Apocalipsis 19

1Kujeky ko najty adaa du'un tu̶ y'oktúñ y'okjadyii, chi u̶u̶ch je̱'e̱ ayuuk janch mu̶k nmu̶dooy ko je̱'e̱ mayjya'ay jiiby tzajpjooty myu̶naangu̶xy:

“¡Windzu̶gu̶'u̶y je̱'e̱ Windzú̶n y'ity!

Je̱'e̱ aanu̶mu̶ ni'idzooku̶ñ, je̱'e̱ oy'ajtu̶ñ y je̱'e̱ mu̶k'ajtu̶ñ

je̱'e̱ Dios je̱'e̱ ku̶xyu̶ ku̶'u̶'aam'ajtp,

2Je̱' ko je̱' tu'uda'agy tu̶ydyuumb

y mu̶u̶d je̱'e̱ tu̶y'ajtu̶ñ tyu̶ydyúñ.

Tu̶ je̱'e̱ majto'oxyu̶jk ayo'onmo'oy,

je̱'e̱ mu̶dyiibu̶ je̱'e̱ ya'aydyu̶jktu̶jk tu'ug tu'ug mu̶dtuundu̶goobyu̶ñ,

je̱'e̱ mu̶dyiibu̶ je̱'e̱ naaxwiiñjya'ay win'u̶u̶nu̶ñ mu̶u̶d je̱'e̱ jyu̶bu̶kwinma'añ.

Tu̶ yaj'awimbíty ma je̱'e̱ jimbu̶ Babilonia kajptu̶ñ

ko je̱'e̱ Dios tyuumbu̶du̶jk jim yaj'o'kku̶xu̶.”

3Chi ja'adu'ook myu̶naangu̶xnu̶ba:

“¡Windzu̶gu̶'u̶y je̱'e̱ Windzú̶n y'ity!

Je̱'e̱ ju̶u̶njók pa'ttu̶gu̶u̶ydyu̶waamb je̱'e̱ tzajpjooty

ma je̱'e̱ majto'oxyu̶jk tu̶ yajni'ino'ogyu̶ñ

mu̶dyiibu̶ je̱'e̱ ya'aydyu̶jktu̶jk tu'ug tu'ug mu̶dtuundu̶gooybyu̶ñ,

y ni mu̶naa je̱'e̱ kya'api'idzu̶ch.”

4Y chi je̱'e̱ ipxmu̶daaxkpu̶ amu̶jja'aydyu̶jk y je̱'e̱ mu̶daaxkpu̶ juugypyu̶ ju̶yujk ñayñajtzkojxtu̶na'awu̶u̶yu̶gu̶xy naaxkú̶xy y o'owu̶dajtku̶xy je̱'e̱ Dios, je̱'e̱ mu̶dyiibu̶ najty jim u̶ñaaby ma je̱'e̱ ane̱'e̱mdaaktu̶ñ. Y myu̶naangu̶xy: “¡Jaanch ada du'un! ¡Windzu̶gu̶'u̶y je̱'e̱ Windzú̶n y'ity!” 5Chi je̱'e̱ ayuuk yajmu̶dooy ma je̱'e̱ ane̱'e̱mdaaktu̶ñ myu̶na'añ:

“¡Windzu̶gu̶u̶ygyu̶x je̱'e̱ nDios ajtu̶m ajku̶xy

nigu̶xyu̶ miich ajku̶xy myu̶ju̶ch myútzku̶ch,

nigu̶xyu̶ miich ajku̶xy mu̶dyiibu̶ je̱'e̱ Dios mu̶duungu̶xpu̶ñ

y windzu̶gu̶u̶ygyu̶xpu̶ñ!”

Je̱'e̱ pu̶jkpu̶ Borreegu̶'úng yajwinxu̶u̶dúñ

6Nan nmu̶doowu̶ch du'un neby je̱'e̱ mayjya'ay y'amayu̶'u̶yu̶ñ, du'un neby je̱'e̱ mu̶jnu̶u̶ may'it y'u̶u̶chu̶ñ y neby je̱'e̱ ane̱e̱ mu̶k jyu̶dityu̶ñ. Myu̶naangu̶xy:

¡Windzu̶gu̶'u̶y je̱'e̱ Windzú̶n y'ity!

Je̱' ko tu̶ y'ane̱'e̱mdu̶gu̶'u̶y je̱'e̱ Windzú̶n,

je̱'e̱ nDios mu̶jmu̶k'ajtmu̶u̶dpu̶ ajtu̶m ajku̶xy.

7Jootkugu̶u̶yu̶m ajku̶xy,

xondaaku̶m ajku̶xy y ku'umaayu̶m ajku̶xy,

je̱' ko je̱'e̱ xu̶u̶ tiempo tu̶ paady

mu̶naa je̱'e̱ Borreegu̶'úng pyu̶ga'añu̶ñ.

