Apocalipsis 7
7
Je̱'e̱ Israel ja'ay y'ok'ungtu̶jk y'ok'ana'ktu̶jk mu̶dyiibu̶ yaj'ijxpe̱jtu̶u̶ygyu̶xu̶ñ
1Ko adaa du'un tyuundaay jyajttaayu̶, chi u̶u̶ch je̱'e̱ ángelestu̶jk mu̶daaxk n'ijxy tyu̶naaygyu̶xy naaxwiiñ mu̶daaxk esquina y axajtujkku̶xy je̱'e̱ mu̶daaxk'ítpu̶ poj ka'pu̶ ya naaxwiiñ pyóju̶ch ni ma je̱'e̱ mejyu̶ñ ni ma je̱'e̱ kepy tzaaju̶ñ. 2Nan n'ijxu̶ch je̱'e̱ ángel ja'adu'ug myiñ najty xu̶u̶bu̶dzu̶my'eemby, y mu̶dajtu̶ je̱'e̱ Dios jugy'ajtpu̶ syellu̶. Adayaaba ángel mu̶k yaaxke̱e̱k ma je̱'e̱ mu̶daaxkpu̶ ángelestu̶jk, mu̶dyiibu̶ je̱'e̱ mu̶k'ajt najty tu̶ yajmooygyu̶xyu̶ñ neby mu̶baad yajwindu̶gooydyaaygyu̶xy tijaty ya naaxwiiñ y ma je̱'e̱ mejyu̶ñ: 3“¡Ka'p je̱'e̱ naaxwiiñ ni je̱'e̱ mejy y ni je̱'e̱ kepy tzaa myajwindu̶gooygyu̶xy, pu̶nu̶ ka'anu̶ naty wimbokku̶xp ndzaayu̶m ajku̶xy je̱'e̱ nWindzú̶n Dios tyuumbu̶du̶jk ajtu̶m ajku̶xy!”
4Y nmu̶doowu̶ch je̱'e̱ mu̶dyiibu̶ yaj'ijxpe̱jtu̶u̶ygyu̶xu̶ñ: mu̶go'px ja'ajuxytyíkxy mu̶daaxk mil kyu̶xy'ajttaaygyu̶xy, je̱'e̱ mu̶dyiibu̶ yaj'ijxpe̱jtu̶u̶ygyu̶xu̶ñ je̱'e̱ Israel ja'ay y'ok'ungtu̶jk y'ok'ana'ktu̶jk ajku̶xy. 5Majmé̱tzk mil je̱'e̱ Judá y'ok'ungtu̶jk y'ok'ana'ktu̶jk yaj'ijxpe̱jtu̶u̶ygyu̶xy, majmé̱tzk mil je̱'e̱ Rubén y'ok'ungtu̶jk y'ok'ana'ktu̶jk, majmé̱tzk mil je̱'e̱ Gad y'ok'ungtu̶jk y'ok'ana'ktu̶jk, 6majmé̱tzk mil je̱'e̱ Aser y'ok'ungtu̶jk y'ok'ana'ktu̶jk, majmé̱tzk mil je̱'e̱ Neftalí y'ok'ungtu̶jk y'ok'ana'ktu̶jk, majmé̱tzk mil je̱'e̱ Manasés y'ok'ungtu̶jk y'ok'ana'ktu̶jk, 7majmé̱tzk mil je̱'e̱ Simeón y'ok'ungtu̶jk y'ok'ana'ktu̶jk, majmé̱tzk mil je̱'e̱ Leví y'ok'ungtu̶jk y'ok'ana'ktu̶jk, majmé̱tzk mil je̱'e̱ Isacar y'ok'ungtu̶jk y'ok'ana'ktu̶jk, 8majmé̱tzk mil je̱'e̱ Zabulón y'ok'ungtu̶jk y'ok'ana'ktu̶jk, majmé̱tzk mil je̱'e̱ José y'ok'ungtu̶jk y'ok'ana'ktu̶jk y majmé̱tzk mil je̱'e̱ Benjamín y'ok'ungtu̶jk y'ok'ana'ktu̶jk ajku̶xy.
Je̱'e̱ mayjya'ay agu̶ poob wit mu̶u̶dpu̶ ajku̶xy
9Ko adaa du'un tyuundaay jyajttaayu̶, chi u̶u̶ch je̱'e̱ mayjya'ay n'ijxy du'uñdyu̶ je̱'e̱ naax kajpt kyu̶xy'atyu̶ñ, jim mu̶dyiibu̶ je̱'e̱ ñi'kx kyopt kyolor tu̶gachjyaty ajku̶xy, jim mu̶dyiibu̶ tu̶gachjyaty kápxku̶xpu̶ñ y mu̶dyiibu̶ tzóngu̶xpu̶ñ majaty je̱'e̱ mutzk naax mutzk kajptu̶ñ. Jim najty tyu̶naaygyu̶xy ma je̱'e̱ ane̱'e̱mdaakt winduuy y ma je̱'e̱ Borreegu̶'úng winduuyu̶ñ, y janch mayjya'ay najty jim ka'p mu̶baad y'oymyu̶choonu̶ch y agu̶ poob wit mu̶u̶d najty ajku̶xy y aaydyuuñ aaygyáp ajku̶xy. 10Nigu̶xyu̶ najty mu̶k yaaxku̶xy jyojku̶xy myu̶naangu̶xy:
“¡Je̱'e̱ nDios Teedy xyajni'idzooku̶mb ajku̶xy y je̱'e̱ Borreegu̶'úng mu̶dyiibu̶ u̶ñaaby ma je̱'e̱ ane̱'e̱mdaaktu̶ñ!”
