Apocalipsis 8

Je̱'e̱ mu̶juxtujkpu̶ sellu̶ y je̱'e̱ ooru̶ poomjogu̶'u̶ñ

1Ko je̱'e̱ Borreegu̶'úng je̱'e̱ mu̶juxtujkpu̶ sellu̶ agu̶tztuuty, chi jiiby tzajpjooty amoñyu̶ nigu̶xyu̶ y'ijtku̶xy ja'awe̱e̱n kya'akúpt hooru̶ju̶ch. 2Chi u̶u̶ch je̱'e̱ juxtujkpu̶ ángel n'ijxy tyu̶naaygyu̶xy Dios winduuy, y yajmooygyu̶xy je̱'e̱ trompeta juxtujk. 3Kujeky je̱'e̱ ángel jadu'ug myiiñ mu̶u̶d je̱'e̱ ooru̶ poomjogu̶'u̶ñ, y chi poch winduuy tyu̶naayxyu̶jpy ma je̱'e̱ windzu̶gu̶'u̶ñ yaj'yékyu̶ñ, y chi je̱'e̱ poom may yajmooy, neby jim jyógu̶chu̶ñ ma je̱'e̱ ooru̶ altaaru̶ñ kipxy mu̶u̶d je̱'e̱ myu̶bu̶jktzoowu̶ñ nigu̶xyu̶ ajku̶xy, je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ. 4Chi je̱'e̱ poomjók pyejty ma je̱'e̱ ángel kyu̶'u̶ju̶ñ y jya'ty jiiby ma je̱'e̱ mu̶dyiibu̶ najty jim ma je̱'e̱ ane̱'e̱mdaakt winduuyu̶ñ, Dios winduuy, kipxy mu̶u̶d je̱'e̱ myu̶bu̶jktzoowu̶ñ ajku̶xy, je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ. 5Mu̶'it je̱'e̱ ángel poomjogu̶'u̶ñ majch y yaj'ujch mu̶u̶d je̱'e̱ ju̶u̶nbajk, mu̶dyiibu̶ najty jim poch winduuy ma je̱'e̱ windzu̶gu̶'u̶ñ yaj'yékyu̶ñ, y chi naaxwiiñ ku'uju̶bijpnajxy, y chi je̱'e̱ ane̱e̱ mu̶k yaaxy jyojky, yajmu̶dooy ne̱'e̱mu̶ñ, wyu̶dzujky y temblor ñajxy.

Je̱'e̱ may trompeta

6Chi je̱'e̱ juxtujkpu̶ ángel mu̶dyiibu̶ je̱'e̱ trompeta najty mu̶dajtku̶xpu̶ñ ñayñi'ixu̶u̶yu̶gu̶xy yajxu'uxaangu̶xy je̱'e̱ tyrompeta.

7Chi je̱'e̱ jayu̶jpu̶ ángel tyrompeta yajxuuxy, chi je̱'e̱ tu̶u̶tztuu ya naaxwiiñ kya'ay y ju̶u̶n mugu̶'u̶ wu̶dittu̶'u̶ mu̶u̶d je̱'e̱ ne'pty. Chi je̱'e̱ naaxwiiñ tu'kpú̶ky tyooy ma je̱'e̱ tu̶gu̶u̶gpú̶kypyu̶ju̶ñ mu̶u̶d je̱'e̱ kepy tzaa tu'kpú̶ky ma je̱'e̱ tu̶gu̶u̶gpú̶kypyu̶ju̶ñ y ku̶xyu̶ je̱'e̱ aay ujtz tzuxkjatypyu̶.

8Chi je̱'e̱ mu̶me̱tzkpu̶ ángel tyrompeta yajxuuxy, y chi mejyjyooty kya'ay cham jyanchtoy mu̶dyiibu̶ du'un ku̶xu̶'kp neby mu̶jkóptu̶ñ; y chi je̱'e̱ mejy ne'pty tu'kpú̶ky wyimbijty ma je̱'e̱ tu̶gu̶u̶gpú̶kypyu̶ju̶ñ. 9Tu'kpú̶ky je̱'e̱ tu̶gu̶u̶gpú̶kypyu̶ ku̶xyu̶ y'o'kku̶xy, je̱'e̱ mu̶dyiijáty najty mejyjyooty tzu̶naaygyu̶xpu̶ñ, y nan tu'kpú̶ky je̱'e̱ tu̶gu̶u̶gpú̶kypyu̶ barco wyindu̶gooydyaay.

10Chi je̱'e̱ mu̶du̶gu̶u̶kpu̶ ángel tyrompeta yajxuuxy, y chi mu̶dza'a tu'ug kya'ay tzajpjooty janch mu̶j, cham tyoy neby mu̶jju̶u̶nu̶ñ oy tu'kpú̶ky kyu̶da'agy ma je̱'e̱ tu̶gu̶u̶gpú̶kypyu̶ mu̶jnu̶u̶ y ma je̱'e̱ nu̶u̶ pyu̶dzu̶myu̶ñ. 11Je̱'e̱ mu̶dza'a je̱' najty je̱'e̱ xyu̶u̶'áty Ta'ambu̶; y chi je̱'e̱ nu̶u̶ ta'am tu'kpú̶ky wyimbijty ma je̱'e̱ tu̶gu̶u̶gpú̶kypyu̶ju̶ñ, y chi je̱'e̱ ja'ay may y'o'kku̶xy je̱' ko je̱'e̱ nu̶u̶ najty jyanchta'amu̶ch.

12Chi je̱'e̱ mu̶mu̶daaxkpu̶ ángel tyrompeta yajxuuxy, y chi je̱'e̱ xu̶u̶ tu'kpú̶ky wyindu̶gooy ma je̱'e̱ tu̶gu̶u̶gpú̶kypyu̶ju̶ñ, je̱'e̱ po'o, y je̱'e̱ mu̶dza'a. Chi tu'kpú̶ky koodz wyu̶'u̶my ma je̱'e̱ tu̶gu̶u̶gpú̶kypyu̶ xu̶u̶ po'o y mu̶dza'a ajku̶xyu̶ñ, y ka'p je̱'e̱ xu̶u̶ ka'pxy xu̶u̶m y'aañ ni je̱'e̱ po'o ka'pxy kya'a'aañ tzum.

13Chi u̶u̶ch n'ijxy y nmu̶dooyu̶ch ko je̱'e̱ mu̶xywiitz tu'ug tzajp'itkujk kye̱e̱kwu̶díty y myu̶na'añ janch mu̶k: “¡Miich y'yoobu̶ naaxwiiñjya'ay ajku̶xy m'ayo'onbadaangu̶xp miich ko naty je̱'e̱ trompeta ya'axy, je̱'e̱ mu̶dyiibu̶ je̱'e̱ mu̶du̶gu̶u̶kpu̶ ángel jyakyajxu'uxaangu̶xypyu̶ñ!”

Currently Selected:

Apocalipsis 8: MIXE

Highlight

Copy

Compare