Apocalipsis 20

1Chi u̶u̶ch je̱'e̱ ángel tu'ug n'ijxy ko kyu̶da'agy tzajpjooty kóñu̶ch je̱'e̱ ayodaakt awaatzk y wiichu̶ch je̱'e̱ mu̶j cadeenu̶. 2Chi je̱'e̱ ángel awa'an tza'añdy majch, je̱'e̱ jekycha'añdy je̱'e̱ mu̶jku'u y Mu̶jku'u windzú̶n, y chi je̱'e̱ cadeenu̶ yajkuwu̶u̶ñ tu'kmíl jumu̶jt. 3Chi jiiby ayodaaktuuby ku'uju̶bijpnajxy, chi yajku'u'adujky, y atzaay je̱'e̱ tu̶gu̶u̶ydyaakt ka'pu̶ je̱'e̱ naaxwiiñjya'ay win'u̶u̶n'adu̶'u̶dzu̶ch, u̶xtu̶ koonu̶ tu'kmíl jumu̶jt kyápxu̶ch, y ko naty tu'kmíl jumu̶jt tu̶ ñaxy, mu̶'it tzojku̶ yajnajtzmadzu̶'u̶wu̶ch.

4Chi u̶u̶ch je̱'e̱ ane̱'e̱mdaakt n'ijxy, y jim najty y'u̶ñaaygyu̶xy mu̶dyiibu̶ je̱'e̱ ane̱'e̱mu̶ñ najty tu̶ yajmooygyu̶xyu̶ñ ko tyu̶ydyuungu̶xu̶ch. N'ijxu̶ch y'aanu̶mu̶ je̱'e̱ nandu'un ajku̶xy je̱'e̱ mu̶dyiibu̶ yaj'yo'kpujxtuutku̶xu̶ñ mu̶dyiibu̶ je̱'e̱ Jesús najty tu'uda'agy nidu̶y'ajt'ajtku̶xpu̶ñ y je̱'e̱ Dios y'ayuuk tyu̶y'ajt. Je̱' ajku̶xy ka'p najty je̱'e̱ ju̶bu̶kju̶yujk ni je̱'e̱ y'agojnáx tu̶ windzu̶gu̶u̶ygyu̶xy, nan ka'p najty tu̶ ñayye̱jku̶gu̶xy ko je̱'e̱ ju̶bu̶kju̶yujk y'ijxpe̱jt pyu̶daaku̶gu̶xu̶ch ma je̱'e̱ wyimboku̶ñ o ma je̱'e̱ kyu̶'u̶ju̶ñ. Y n'ijxu̶ch ko ja'adu'ook jyuugypyu̶jkku̶xy y y'ane̱'e̱mgu̶xy mu̶u̶d je̱'e̱ Cristo tu'kmíl jumu̶jt. 5Peru̶ je̱'e̱ wiingpu̶ o'ogyjya'aydyu̶jk ka'p je̱'e̱ jyuugypyu̶jkku̶xy, u̶xtu̶ koonu̶ naty tu'kmíl jumu̶jt tu̶ ñaxy. Adaa je̱' je̱'e̱ jayu̶jpu̶ juugypyu̶jku̶ñ. 6¡Jootkujk je̱'e̱ o'ogyjya'aydyu̶jk je̱'e̱ mu̶dyiibu̶ jayu̶jp juugypyu̶jkku̶xpu̶ñ, je̱' ko je̱' yajpaatku̶xp ma je̱'e̱ Dios jya'ayu̶ñ! Ka'p je̱'e̱ y'o'ogaangu̶xnu̶ ma je̱'e̱ mu̶me̱jtz'ookpu̶ o'ku̶ñ, je̱' ko ka'p je̱'e̱ mu̶me̱jtz'ookpu̶ o'ku̶ñ ni tii mu̶k'ajt okmu̶dajtnu̶ ma je̱' ajku̶xyu̶ñ. Teedy'adaanu̶py je̱'e̱ ajku̶xy ma je̱'e̱ Dios y ma je̱'e̱ Crístoju̶ñ, y y'ane̱'e̱mgu̶xu̶ch kipxy mu̶u̶d je̱'e̱ Cristo tu'kmíl jumu̶jt.

Mu̶jku'u yajku'uju̶bijpnajxy ma je̱'e̱ ju̶u̶n tyoyu̶ñ

7Ko naty tu'kmíl jumu̶jt tu̶ ñaxy, chi je̱'e̱ Mu̶jku'u windzú̶n yajmu̶gue̱ju̶'u̶wu̶ch ma naty tzumy y'ityu̶ñ, 8y chi pyu̶dzú̶mu̶ch nu̶kxy je̱'e̱ naax kajpt win'u̶u̶ñ; nú̶kxu̶p je̱'e̱ Got y Magod nandu'un win'u̶u̶ñ, y chi je̱'e̱ syoldadotu̶jk nimay yajnaymyujku̶gu̶xu̶ch mu̶dyiibu̶ du'un neby je̱'e̱ pu'u mejypya'aju̶ñ neby chiptuungu̶xu̶chu̶ñ.