11Y nigu̶xyu̶ je̱'e̱ ángelestu̶jk najty tyu̶naaygyu̶xy ane̱'e̱mdaakt ju'uduuy y ma je̱'e̱ amu̶jja'aydyu̶jk, y je̱'e̱ mu̶daaxkpu̶ juugypyu̶ ju̶yujk jyu'uduuyu̶ñ. Y ñayñajtzkojxtu̶na'awu̶u̶yu̶gu̶xy windzu̶gu̶u̶ygyu̶xy ane̱'e̱mdaakt winduuy u̶xtu̶ yajnaaxpaatku̶xy je̱'e̱ wyimbok y o'owu̶dajtku̶xy je̱'e̱ Dios. 12Myu̶naangu̶xy:
“¡Jaanch adaa du'un!
Je̱'e̱ u̶u̶wu̶ñ yaaxu̶ñ, je̱'e̱ oy'ajt,
je̱'e̱ wij'ajt ke̱j'ajtu̶ñ, je̱'e̱ yajmu̶ju̶wu̶u̶yu̶ñ,
je̱'e̱ ku'umaayu̶ñ, je̱'e̱ ane̱'e̱mu̶ñ y je̱'e̱ mu̶k'ajt
je̱'e̱ nDios paattu̶p ajtu̶m ajku̶xy wiinu̶u̶xu̶u̶ wiinu̶u̶jumu̶jt.
¡Jaanch adaa du'un!”
13Mu̶'it u̶u̶ch je̱'e̱ amu̶jja'aydyu̶jk nidu'ugtu̶ xyajtu̶u̶y: “¿Pu̶nja'ay adaa ajku̶xy mu̶dyiibu̶ agu̶ poob wit mu̶u̶d ajku̶xy y ma tu̶ chóngu̶xy?” 14Chi u̶u̶ch n'adzooy, “Miich mnejwu̶u̶by Windzú̶n” chi u̶u̶ch je̱' xyñu̶maay: “Je̱'e̱ adaa ajku̶xy je̱'e̱ mu̶dyiibu̶ je̱'e̱ mu̶j ayo'on tu̶ yajnajxku̶xyu̶ñ, je̱'e̱ mu̶dyiibu̶ je̱'e̱ Borreegu̶'úng ñe'pty tu̶ yajpokyñi'iwaatzu̶gu̶xyu̶ñ, du'un neby je̱'e̱ wyit du'umbu̶ tu̶ pujku̶xyu̶ñ y tu̶ yajwaatzku̶xyu̶ñ ma je̱'e̱ Borreegu̶'úng ñe'ptyu̶ñ.
15“Paady je̱'e̱ Dios ane̱'e̱mdaakt winduuy yajpaatku̶xy,
y xu̶u̶m tzum je̱'e̱ Dios mu̶duungu̶xy ma je̱'e̱ tyu̶jku̶ñ jiiby tzajpjooty.
Je̱'e̱ Dios Ung, mu̶dyiibu̶ u̶ñaaby ma je̱'e̱ ane̱'e̱mdaaktu̶ñ ku̶'u̶m kweentu̶'adu̶u̶ju̶p ajku̶xy.
16Ka'p je̱'e̱ yuu tu̶dzu̶'u̶ okju̶wu̶u̶ygyu̶xnu̶ch,
y ni je̱'e̱ xu̶u̶ kya'a'okno'ku̶gu̶xnu̶ch,
y ka'p je̱'e̱ ambu̶ okju̶wu̶u̶ygyu̶xnu̶ch;
17je̱' ko je̱'e̱ Borreegu̶'úng, je̱'e̱ mu̶dyiibu̶ ane̱'e̱mdaakt kujkjooty yajpaatp,
je̱'e̱ kweentu̶'adu̶u̶ju̶p ajku̶xy, du'un neby je̱'e̱ borreegu̶ yajkweentu̶'átyu̶ñ,
y yajnú̶kxu̶gu̶xu̶ch ajku̶xy ma je̱'e̱ wa'atzpu̶ nu̶u̶ pyu̶dzu̶myu̶ñ,
mu̶dyiibu̶ je̱'e̱ jugy'ajt wiinu̶u̶xu̶u̶bu̶ ye̱jkpu̶ñ,
y Dios je̱'e̱ tyaju̶ñ myaayu̶ñ pu̶jkku̶xu̶p ajku̶xy ka'pu̶ tyajku̶x myaaygyu̶xnu̶ch.”
Currently Selected:
Apocalipsis 7: MIXE
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
