Apocalipsis 9

1Chi je̱'e̱ mu̶mu̶gooxkpu̶ ángel tyrompeta yajxuuxy, y chi u̶u̶ch je̱'e̱ mu̶dza'a tu'ug n'ijxy tu̶ kya'ay najty tzajpjooty; y chi je̱'e̱ awaatzk yajmooy je̱'e̱ jut ayodaakt awaatz. 2Chi je̱'e̱ jut ayodaakt yaj'awaach, y chi je̱'e̱ jok jiiby jutjooty pyu̶dzu̶u̶my, du'un neby je̱'e̱ mu̶j hoornu̶ joku̶ñ; y chi je̱'e̱ jut ayodaakt jok je̱'e̱ xu̶u̶ yajwingoodzu̶u̶y, y ka'p je̱'e̱ poj y'ok'yo'oyñu̶. 3Chi je̱'e̱ mu̶jjáty mu'u jiiby jokjooty pyu̶dzu̶u̶mgu̶xy y kye̱e̱kwa'kxtaaygyu̶xy ya naaxwiiñ. Y chi je̱'e̱ mu̶k'ajt yajmooygyu̶xy du'un neby je̱'e̱ ka'typy mu̶k'ajt mu̶dajtku̶xyu̶ñ. 4Chi je̱'e̱ ane̱'e̱mu̶ñ yajmooygyu̶xy ko ka'p je̱'e̱ aay ujtz yajwindu̶gooygyu̶xu̶ch mu̶dyiibu̶ ya naaxwiiñ yajpaatpu̶ñ ni je̱'e̱ mu̶dyiibu̶ aay ujtz tzuxk yajpaatpu̶ñ y ni je̱'e̱ kepy tzaa, je̱' je'eyu̶ chaachtyuungu̶xu̶py je̱'e̱ mu̶dyiibu̶ je̱'e̱ Dios chaayu̶ñ ka'p wimbokku̶xy mu̶dajtku̶xyu̶ñ. 5Peru̶ ka'p je̱'e̱ ane̱'e̱mu̶ñ yajmooygyu̶xy ko je̱'e̱ ja'ay yaj'o'kku̶xu̶ch, je'eyu̶ je̱'e̱ tzaachpyu̶ mu̶k mooygyu̶xu̶ch mu̶gooxk po'o; y je̱'e̱ tzaachpyu̶ mu̶dyiibu̶ najty ye̱jkku̶xypyu̶ñ, du'un najty je̱' neby je̱'e̱ ka'typy tyu̶pyu̶ñ. 6Je̱'e̱ mu̶'it xu̶u̶ je̱'e̱ ja'ay y'o'ku̶ñ ja'a'u̶xtaaygyu̶xu̶ch, y ka'p paatku̶xu̶ch; jya'anijoot'ajtku̶xu̶py ko y'o'kku̶xu̶ch peru̶ ka'p je̱'e̱ y'o'ku̶ñ myiingu̶xu̶ch.

7Je̱'e̱ mu̶jjáty mu'u du'un najty je̱'e̱ kyu̶xu̶'kku̶xy neby je̱'e̱ kuwaay ni'ixu̶'u̶ y'ijtku̶xy ñu̶kxaangu̶xy tziptuumbu̶; y ma je̱'e̱ kyu'ubajku̶ñ jim najty mu̶dajtku̶xy mu̶dyiibu̶ du'un ku̶xu̶'kp neby je̱'e̱ ooru̶ korónu̶ju̶ñ, y du'un je̱'e̱ wyiin jyu̶jp neby je̱'e̱ ja'ay wyiin jyu̶jpu̶ñ. 8Du'un je̱'e̱ kyu'uwaay ajku̶xy neby je̱'e̱ to'oxyu̶jk ku'uwaayu̶ñ, y du'un je̱'e̱ tyu̶u̶tz kyu̶xu̶'kku̶xy neby je̱'e̱ jaamgaa tyu̶u̶tzu̶ñ. 9Ma je̱'e̱ ñi'kxu̶ñ je̱'e̱ pujxk najty myu̶dajtku̶xypy mu̶dyiibu̶ niwaanu̶bu̶ñ ajku̶xy, y ko kye̱e̱kwu̶dijtku̶xy du'un je̱'e̱ kye̱e̱kt y'amuugu̶xy neby je̱'e̱ may carreetu̶ mu̶dyiibu̶ je̱'e̱ may kuwaay pyawijchpy ko tziptuumbu̶ ñú̶kxku̶xy. 10Ma je̱'e̱ pyi'ixyu̶ñ jim najty je̱'e̱ tyu̶jpt mu̶dajtku̶xy, y du'un je̱'e̱ tyu̶jpt kyu̶xu̶'kku̶xy neby je̱'e̱ ka'typy tyu̶jptu̶ñ, y jim je̱'e̱ mu̶k'ajt mu̶dajtku̶xy ma je̱'e̱ pyi'ixyu̶ñ neby je̱'e̱ ja'ay du'un mu̶gooxk po'o yaj'ayoogu̶xu̶chu̶ñ. 11Je̱'e̱ mu̶jjáty mu'u windzú̶n ajku̶xy, je̱' je̱' je̱'e̱ ángel mu̶dyiibu̶ jiiby ayodaaktuuby tzombu̶ñ, je̱' je̱'e̱ hebreo'eemby xyu̶u̶'áty Abadón y griego'eemby xyu̶u̶'áty Apolión, je̱'e̱ mu̶dyiibu̶ wimbu̶dzu̶u̶mbu̶ñ yajku'udu̶gooybyu̶.

