Popular Bible Verses from Apocalipsis 19

Share

Jootkugu̶u̶yu̶m ajku̶xy, xondaaku̶m ajku̶xy y ku'umaayu̶m ajku̶xy, je̱' ko je̱'e̱ xu̶u̶ tiempo tu̶ paady mu̶naa je̱'e̱ Borreegu̶'úng pyu̶ga'añu̶ñ. Tu̶ je̱'e̱ tyo'oxyu̶jk ñayñi'ixu̶u̶yu̶nu̶

Jim wyitku̶xp y pyuuygyú̶xp najty je̱'e̱ xyu̶u̶ kyuja'ayu̶ch: “Je̱'e̱ Ane̱'e̱mbu̶ mu̶dyiibu̶ Ane̱'e̱mb ma je̱'e̱ ane̱'e̱mbu̶du̶jku̶ñ y je̱'e̱ Windzú̶n mu̶dyiibu̶ Windzu̶n'ajtp ma je̱'e̱ windzu̶ndu̶jku̶ñ.”

Chi u̶u̶ch je̱'e̱ tzajp awa'adz n'ijxy, y chi je̱'e̱ poob kuwaay tu'ug y'abu̶dzu̶mu̶u̶y, y je̱'e̱ mu̶dyiibu̶ najty yaj'u̶ñaaybyu̶ñ je̱' najty je̱'e̱ xyu̶u̶'áty Tu'uda'agypyu̶ y Tu̶y'ajtpu̶, je̱' ko najty tu'uda'agy y'ane'emy y tu'uda'agy chiptúñ.

Du'un najty je̱'e̱ wyiin y'adu̶kxy neby je̱'e̱ ju̶u̶nyé̱ngu̶ñ, may corona najty kyu'uje̱n'ajtypy y jim najty xu̶u̶ tu'ug yujkja'ayu̶ch, y ka'p najty je̱'e̱ ni pu̶n u̶xkapy, je̱'e̱du̶'ajty najty je̱'e̱ u̶xkajp. Ne'pty je̱'e̱ wyit najty mu̶u̶d y'uukyu̶ch, y xyu̶u̶'áty: Je̱'e̱ Dios Y'ayuuk.

Ma je̱'e̱ y'awaku̶ñ pujxk espaadu̶ ju̶jpu̶ najty tu'ug pyu̶dzu̶my, neby je̱'e̱ naax kajpt du'un yajtzu̶chu̶'u̶wa'añu̶ñ. Ane̱'e̱ma'añ mu̶k mu̶u̶d je̱'e̱ mu̶kpu̶ ane̱'e̱mu̶ñ. Y tu̶ydyuna'añ mu̶k du'un neby je̱'e̱ ja'ay uva winmu̶kxyu̶ñ y te̱nmoody mu̶u̶d je̱'e̱ tyeky, y tzaachtyuna'añ mu̶k, du'un neby je̱'e̱ viino mu̶kpu̶ yaj'u'uga'añu̶ñ, je̱'e̱ mu̶dyiibu̶ je̱'e̱ Dios chaachpyu̶ y jyootma'tu̶ñ mu̶miimbu̶ñ, je̱'e̱ Dios mu̶jmu̶k'ajtmu̶u̶dpu̶.

Je̱'e̱ ju̶bu̶kju̶yujk yajtzuum je̱', kipxy mu̶u̶d je̱'e̱ win'u̶u̶mbu̶ ayuuknajtzkapxu̶u̶ybyu̶, mu̶dyiibu̶ je̱'e̱ ijxpe̱jt mu̶jwinma'añbyu̶ najty tu̶ tuñ ju̶bu̶kju̶yujk winduuy. Ko je̱'e̱ win'u̶u̶mbu̶ ayuuknajtzkapxu̶u̶ybyu̶ ijxpe̱jt du'un tuuñ, paady najty je̱'e̱ ja'ay may tu̶ win'u̶u̶ñ tu̶ ñayye̱jku̶gu̶xy ko je̱'e̱ ju̶bu̶kju̶yujk y'ijxpe̱jt ku'ubu̶jku̶ch ajku̶xy y windzu̶gu̶u̶ygyu̶xu̶ch je̱'e̱ y'agojnáx. Mu̶'it je̱'e̱ ju̶bu̶kju̶yujk y je̱'e̱ win'u̶u̶mbu̶ ayuuknajtzkapxu̶u̶ybyu̶ juugy yajku'uju̶bijpnajxku̶xy ma je̱'e̱ ju̶u̶n tyoyu̶ñ mu̶u̶d je̱'e̱ azufre, du'un je̱'e̱ ju̶u̶n neby tu'ug mejyu̶ñ wa'adz ju̶u̶n.