú a dzə e wun kitu.»
Lǒn wìr wo wù shoʼorin nsər kishìíy ké bam
32Wáa dzə e ghan fen, a wír veé Israyi dzə̀ə́ e woʼ, á nèn koò wír, a wù sív meŋkaʼ e kishiíy ké bam ke Nyùy Tàr. 33Wír ve á kì yenen, a wù sív meŋkaʼa nèn lì ŋgaàŋ, e wìy, e yèn Mooser wùn Aaron, à kintatì ki shó. 34Á nèn lèm wír və̀y e ŋòròʼ mo bó á yòʼ‑oò ló ne kìíy kiránén kinyo ke dzə̀ á yiì e wun. 35Nyùy Tàr lò, e naàrì e Mooser ji á ku yùyrí a ŋgaàŋ yúyrín. Màŋgòŋ ku lì, e fəə̀ á kibeey shó, e tsə̀mrí e tíyí. 36Màŋgòŋ nèn lì, e fəə̀ kibeey shó, e tsə̀mrí e tíyí, wù kpú. Á kù‑uù yiì réŋréŋ mo Nyùy Tàr‑iì yòŋèn e Mooser.
Nsər see kùm vijéréŋ veé ndzə̀y
37 Nyùy Tàr lò, e yòŋ e Mooser jii, 38«Súŋnín e wír veé Israyi, e yòŋ aáwune jii, vèn kù wíy a fèr vijéréŋ e věn shuù se ndzə̀y, a fèr bèy, mo ŋgwàʼ sén sí wíy a dzə. Vèn lóo fèr, aá wáy làv wùmòʼ shó, a dzə̀ wo wù səə́ne moo yúv bey. 39Vèn wíy lóo yen vijéréŋ vin, é vèn nèn a kuumé nsər se Nyùy Tàr sidzə̀m, a yiì mo sí dzəə̀n, e làa yòʼ dzə́ə a jùmrì a dzə̀ liì kisaŋ wo melív men mè tíy sho. Yii bèy, é la vèn yòʼ dzə́ə a yiì mo síi lévti ven. 40Bo vèn sí wìy a kuumé nsər se Nyùy Tàr sidzə̀m, a yiì mo sí dzəə̀n, e nèn a dzə jeéy ji wír Nyùy won.» 41Suuy wun woo Nyùy Tàr woo Nyùy won wo wù‑uù fəərin ven fó wòŋ Ejiv ji wun wáa dzə Nyùy won. Dzə̀ wun Nyùy Tàr woo Nyùy won.
Currently Selected:
Kintaŋ 15: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