Tu̶ je̱'e̱ tyo'oxyu̶jk ñayñi'ixu̶u̶yu̶nu̶:

8tu̶ je̱'e̱ ane̱'e̱mu̶ñ yajmo'oy ko ñaygyubu̶gu̶u̶wu̶ch

mu̶u̶d je̱'e̱ lino wit oyjyatypyu̶, wa'adzpu̶ y adu̶kxp ajajpu̶,

je̱' ko je̱'e̱ lino wit oyjyatypyu̶ je̱' je̱'e̱ du'un tyijpy je̱'e̱ tu'uda'agypyu̶ ja'ay'ajtu̶ñ

je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ.”

9Je̱'e̱ ángel u̶u̶ch xyñu̶maay: “Kuja'aw adaa: ‘Jootkujk je̱'e̱ mu̶dyiibu̶ tu̶ yajwoogu̶xy ma je̱'e̱ pu̶jkpu̶ Borreegu̶'úng yajwinxu̶u̶dúñu̶ñ.’ ” Y chi u̶u̶ch xyjyaknu̶maay: “Adaa, je̱'e̱ jaanchpyu̶ Dios ayuuk tu̶y'ajtpu̶ adaa.”

10Chi u̶u̶ch nnayñajtzkojxtu̶na'awu̶u̶yu̶ ma je̱'e̱ ángel tyekymyu̶jku̶ñ nwindzu̶gu̶'u̶wa'añu̶ch, peru̶ je̱' u̶u̶ch xyñu̶maay: “Ka'p du'un m'adu̶'u̶ch, Dios mu̶duumbu̶ju̶ch u̶u̶ch nandu'un, du'un neby miichu̶ñ y neby je̱'e̱ mmu̶gu'ugtu̶jk mu̶dyiibu̶ je̱'e̱ Jesús ñidu̶y'ajt'ajt tu'uda'agy paduungu̶xpu̶ñ. Windzu̶gu̶'u̶ je̱'e̱ Dios.”

Je̱' ko je̱'e̱ Jesús ñidu̶y'ajt'ajtu̶ñ je̱'e̱ Dios y'ayuuk najtzkapxu̶u̶ybyu̶du̶jk pube̱jtu̶p ajku̶xy.

Je̱'e̱ poob kuwaay u̶ñaaybyu̶

11Chi u̶u̶ch je̱'e̱ tzajp awa'adz n'ijxy, y chi je̱'e̱ poob kuwaay tu'ug y'abu̶dzu̶mu̶u̶y, y je̱'e̱ mu̶dyiibu̶ najty yaj'u̶ñaaybyu̶ñ je̱' najty je̱'e̱ xyu̶u̶'áty Tu'uda'agypyu̶ y Tu̶y'ajtpu̶, je̱' ko najty tu'uda'agy y'ane'emy y tu'uda'agy chiptúñ. 12Du'un najty je̱'e̱ wyiin y'adu̶kxy neby je̱'e̱ ju̶u̶nyé̱ngu̶ñ, may corona najty kyu'uje̱n'ajtypy y jim najty xu̶u̶ tu'ug yujkja'ayu̶ch, y ka'p najty je̱'e̱ ni pu̶n u̶xkapy, je̱'e̱du̶'ajty najty je̱'e̱ u̶xkajp. 13Ne'pty je̱'e̱ wyit najty mu̶u̶d y'uukyu̶ch, y xyu̶u̶'áty: Je̱'e̱ Dios Y'ayuuk. 14Tzajpjootypyu̶ tziptuumbu̶du̶jk najty panú̶kxu̶gu̶xp, kyubú̶kyu̶ch ajku̶xy mu̶u̶d je̱'e̱ lino wit oyjyatypyu̶, poobpu̶ y wa'adzpu̶, y y'u̶ñaaygyu̶xy poob kuwaaygyú̶xp. 15Ma je̱'e̱ y'awaku̶ñ pujxk espaadu̶ ju̶jpu̶ najty tu'ug pyu̶dzu̶my, neby je̱'e̱ naax kajpt du'un yajtzu̶chu̶'u̶wa'añu̶ñ. Ane̱'e̱ma'añ mu̶k mu̶u̶d je̱'e̱ mu̶kpu̶ ane̱'e̱mu̶ñ. Y tu̶ydyuna'añ mu̶k du'un neby je̱'e̱ ja'ay uva winmu̶kxyu̶ñ y te̱nmoody mu̶u̶d je̱'e̱ tyeky, y tzaachtyuna'añ mu̶k, du'un neby je̱'e̱ viino mu̶kpu̶ yaj'u'uga'añu̶ñ, je̱'e̱ mu̶dyiibu̶ je̱'e̱ Dios chaachpyu̶ y jyootma'tu̶ñ mu̶miimbu̶ñ, je̱'e̱ Dios mu̶jmu̶k'ajtmu̶u̶dpu̶. 16Jim wyitku̶xp y pyuuygyú̶xp najty je̱'e̱ xyu̶u̶ kyuja'ayu̶ch: “Je̱'e̱ Ane̱'e̱mbu̶ mu̶dyiibu̶ Ane̱'e̱mb ma je̱'e̱ ane̱'e̱mbu̶du̶jku̶ñ y je̱'e̱ Windzú̶n mu̶dyiibu̶ Windzu̶n'ajtp ma je̱'e̱ windzu̶ndu̶jku̶ñ.”

