Popular Bible Verses from Apocalipsis 8

Share

Ko je̱'e̱ Borreegu̶'úng je̱'e̱ mu̶juxtujkpu̶ sellu̶ agu̶tztuuty, chi jiiby tzajpjooty amoñyu̶ nigu̶xyu̶ y'ijtku̶xy ja'awe̱e̱n kya'akúpt hooru̶ju̶ch.

Chi je̱'e̱ jayu̶jpu̶ ángel tyrompeta yajxuuxy, chi je̱'e̱ tu̶u̶tztuu ya naaxwiiñ kya'ay y ju̶u̶n mugu̶'u̶ wu̶dittu̶'u̶ mu̶u̶d je̱'e̱ ne'pty. Chi je̱'e̱ naaxwiiñ tu'kpú̶ky tyooy ma je̱'e̱ tu̶gu̶u̶gpú̶kypyu̶ju̶ñ mu̶u̶d je̱'e̱ kepy tzaa tu'kpú̶ky ma je̱'e̱ tu̶gu̶u̶gpú̶kypyu̶ju̶ñ y ku̶xyu̶ je̱'e̱ aay ujtz tzuxkjatypyu̶.

Chi u̶u̶ch n'ijxy y nmu̶dooyu̶ch ko je̱'e̱ mu̶xywiitz tu'ug tzajp'itkujk kye̱e̱kwu̶díty y myu̶na'añ janch mu̶k: “¡Miich y'yoobu̶ naaxwiiñjya'ay ajku̶xy m'ayo'onbadaangu̶xp miich ko naty je̱'e̱ trompeta ya'axy, je̱'e̱ mu̶dyiibu̶ je̱'e̱ mu̶du̶gu̶u̶kpu̶ ángel jyakyajxu'uxaangu̶xypyu̶ñ!”

Chi je̱'e̱ mu̶me̱tzkpu̶ ángel tyrompeta yajxuuxy, y chi mejyjyooty kya'ay cham jyanchtoy mu̶dyiibu̶ du'un ku̶xu̶'kp neby mu̶jkóptu̶ñ; y chi je̱'e̱ mejy ne'pty tu'kpú̶ky wyimbijty ma je̱'e̱ tu̶gu̶u̶gpú̶kypyu̶ju̶ñ.

Chi je̱'e̱ mu̶du̶gu̶u̶kpu̶ ángel tyrompeta yajxuuxy, y chi mu̶dza'a tu'ug kya'ay tzajpjooty janch mu̶j, cham tyoy neby mu̶jju̶u̶nu̶ñ oy tu'kpú̶ky kyu̶da'agy ma je̱'e̱ tu̶gu̶u̶gpú̶kypyu̶ mu̶jnu̶u̶ y ma je̱'e̱ nu̶u̶ pyu̶dzu̶myu̶ñ. Je̱'e̱ mu̶dza'a je̱' najty je̱'e̱ xyu̶u̶'áty Ta'ambu̶; y chi je̱'e̱ nu̶u̶ ta'am tu'kpú̶ky wyimbijty ma je̱'e̱ tu̶gu̶u̶gpú̶kypyu̶ju̶ñ, y chi je̱'e̱ ja'ay may y'o'kku̶xy je̱' ko je̱'e̱ nu̶u̶ najty jyanchta'amu̶ch.

Chi je̱'e̱ mu̶mu̶daaxkpu̶ ángel tyrompeta yajxuuxy, y chi je̱'e̱ xu̶u̶ tu'kpú̶ky wyindu̶gooy ma je̱'e̱ tu̶gu̶u̶gpú̶kypyu̶ju̶ñ, je̱'e̱ po'o, y je̱'e̱ mu̶dza'a. Chi tu'kpú̶ky koodz wyu̶'u̶my ma je̱'e̱ tu̶gu̶u̶gpú̶kypyu̶ xu̶u̶ po'o y mu̶dza'a ajku̶xyu̶ñ, y ka'p je̱'e̱ xu̶u̶ ka'pxy xu̶u̶m y'aañ ni je̱'e̱ po'o ka'pxy kya'a'aañ tzum.