12Tu̶ je̱'e̱ jayu̶jpu̶ ayo'on ñaxy, peru̶ me̱tzk jyaktu̶goy'atyñu̶.

13Chi je̱'e̱ mu̶dudujkpu̶ ángel tyrompeta yajxuuxy, y chi u̶u̶ch je̱'e̱ ayuuk tu'ug nmu̶dooy choñ jim ma je̱'e̱ mu̶daaxkpu̶ wajkapt agujk ooru̶ pochkyu̶xp, mu̶dyiibu̶ najty jim Dios winduuyu̶ñ. 14Y du'un je̱'e̱ ayuuk myu̶naañ nu̶maay je̱'e̱ mu̶dudujkpu̶ ángel, mu̶dyiibu̶ je̱'e̱ trompeta najty mu̶dajtpu̶ñ: “Mu̶gue̱ju̶'u̶ je̱'e̱ mu̶daaxkpu̶ ángelestu̶jk, je̱'e̱ mu̶dyiibu̶ jim kuxoch ijtku̶xpu̶ñ ma je̱'e̱ Eufrates mu̶jnu̶u̶ju̶ñ.” 15Mu̶'it je̱'e̱ mu̶daaxkpu̶ ángelestu̶jk yajmu̶gue̱ju̶u̶ygyu̶xy, wan je̱'e̱ ja'ay tu'kpú̶ky yaj'o'kku̶xu̶ch je̱'e̱ tu̶gu̶u̶gpú̶kypyu̶, je̱' ko ni'ixu̶'u̶ najty je̱'e̱ y'ijtku̶xnu̶ je̱'e̱ mu̶'it xu̶u̶, je̱'e̱ mu̶'it hooru̶, je̱'e̱ mu̶'it po'o y je̱'e̱ mu̶'it jumu̶jt. 16Y nmu̶doowu̶ch du'uñdyu̶ je̱'e̱ tziptuumbu̶tu̶jk kuwaaygyú̶xpu̶ najty ajku̶xyu̶ñ: me̱jtz mu̶go'px millón najty kyu̶xy'ajttaaygyu̶xy.

17Y du'unu̶ch je̱'e̱ kuwaay kuma'ayjyooty n'ijxy, y je̱'e̱ mu̶dyiibu̶ najty yaj'u̶ñaaygyu̶xpu̶ñ agu̶ pujxk mu̶u̶d najty je̱' ajku̶xy ma je̱'e̱ kyach ajku̶xyu̶ñ, je̱'e̱ mu̶dyiibu̶ je̱'e̱ ñi'kx mu̶u̶d niwaangu̶xyu̶ñ, y je̱' najty je̱'e̱ pujxk kyolor tzaptz, azul y pu'tz. Y du'un je̱'e̱ kuwaay kyu'ubajk najty ajku̶xy neby je̱'e̱ jaamgaa kyu'ubajku̶ñ, y ma je̱'e̱ y'awaku̶ñ jim najty ju̶u̶n pyu̶dzu̶my, ju̶u̶njók y azufre. 18Tu'kpú̶ky je̱'e̱ tu̶gu̶u̶gpú̶kypyu̶ ja'ay y'o'kku̶xy mu̶u̶d je̱'e̱ tu̶gu̶u̶gnáxpu̶ ayo'on, je̱'e̱ mu̶dyiibu̶ najty pu̶dzu̶u̶mb ma je̱'e̱ kuwaay awak ajku̶xyu̶ñ; ju̶u̶n, ju̶u̶njók y azufre. 19Je̱' ko jim najty je̱'e̱ kuwaay mu̶k'ajt mu̶dajtku̶xy ma je̱'e̱ y'awaku̶ñ y ma je̱'e̱ pyi'ixyu̶ñ; du'un je̱'e̱ pyi'ixy najty ajku̶xy neby je̱'e̱ tza'añdyu̶ñ y ku'ubajk mu̶u̶d, y je̱' je̱'e̱ ja'ay najty tzaachpyu̶mooygyu̶xy.

20Peru̶ je̱'e̱ ja'ay mu̶dyiibu̶ jakwu̶'u̶mgu̶xu̶ñ, je̱'e̱ mu̶dyiibu̶ ka'p y'o'kku̶xy mu̶u̶d adayaaba ayo'on, ni chamnu̶baad je̱'e̱ ju̶bu̶kpu̶ ka'a'u̶xmajtzku̶xyñu̶, je̱'e̱ mu̶dyiibu̶ najty tyuungu̶xypyu̶ñ, je̱'e̱ ka'a'óybyu̶ windzu̶gu̶'u̶wu̶u̶, je̱'e̱ tzaadzéch kepychech windzu̶gu̶'u̶wu̶u̶ ni je̱'e̱ mu̶dyiibu̶ oydyuñu̶ñ mu̶u̶d je̱'e̱ ooru̶, mu̶u̶d je̱'e̱ platu̶ y mu̶u̶d je̱'e̱ bronce y je̱'e̱ mu̶dyiibu̶ ka'p y'ijxku̶xy myu̶doogu̶xyu̶ñ y ka'p yo'oygyu̶xy ñajxku̶xyu̶ñ. 21Y ni ka'a'u̶xmajtzku̶xyñu̶ neby jya'ayyaj'o'kku̶xyu̶ñ, y neby kyu̶xpojkku̶xyu̶ñ, neby je̱'e̱ wiingpu̶ to'oxyu̶jk tu'ug tu'ug mu̶dtuundu̶gooygyu̶xyu̶ñ y neby myé̱tzku̶xyu̶ñ.

Currently Selected:

Apocalipsis 9: MIXE

Highlight

Copy

Compare