Apocalipsis 6

Je̱'e̱ juxtujkpu̶ sellu̶

1Chi u̶u̶ch n'ijxy neby je̱'e̱ Borreegu̶'úng je̱'e̱ juxtujkpu̶ sellu̶ tu'ug agu̶tztuutyu̶ñ y nmu̶dooyu̶ch ko nidu'ugtu̶ je̱'e̱ mu̶daaxkpu̶ juugypyu̶ ju̶yujk janch mu̶k myu̶na'añ du'un neby je̱'e̱ ane̱e̱ jyu̶dityu̶ñ: “¡Min!” 2Y chi u̶u̶ch je̱'e̱ poob kuwaay tu'ug n'ijxy, y je̱'e̱ mu̶dyiibu̶ najty yaj'u̶ñaaybyu̶ñ jim najty tu̶p je̱'e̱ tu'ug ku̶'u̶yu̶ch. Chi je̱'e̱ koronu̶ tu'ug yajmooy, y mu̶jadaak ma je̱'e̱ tzipu̶ñ y nan mu̶jada'agaamnu̶ nandu'un.

3Ko je̱'e̱ Borreegu̶'úng je̱'e̱ mu̶me̱tzkpu̶ sellu̶ agu̶tztuuty, chi u̶u̶ch nmu̶dooy ko je̱'e̱ mu̶me̱tzkpu̶ juugypyu̶ ju̶yujk myu̶na'añ: “¡Min!” 4Y chi je̱'e̱ kuwaay ja'adu'ug pyu̶dzu̶u̶my. Tzaptz najty kyolor je̱', y je̱'e̱ mu̶dyiibu̶ najty yaj'u̶ñaaybyu̶ñ yajmooy mu̶k'ajt je̱' neby je̱'e̱ naaxwiiñjya'ay yajwinma'añdyu̶góyu̶chu̶ñ ka'pu̶ ñaymyu̶jootkujk'ajtu̶gu̶xu̶ch y neby amíñ u̶xyu̶py ñayyaj'o'ku̶gu̶xu̶chu̶ñ, y yajmooy mu̶j pujxk tu'ug.

5Ko je̱'e̱ Borreegu̶'úng je̱'e̱ mu̶du̶gu̶u̶kpu̶ sellu̶ agu̶tztuuty, chi u̶u̶ch nmu̶dooy ko je̱'e̱ mu̶du̶gu̶u̶kpu̶ juugypyu̶ ju̶yujk myu̶na'añ: “¡Min!” Y chi u̶u̶ch je̱'e̱ tzixy kuwaay tu'ug n'ijxy, y je̱'e̱ mu̶dyiibu̶ najty yaj'u̶ñaaybyu̶ñ jim najty kipxu̶'u̶ñ je̱'e̱ tu'ug wíchu̶ch. 6Y chi u̶u̶ch je̱'e̱ ayuuk tu'ug nmu̶dooy myu̶na'añ ma je̱'e̱ mu̶daaxkpu̶ juugypyu̶ ju̶yujk kyujkjootyu̶ñ: “Je̱'e̱ tu'kkiilu̶ba trigo tu'kxu̶u̶ kudúñ je̱'e̱ chobe̱da'añ, y je̱'e̱ tu̶gu̶u̶g kiilu̶ba cebada tzajkaagy tu'kxu̶u̶ kudúñ je̱'e̱ chobe̱da'añ; peru̶ ka'p je̱'e̱ aceetyu̶ ni je̱'e̱ viino myaj'u̶x'ayoogu̶xy.”

7Ko je̱'e̱ Borreegu̶'úng je̱'e̱ mu̶mu̶daaxkpu̶ sellu̶ agu̶tztuuty, chi u̶u̶ch nmu̶dooy ko je̱'e̱ mu̶mu̶daaxkpu̶ juugypyu̶ ju̶yujk myu̶na'añ: “¡Min!” 8Y chi u̶u̶ch je̱'e̱ pu'tz kuwaay tu'ug n'ijxy, y je̱'e̱ mu̶dyiibu̶ najty yaj'u̶ñaaybyu̶ñ je̱' najty je̱'e̱ xyu̶u̶'áty o'kpu̶. Y u̶x'aam najty myiñ je̱'e̱ mu̶dyiibu̶ je̱'e̱ it lugaar ane̱'e̱mb ma je̱'e̱ o'kpu̶ ñi'igu̶daakku̶xyu̶ñ y yajmooy je̱'e̱ mu̶k'ajt neby je̱'e̱ naaxwiiñjya'ay tu'kpú̶ky yaj'ayówu̶chu̶ñ ma je̱'e̱ mu̶daaxpú̶kypyu̶ju̶ñ, neby tzipjooty yaj'o'kku̶xu̶chu̶ñ, neby yaj'yu'o'kku̶xu̶chu̶ñ, neby yajpa'am'o'kku̶xu̶chu̶ñ y neby yaj'o'kku̶xu̶chu̶ñ mu̶u̶d je̱'e̱ awa'an ju̶yujk mu̶dyiibu̶ ya naaxwiiñu̶ñ.

