Apocalipsis 5

Je̱'e̱ naky abu̶dity ja'aybyu̶, y je̱'e̱ Borreegu̶'úng

1Chi u̶u̶ch n'ijxy ma je̱'e̱ y'a'oygyu̶'u̶ju̶ñ, je̱'e̱ mu̶dyiibu̶ najty u̶ñaaby ma je̱'e̱ ane̱'e̱mdaaktu̶ñ tu'ug naky abu̶dity jya'ayu̶ch winduuy y ju̶xku̶'u̶by, aduky je̱'e̱ y juxtujk'ook cha'ayu̶ch. 2Y n'ijxu̶ch je̱'e̱ ángel tu'ug mu̶dyiibu̶ mu̶k'ajt mu̶k mu̶dajtpu̶ñ yajtú̶y janch mu̶k: “¿Pu̶n paattu̶p yaj'awa'adzu̶ch je̱'e̱ naky abu̶dity y katzku̶u̶dzu̶ch je̱'e̱ sellu̶?” 3Peru̶ ni jiiby tzajpjooty ni ya naaxwiiñ ni naaxpa'tku̶'u̶by najty kya'a'íty pu̶n je̱'e̱ naky abu̶dity yaj'awa'adzu̶bu̶ñ y pu̶n íxu̶bu̶ñ. 4Y u̶u̶ch janch yaaxpu̶ch najty, je̱' ko najty ni pu̶n tu̶ kya'ayajpaady pu̶n je̱'e̱ naky abu̶dity yaj'awa'adzu̶bu̶ñ y pu̶n íxu̶bu̶ñ. 5Peru̶ chi u̶u̶ch je̱'e̱ amu̶jja'aydyu̶jk nidu'ugtu̶ xyñu̶maay: “Ka'p myaaxnu̶, tu̶ je̱'e̱ mu̶k'ajt mu̶u̶dpu̶ je̱'e̱ ju̶bu̶kpu̶ mu̶mada'agy ma je̱'e̱ judaja'ayu̶ñ, je̱'e̱ mu̶dyiibu̶ du'un neby je̱'e̱ jaamgaaju̶ñ, je̱'e̱ ane̱'e̱mbu̶ David y'ok'ung y'o'k'ana'k. Y je̱'e̱ju̶tz je̱'e̱ naky abu̶dity mu̶baad yaj'awa'ach y katzku̶u̶dzu̶ch je̱'e̱ juxtujkpu̶ sellu̶.”

6Mu̶'it u̶u̶ch n'ijxy kujkjooty ma je̱'e̱ ane̱'e̱mdaakt y ma je̱'e̱ mu̶daaxkpu̶ juugypyu̶ ju̶yujk y ma je̱'e̱ amu̶jja'aydyu̶jk kyujkjootyu̶ñ; tyu̶na'ay Borreegu̶'úng tu'ug, oy najty du'un jya'aku̶xu̶'u̶gy neby du'umbu̶ najty tu̶ wyindzu̶gu̶'u̶ñ'átyu̶ñ. Juxtujk najty kyapt je̱' y juxtujk wyiin, y je̱' je̱' je̱'e̱ juxtujkpu̶ Dios y'espíritu mu̶dyiibu̶ ku̶xyu̶ naaxwiiñ kye̱jxu̶ñ. 7Chi je̱'e̱ Borreegu̶'úng ñu̶kxy ma je̱'e̱ mu̶dyiibu̶ najty u̶ñaaby ma je̱'e̱ ane̱'e̱mdaaktu̶ñ y ku̶u̶ychooy je̱'e̱ naky abu̶dity mu̶dyiibu̶ najty myu̶u̶d ma je̱'e̱ y'a'oygyu̶'u̶ju̶ñ; 8y ko je̱'e̱ naky abu̶dity ku̶u̶ychooy, mu̶'it je̱'e̱ mu̶daaxkpu̶ juugypyu̶ ju̶yujk y je̱'e̱ ipxmu̶daaxkpu̶ amu̶jja'aydyu̶jk ñayñajtzkojxtu̶na'awu̶u̶yu̶gu̶xy ma je̱'e̱ Borreegu̶'úng winduuyu̶ñ. Nigu̶xyu̶ najty je̱'e̱ arpu̶ mu̶dajtku̶xy y mu̶nú̶kxku̶xy je̱'e̱ ooru̶ koopu̶ ujtzjáty mu̶u̶d je̱'e̱ poom, y je̱'e̱ poom najty du'un yajmu̶baadku̶xypy neby je̱'e̱ myu̶bu̶jktzoowu̶ñ ajku̶xyu̶ñ, je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ. 9Y adayaaba jembyu̶ u̶y najty y'u̶u̶gu̶xypy:

“Miich xypyaatp mgu̶u̶ychówu̶ch je̱'e̱ naky abu̶dity, y mgatzku̶u̶dzu̶ch je̱'e̱ sellu̶.

