Apocalipsis 4
4
Neby je̱'e̱ Dios jiiby tzajpjooty yajwindzu̶gu̶'u̶y yaj'o'owu̶dátyu̶ñ
1Ko adaa du'un tyuunu̶ jyajtu̶, chi u̶u̶ch je̱'e̱ tu̶jk'agu̶'u̶ tu'ug n'ijxy awa'adz jiiby tzajpjooty, y xyñu̶maayu̶ch je̱'e̱ ayuuk je̱'e̱ mu̶dyiibu̶ u̶u̶ch najty jayu̶jp tu̶ n'okmu̶doobu̶ju̶ñ neby je̱'e̱ trompeta ya'axyu̶ñ: “Pe̱t yaa y nyajni'ixu̶'u̶wu̶py ku̶xyu̶ tijaty tunaan jadaanu̶bu̶ñ jiinu̶ ko naty adayaaba tiempo tu̶ y'oknaxy.”
2Je̱'e̱ mu̶'ítyu̶ch je̱'e̱ Dios y'Espíritu Santo xyajtu̶gu̶u̶y, y n'ijxyu̶ch ane̱'e̱mdaakt tu'ug jiiby tzajpjooty, y y'u̶ña'ay je̱'e̱ ja'ay nidu'ugtu̶ ma je̱'e̱ ane̱'e̱mdaaktu̶ñ. 3Je̱'e̱ mu̶dyiibu̶ najty jim u̶ñaaybyu̶ñ ma je̱'e̱ ane̱'e̱mdaaktu̶ñ du'un najty je̱'e̱ kyu̶xu̶'u̶gy neby je̱'e̱ jaspe tzaa o kornalina tzaa janch oy kyu̶xu̶'u̶gyu̶ñ, y ma je̱'e̱ ane̱'e̱mdaakt ju'uwu̶dítyu̶ñ jim najty i'inch tu'ug mu̶dyiibu̶ du'un adu̶kxp ajajp neby je̱'e̱ esmeralda tzaaju̶ñ. 4Nan ma je̱'e̱ ane̱'e̱mdaakt ju'uwu̶dítyu̶ñ n'ijxu̶ch wiingpu̶ ane̱'e̱mdaakt ipxmu̶daaxk, ma je̱'e̱ amu̶jja'aydyu̶jk najty ipxmu̶daaxk y'u̶ñaaygyu̶xyu̶ñ agu̶ poob wit mu̶u̶d ajku̶xy y mu̶dajtku̶xy ooru̶ corona ma je̱'e̱ kyu'ubajku̶ñ. 5Ma je̱'e̱ ane̱'e̱mdaaktu̶ñ jim najty wu̶dzuk pyu̶dzu̶my, yajmu̶dóy je̱'e̱ ne̱'e̱mu̶ñ y ya'axy jyoky je̱'e̱ ane̱e̱ najty jim; y ane̱'e̱mdaakt winduuy najty tziinwáty juxtujk tyoy, je̱' je̱'e̱ du'un je̱'e̱ juxtujkpu̶ Dios y'espíritu. 6Ane̱'e̱mdaakt winduuy najty tu'ug mu̶dyiibu̶ du'un ku̶xu̶'kpu̶ñ neby mejyu̶ñ, yaj'ijxnajxp neby ijxku̶ñ.
Kujkjooty ma je̱'e̱ ane̱'e̱mdaakt najtyu̶ñ y ju'uwu̶dítyu̶, jim najty juugypyu̶ ju̶yujk mu̶daaxk, mu̶dyiibu̶ wyiin janch mayu̶ñ winduuy y ju̶xku̶'u̶by. 7Je̱'e̱ jayu̶jpu̶ ju̶yujk du'un najty je̱'e̱ kyu̶xu̶'u̶gy neby jaamgaaju̶ñ, je̱'e̱ mu̶me̱tzkpu̶ du'un najty je̱'e̱ kyu̶xu̶'u̶gy neby waj'úng ya'aybyu̶ju̶ñ, je̱'e̱ mu̶du̶gu̶u̶kpu̶ du'un je̱'e̱ wyiin jyu̶jp neby ja'ayu̶ñ, y je̱'e̱ mu̶madaaxkpu̶ neby ku'uwaj kye̱e̱kwu̶dítyu̶ñ. 8Tudujkjáty je̱'e̱ mu̶daaxkpu̶ juugypyu̶ ju̶yujk kye̱e̱kt najty nidu'ugjáty nidu'ugjáty ajku̶xy, y janch may je̱'e̱ wyiin ke̱e̱kni'igu̶xy y ke̱e̱kpa'tku̶'u̶by ajku̶xy. Xu̶u̶m tzum je̱'e̱ Dios ja'aymye̱jtz o'owu̶dajtku̶xy myu̶naangu̶xy:
“¡Janch oy janch wa'adz je̱'e̱ Windzú̶n,
je̱'e̱ Dios mu̶jmu̶k'ajtmu̶u̶dpu̶,
je̱'e̱ mu̶dyiibu̶ jékyu̶p Dios'ajtu̶ñ y je̱'e̱ mu̶dyiibu̶
cham Dios'ajtpu̶ñ y je̱'e̱ mu̶dyiibu̶ minaambu̶ñ!”
9-10Naag'ook naag'ook je̱'e̱ juugypyu̶ ju̶yujk ku'umaay ja'aymye̱jtzku̶xy y windzu̶gu̶u̶ygyu̶xy y ye̱jkku̶xy je̱'e̱ Dioskujuuyu̶p ma je̱'e̱ Diosu̶ñ je̱'e̱ mu̶dyiibu̶ wiinu̶u̶xu̶u̶ tzu̶naaby jugy'ajtpu̶ñ. Chi je̱'e̱ ipxmu̶daaxkpu̶ amu̶jja'aydyu̶jk wingojxtu̶naaygyu̶xy je̱'e̱ mu̶dyiibu̶ u̶ñaaby ma je̱'e̱ ane̱'e̱mdaaktu̶ñ, y windzu̶gu̶u̶y o'owu̶dajtku̶xy y najtzju̶bipu̶u̶ygyu̶xy je̱'e̱ kyoronu̶ jim ane̱'e̱mdaakt winduuy; cham myu̶naangu̶xy:
11“Miich xypyaatp Windzú̶n y u̶u̶ch nDios ajku̶xy,
myajmo'owu̶ch je̱'e̱ ku'umaay ja'aymye̱jtzu̶ñ, je̱'e̱ windzu̶gu̶u̶yu̶ñ y mu̶k'ajtu̶ñ.
Je̱' ko miich ku̶xyu̶ wiinu̶ tu̶ myajkojy,
y paady jii ku̶xyu̶ tii yajpaady y tu̶ myajkojy, je̱' ko du'un tu̶ mdzoky.”
Currently Selected:
Apocalipsis 4: MIXE
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