9Ko je̱'e̱ Borreegu̶'úng je̱'e̱ mu̶mu̶gooxkpu̶ sellu̶ agu̶tztuuty, chi u̶u̶ch poch pya'tku̶'u̶by n'ijxy ma je̱'e̱ windzu̶gu̶'u̶ñ yaj'yékyu̶ñ je̱'e̱ y'aanu̶mu̶ ajku̶xy, je̱'e̱ mu̶dyiibu̶ ku'u'o'ogu̶u̶ygyu̶xu̶ñ ko je̱'e̱ Dios y'ayuuk tyu̶y'ajt kapxwa'kxku̶xy. 10Du'un mu̶kjaty jyanchmu̶naangu̶xy: “Windzú̶n mu̶jpu̶ wa'atzpu̶ y tu'uda'agypyu̶, ¿mu̶naa je̱'e̱ naaxwiiñjya'ay mdu̶ydyuna'añ y myaj'awimbida'añ ko u̶u̶ch tu̶ xyaj'o'kku̶xy?” 11Mu̶'it je̱'e̱ poob wit yajmooygyu̶xy, y yajnu̶maaygyu̶xy ko wan tzojku̶ jakpókxku̶xy, u̶xtu̶ koonu̶ kya'pxu̶ch mu̶u̶d je̱'e̱ myu̶gu'ugtu̶jk mu̶dyiibu̶ jak'o'ogaangu̶xpu̶ñ, du'un neby je̱' ajku̶xyu̶ñ ko je̱'e̱ Cristo mu̶duungu̶xy.

12Ko je̱'e̱ Borreegu̶'úng je̱'e̱ mu̶dudujkpu̶ sellu̶ agu̶tztuuty, chi mu̶k temblor ñajxy. Chi je̱'e̱ xu̶u̶ tzixy jyajty, du'un neby je̱'e̱ tzixy wit mu̶dyiibu̶ je̱'e̱ ja'ay pyu̶daakypy ko je̱'e̱ jyuugy myu̶gu'ug naty tu̶ y'o'kku̶xy. Y je̱'e̱ po'o tzaptz je̱'e̱ jyajty, du'un neby je̱'e̱ ne'ptyu̶ñ. 13Y ka'aw je̱'e̱ mu̶dza'a tzajpjooty, du'un neby je̱'e̱ higueeru̶ chux tu̶u̶m'úng kya'ayu̶ñ ko je̱'e̱ mu̶kpoj ñaxy. 14Chi je̱'e̱ tzajp y'adu̶goyu̶u̶y du'un neby je̱'e̱ naky y'abu̶dijtmúkyu̶ñ, y ku̶xyu̶ je̱'e̱ kopt y je̱'e̱ naax mejy'agujkpu̶ jyu̶du̶gajtznajxtaay ma najty y'ijtku̶xyu̶ñ. 15Y chi je̱'e̱ naaxwiiñ ane̱'e̱mbu̶du̶jk ñayyu'tztaayu̶gu̶xy ma je̱'e̱ tzaa'aangu̶ñ y tzaa'agujk, kipxy mu̶u̶d je̱'e̱ windzu̶ndu̶jk, je̱'e̱ tziptuumbu̶ windzu̶ndu̶jk, je̱'e̱ kumeeñjya'aydyu̶jk y je̱'e̱ mu̶dyiibu̶ je̱'e̱ mu̶j'ajt mu̶dajtku̶xpu̶ñ y ku̶xyu̶ je̱'e̱ ja'ay ni'idoogypyu̶ y ka'pu̶ ñi'idoogyu̶ch 16y nu̶maaygyu̶xy je̱'e̱ tun kopt y je̱'e̱ tzaagópt: “¡Ni'ija'abe̱jtku̶ch ajku̶xy y yu'tzku̶ch ajku̶xy ka'pu̶ u̶u̶ch je̱'e̱ wyiin jyu̶jp n'ijxu̶ch ajku̶xy, je̱'e̱ mu̶dyiibu̶ u̶ñaaby ma je̱'e̱ ane̱'e̱mdaaktu̶ñ, y ka'pu̶ u̶u̶ch je̱'e̱ Borreegu̶'úng tzaachpyu̶ xymyooygyu̶xu̶ch! 17Je̱' ko tu̶ je̱'e̱ xu̶u̶ tiempo paady mu̶naa je̱'e̱ naaxwiiñjya'ay mu̶k yajtzaachtyuungu̶xu̶chu̶ñ, ¿y pu̶n da'a mu̶baad okmu̶mada'agy?”

Currently Selected:

Apocalipsis 6: MIXE

Highlight

Copy

Compare