Kintaŋ 12
12
Miriam wùn Aaron say Mooser
1Miriam wùn Aaron yiì lò, e nèn a sày Mooser bìʼ wan wìr Kush#12.1: Kush: Kush dzə̀ woŋ, a wú‑uù dzə̀ é ghaa ndzəv yee Naay mo á loòn fó Ejiv, a koʼ koʼón. wo wù‑uù liìn ji wíiy və. 2Á wáa sày bèy, a suúy jii, «Dzə̀ ji Nyùy Tàr kù sùŋnín, e shaà a dzə̀ fo Mooser cáʼcáʼ à? Dzə̀ ji bó wù yoʼ sùŋnín sa, e shaà fo vèr a?» Aá say bèy, a Nyùy Tàr yú.
3A Mooser‑iì dzə̀ kfə́ wir kiman feyì, a bó wìr kiman wùmòʼ yòʼ kfə̀n‑eè dzə̀ shó e kitu ke nsay moo wun. 4Nyùy Tàr ku nèn lò, e jàŋ Mooser wùn à Aaron, à Miriam, e sùúy jii, «Ven vee wír ataári fəə́, e wìy e shùu *kibàn ké ntàsín.» Áwune vee wír ataári nèn fəə̀. 5Nyùy Tàr nèn sə̀y é mvə̀m mbàʼ ye yì dzəə̀n moo kitóm, e tìím e shùu kibàn ké ntàsín, e yòŋ Aaron wùn Miriam, áwune kóʼtí, e wìy. 6Wù suúy jii, «Vèn yuúrí kijuŋ. *Ŋgaà ntum wom yii lóo dzə e věn mvəm, m wàa dìn kitú kém shó e njà vinjeenjèm, e kfə̀n a suŋnín sho e njèm. 7A bó ké Mooser woo ŋgaà lìm wom kí yòʼ dzə̀ bey. Wír vén veé Isray adzə̀me kù sì e wun kiwo. 8Lóo dzə wun, vèr wun wàa suŋnín fo si kiránén, là vindzəv, wù wàa yen shwínín yém, mo woo Nyùy Tàr. Vèn mùm a dzə̀ ka, e bó a sày Mooser woo wír wom lìm?»
9 Nyùy Tàr shwiíy kilòŋ é ŋàŋ bìʼ áwune, e nèn màʼtì áwune, e dù. 10Kù mo mbàʼ lo fo kitu ke kibàn, yàsí woó jùv wùn nèn koò Miriam, wù nèn lò, a fər moo mentíy bèy. Mo Aaron bìnkìn, e lòo leéy, e yèn a Miriam sí kér yàsí woó jùv wùn ŋkuuŋkùŋ, 11wù nèn yòŋ e Mooser jii, «Éè taàtá wòm, lá à yòʼ lèéy kiyúŋ kér ke kí yiìn, vèr tó é jay. 12Lá à yòʼ màʼtì é Miriam wáa dzə moo kimkpú ke kifa ke kí fəə́ fo yè wóv bvə̀m, a mbìv yìmòʼ fóy ne.»
13Mooser nèn bùʼ wó e Nyùy Tàr jii, «Éè Nyùy, kii wò, ku fèr wun.» 14Nyùy Tàr bìnèr e Mooser jii, «A kì cù tàr wov mentíy e si wo, bo bó woómé si yòʼ kì yíi koo wun kishiíy saàmbà à? Bo dzə̀ ji á fəə́r á wun fo kibeèy, é wù goʼ é ndzə kishiíy saàmbà, e bóo kfən e bàm.» 15Á nèn tsə̀ʼ Miriam fo kibeèy, e lèm e ndzə, wù dzə̀ʼə̀m kishiíy saàmbà. Wíri ku gòʼ fo vé‑eè dzəə̀n e meé mo wù‑uù kfənen é bàm. 16Kee shooy ki shaà, wír veé Israyi nèn lò fo Haserot, e dù, e tàm kibeey é woʼ yee Paran.
Currently Selected:
Kintaŋ 12: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