Je̱' ko tu̶ miich mwindzu̶gu̶'u̶ñ'áty

y mdeemy m'yojky je̱'e̱ mne'pty y du'un miich je̱'e̱ ja'ay ñu̶u̶ pyoky

tu̶ myajni'iwa'ach neby yajpaatku̶xu̶ch ma je̱'e̱ Diosu̶ñ

ku̶xyu̶ mu̶dyiibu̶ je̱'e̱ ñi'kx kyopt kyolor tu̶gachjyatyu̶ñ ajku̶xy, mu̶dyiibu̶ tu̶gachjyaty kápxku̶xpu̶ñ,

mu̶dyiibu̶ mutzk naax mutzk kajpt tzóngu̶xpu̶ñ y du'uñdyu̶ je̱'e̱ naax kajpt kyu̶xy'atyu̶ñ.

10Tu̶ miich je̱'e̱ ane̱'e̱mbu̶ mbu̶da'agy ma je̱'e̱ ja'ayu̶ñ,

tu̶ miich je̱'e̱ mu̶jtuungmu̶u̶dpu̶ mbu̶da'agy ko u̶u̶ch je̱'e̱ nDios xymyu̶duunu̶ch ajku̶xy neby je̱'e̱ teedyu̶ñ,

y ane̱'e̱mgu̶xu̶p ya naaxwiiñ.”

11Chi u̶u̶ch n'ijxy y nmu̶dooyu̶ch ko je̱'e̱ ángelestu̶jk nimay kyápxku̶xy myu̶dyaakku̶xy ju'uwu̶dítyu̶ ma je̱'e̱ ane̱'e̱mdaaktu̶ñ, ma je̱'e̱ nimu̶daaxkpu̶ juugypyu̶ ju̶yujku̶ñ y ma je̱'e̱ amu̶jja'aydyu̶jku̶ñ. Janch ka'anaag millón najty je̱'e̱ ángelestu̶jk ajku̶xy, 12y myu̶naangu̶xy janch mu̶kjaty:

“¡Je̱'e̱ Borreegu̶'úng mu̶dyiibu̶ windzu̶gu̶'u̶ñ'ajtu̶ñ

je̱' paattu̶p mu̶dádu̶ch je̱'e̱ mu̶k'ajt y oy'ajtu̶ñ, y je̱'e̱ wij'ajt ke̱j'ajtu̶ñ y je̱'e̱ mu̶j'ajtu̶ñ,

je̱'e̱ windzu̶gu̶u̶yu̶ñ, je̱'e̱ ku'umaayu̶ñ y je̱'e̱ win'u̶u̶w winyaaxu̶ñ!”

13Y nmu̶doowu̶ch nandu'un ko ku̶xyu̶ mu̶dyiibu̶ je̱'e̱ Dios yajkoju̶ñ mu̶dyiibu̶ jiiby tzajpjooty, y mu̶dyiibu̶ ya naaxwiiñ, mu̶dyiibu̶ jiiby naaxpa'tku̶'u̶by mu̶dyiibu̶ jiiby mejyjyootyu̶ñ, myu̶naangu̶xy:

“¡Je̱'e̱ mu̶dyiibu̶ jiiby u̶ñaaby ma je̱'e̱ ane̱'e̱mdaaktu̶ñ y je̱'e̱ Borreegu̶'úng, je̱' je̱'e̱ win'u̶u̶w winyaaxu̶ñ, je̱'e̱ windzu̶gu̶u̶yu̶ñ, je̱'e̱ ku'umaayu̶ñ,

y je̱'e̱ mu̶k'ajt paattu̶p wiinu̶u̶xu̶u̶ wiinu̶u̶jumu̶jt!”

14Je̱'e̱ mu̶daaxkpu̶ juugypyu̶ ju̶yujk du'un najty je̱'e̱ y'adzoogu̶xy: “¡Jaanch adaa du'un!” Y je̱'e̱ ipxmu̶daaxkpu̶ amu̶jja'aydyu̶jk nayñajtzkojxtu̶na'awu̶u̶yu̶gu̶x je̱' y windzu̶gu̶u̶y o'owu̶dajtku̶xy je̱'e̱ Dios.

Currently Selected:

Apocalipsis 5: MIXE

Highlight

Copy

Compare