17Y chi u̶u̶ch je̱'e̱ ángel tu'ug n'ijxy tyu̶na'ay ma je̱'e̱ xu̶u̶ju̶ñ, yaaxu̶ janch mu̶k ku̶xyu̶ je̱'e̱ joon luud mu̶dyiijáty tzajpkú̶xy ke̱e̱kwu̶dijtku̶xpu̶ñ: “¡Miingu̶x y naymyujku̶gu̶x ma je̱'e̱ Dios myu̶j'adzuuju̶ñ. 18Wan je̱'e̱ ane̱'e̱mbu̶du̶jk chu'uch mdzu'tzu̶ch ajku̶xy, je̱'e̱ tziptuumbu̶ windzu̶ndu̶jk chu'uch ajku̶xy y je̱'e̱ jootmu̶kja'ay chu'uch ajku̶xy, je̱'e̱ kuwaay chu'uch y mu̶u̶d je̱'e̱ yaj'u̶ñaaybyu̶du̶jk chu'uch ajku̶xy, ku̶xyu̶ tzu'uch: je̱'e̱ awa'atztuumbu̶ ja'ay chu'uch ajku̶xy y je̱'e̱ ni'idoogypyu̶ ja'ay chu'uch ajku̶xy, y je̱'e̱ mu̶jpu̶ mutzkpu̶ chu'uch ajku̶xy!”

19Chi u̶u̶ch je̱'e̱ ju̶bu̶kju̶yujk n'ijxy y je̱'e̱ ane̱'e̱mbu̶du̶jk ajku̶xy mu̶dyiibu̶ ya naaxwiiñ yajpaatku̶xpu̶ñ mu̶u̶d je̱'e̱ syoldadotu̶jk ajku̶xy, tu̶ ñayyo'oymyujktaayu̶gu̶xy mu̶dtziptunaangu̶xy je̱'e̱ mu̶dyiibu̶ najty poob kuaaygyú̶xp u̶ñaaybyu̶ñ, y nan mu̶dtziptunaanu̶gu̶xy je̱'e̱ y'ángelestu̶jk nandu'un ajku̶xy. 20Je̱'e̱ ju̶bu̶kju̶yujk yajtzuum je̱', kipxy mu̶u̶d je̱'e̱ win'u̶u̶mbu̶ ayuuknajtzkapxu̶u̶ybyu̶, mu̶dyiibu̶ je̱'e̱ ijxpe̱jt mu̶jwinma'añbyu̶ najty tu̶ tuñ ju̶bu̶kju̶yujk winduuy. Ko je̱'e̱ win'u̶u̶mbu̶ ayuuknajtzkapxu̶u̶ybyu̶ ijxpe̱jt du'un tuuñ, paady najty je̱'e̱ ja'ay may tu̶ win'u̶u̶ñ tu̶ ñayye̱jku̶gu̶xy ko je̱'e̱ ju̶bu̶kju̶yujk y'ijxpe̱jt ku'ubu̶jku̶ch ajku̶xy y windzu̶gu̶u̶ygyu̶xu̶ch je̱'e̱ y'agojnáx. Mu̶'it je̱'e̱ ju̶bu̶kju̶yujk y je̱'e̱ win'u̶u̶mbu̶ ayuuknajtzkapxu̶u̶ybyu̶ juugy yajku'uju̶bijpnajxku̶xy ma je̱'e̱ ju̶u̶n tyoyu̶ñ mu̶u̶d je̱'e̱ azufre, du'un je̱'e̱ ju̶u̶n neby tu'ug mejyu̶ñ wa'adz ju̶u̶n. 21Y je̱'e̱ wiingpu̶ myu̶gu'ugtu̶jk pujxk espaadu̶'aam je̱'e̱ y'o'kku̶xy mu̶u̶d je̱'e̱ pyujxk espaadu̶, mu̶dyiibu̶ najty y'awakjooty pu̶dzu̶u̶mb, je̱'e̱ mu̶dyiibu̶ najty poob kuaaygyú̶xp u̶ñaaybyu̶ñ y ku̶xyu̶ je̱'e̱ joon luud kyuuxu̶gu̶xy ko je̱'e̱ ja'ay chu'uch tzu'tzku̶xy.

Currently Selected:

Apocalipsis 19: MIXE

Highlight

Copy

Compare