9Y chi ñayyo'oymyujku̶gu̶xy du'uñdyu̶ je̱'e̱ naax kajptu̶ñ, y ju'ubigu̶u̶ygyu̶xy je̱'e̱ it ma je̱'e̱ Dios jya'ay chu̶naaygyu̶xyu̶ñ, y je̱'e̱ kajpt mu̶dyiibu̶ je̱'e̱ Dios chojkypyu̶ñ. Peru̶ je̱'e̱ Dios ju̶u̶n tzajpjooty yajka'ay mu̶dyiibu̶ wa'adzu̶ ni'ino'ktaayu̶ju̶ñ ajku̶xy. 10Y chi je̱'e̱ mu̶jku'u mu̶dyiibu̶ je̱'e̱ naaxwiiñjya'ay najty tu̶ win'u̶u̶ñu̶ñ yajku'uju̶bijpnajxy ma je̱'e̱ ju̶u̶n tyoyu̶ñ mu̶u̶d je̱'e̱ azufre, du'un je̱'e̱ ju̶u̶n neby tu'ug mejyu̶ñ wa'adz ju̶u̶n, ma najty nandu'un tu̶ yajku'uju̶bijpnajxku̶xyu̶ñ je̱'e̱ ju̶bu̶kju̶yujk y je̱'e̱ wyin'u̶u̶mbu̶ ayuuknajtzkapxu̶u̶ybyu̶. Y jiiby xu̶u̶m tzum y wiinu̶u̶xu̶u̶ y'ayoogu̶xu̶ch.

Je̱'e̱ tu̶ydyuunu̶ñ ma je̱'e̱ poobpu̶ mu̶j'ane̱'e̱mdaaktu̶ñ

11N'ijxu̶ch tu'ug poobpu̶ mu̶j'ane̱'e̱mdaakt, y je̱'e̱ mu̶dyiibu̶ najty jim u̶ñaaby ma je̱'e̱ju̶ñ. Ma je̱' wyinduuyu̶ñ y'adu̶goyu̶ydyaay ku̶xyu̶ je̱'e̱ naax y je̱'e̱ tzajp, y ka'p ni tii maa y'o'kku̶xu̶'knu̶. 12Chi u̶u̶ch je̱'e̱ ja'ay mu̶j mutzk n'ijxy, mu̶dyiibu̶ najty tu̶ y'o'kku̶xyu̶ñ, tyu̶naaygyu̶xy ane̱'e̱mdaakt winduuy ma je̱'e̱ Diosu̶ñ; y chi je̱'e̱ may libro yajku̶u̶ywya'kxtaay, y nandu'un je̱'e̱ jadu'ugpu̶ libro, je̱'e̱ jugy'ajt libro. Chi je̱'e̱ o'ogyjya'ay yajtu̶ydyuungu̶xy, du'un neby najty ya naaxwiiñ tu̶ chu̶naay tu̶ jyugy'ajtku̶xy y neby najty jiiby may librojooty kyuja'ayu̶chu̶ñ. 13Je̱'e̱ mejy kyu̶'u̶ye̱jk je̱'e̱ y'o'ogyjya'ay mu̶dyiibu̶ najty jiiby yajpaatku̶xpu̶ñ, y je̱'e̱ o'ku̶ñ y je̱'e̱ it ma je̱'e̱ o'ogyjya'ay ñi'igu̶daakku̶xyu̶ñ kyu̶'u̶ye̱jk je̱'e̱ y'o'ogyjya'ay mu̶dyiibu̶ najty jiiby yajpaatku̶xpu̶ñ; y nigu̶xyu̶ yajtu̶ydyuungu̶xy, nidu'ugjáty nidu'ugjáty nebyjyaty najty tu̶ chu̶naay tu̶ jyugy'ajtku̶xyu̶ñ. 14Mu̶'it je̱'e̱ o'ku̶ñ y je̱'e̱ it ma je̱'e̱ o'ogyjya'ay ñi'igu̶daakku̶xyu̶ñ mu̶jju̶u̶njooty yajku'uju̶bijpnajxy, du'un je̱'e̱ ju̶u̶n neby tu'ug mejyu̶ñ wa'adz ju̶u̶n. Y adayaaba ju̶u̶n mu̶dyiibu̶ du'un neby tu'ug mejyu̶ñ, je̱' adaa je̱'e̱ mu̶me̱tzkpu̶ o'ku̶ñ, 15y jiiby yajku'uju̶bijpnajxtaaygyu̶xy je̱'e̱ mu̶dyiibu̶ je̱'e̱ xyu̶u̶ najty jiiby ka'p kuja'ay myiingu̶xy ma je̱'e̱ jugy'ajt libroju̶ñ.

Currently Selected:

Apocalipsis 20: MIXE

Highlight

Copy

Compare