Apocalipsis 18

Je̱'e̱ Babilonia kajpt mu̶dyiibu̶ tu̶gooyu̶ñ

1Kujeky ko najty adaa du'un tu̶ y'oktúñ y'okjadyii, chi u̶u̶ch je̱'e̱ ángel jadu'ug n'ijxy kyu̶da'agy tzajpjooty. Mu̶k najty je̱'e̱ ane̱'e̱mu̶ñ mu̶míñ, y chi je̱'e̱ naaxwiiñ yaj'anu̶u̶y mu̶u̶d je̱'e̱ y'adu̶kx y'ajaju̶ñ. 2Janch mu̶k najty yaaxke'egy:

“¡Tu̶ kyu'udu̶góy, tu̶ kyu'udu̶góy je̱'e̱ Babilonia mu̶j kajpt!

¡Mu̶jku'u tzu̶naaydyaakt je̱'e̱ tu̶ wyimbity,

je̱'e̱ mayñaxpu̶ ka'a'óybyu̶ maadaakt

tzu̶naaydyaakt je̱'e̱ tu̶ wyimbity,

joonbe'eñ joonmaadaakt je̱'e̱ tu̶ wyimbity,

je̱'e̱ joon mu̶dyiibu̶ ka'p wya'adzu̶chu̶ñ

y mu̶dyiibu̶ je̱'e̱ Dios kya'amu̶dnay'ixaanu̶byu̶ñ!

3Ku̶xyu̶ je̱'e̱ naaxwiiñjya'ay wyinma'añdyu̶gooygyu̶xy

mu̶u̶d je̱'e̱ Babilonia mu̶j kajpt jyu̶bu̶kwinma'añ

mu̶dyiibu̶ mu̶u̶d wyin'u̶nu̶gu̶xyu̶ñ,

du'un neby je̱'e̱ to'oxyu̶jk ya'aydyu̶jktu̶jk a'uugu̶'u̶yu̶ñ

ju̶gu'uwin'u̶u̶nu̶'u̶y y chi mu̶dtuundu̶góy;

y je̱'e̱ naaxwiimbu̶ mu̶j ane̱'e̱mbu̶du̶jk myu̶dtuundu̶gooygyu̶x je̱'e̱ to'oxyu̶jk,

y je̱'e̱ ajuubyu̶ adokpu̶ mu̶dyiibu̶ ya naaxwiiñ ajku̶xyu̶ñ

tu̶ je̱'e̱ kyuwitkoj kyumeeñgyojku̶xy je̱' ko je̱'e̱ Babilonia ku̶xyu̶ tii nigoo yaj'u̶x'ayóy.”

4Chi u̶u̶ch je̱'e̱ ayuuk ja'adu'ook nmu̶dooy chooñ tzajpjooty, myu̶na'añ:

“Pu̶dzu̶u̶mgu̶x ma je̱'e̱ jimbu̶ kajptu̶ñ, miich ajku̶xy

mu̶dyiibu̶ u̶u̶ch nja'ay'ajtypyu̶ñ,

ka'pu̶ je̱'e̱ pyoky kyu̶dyeey xy'abaatnajxku̶xu̶ch

y ni xykya'a''abaatnajxku̶xu̶ch je̱'e̱ y'ayo'on ajku̶xy;

5tu̶ yu̶'u̶ jiibu̶ kajpt pyoky mu̶j ñi'ibe̱jtku̶xnu̶,

y ka'p je̱'e̱ Dios ja'aydyu̶góy ko ju̶bu̶k jya'ay'ajtku̶xy.

6Du'un tuundu̶gátz neby je̱'e̱ myu̶gu'ug tu̶ tuungu̶xyu̶ñ.

Me̱jtz du'uñyu̶ yajmu̶gubé̱t neby tu̶ y'adu̶u̶tzku̶xyu̶ñ,

anaxy je̱'e̱ tzaachpyu̶ ni'igyu̶ mo'ow,

nigu̶ ka'p neby je̱'e̱ myu̶gu'ug tu̶ tuungu̶xyu̶ñ;

7mo'ow je̱'e̱ tzaachpyu̶ ayo'on ajku̶xy du'un neby tu̶ jya'ay'ajtku̶xyu̶ñ,

tu̶ ñaygyu'umaayu̶gu̶xy y tu̶ ku̶xyu̶ tii nigoo yaj'u̶x'ayoogu̶xy.

Du'un je̱'e̱ jootjooty winma'añjyooty myu̶na'añ:

‘Chaa u̶u̶ch n'ane'emy neby je̱'e̱ windaju̶ñ.

Ka'p u̶u̶ch ngu'o'ogytyo'oxyu̶jku̶ch,

ni nga'a'íx nga'apaadu̶chu̶ch je̱'e̱ tzaachpyu̶ ayo'on.’

8Paady, je̱'e̱ tu'ugpu̶ xu̶u̶ je̱'e̱ ayo'on may ñiminu̶u̶ju̶ch: je̱'e̱ o'ku̶ñ, je̱'e̱ taju̶ñ maayu̶ñ y je̱'e̱ yuu xu̶u̶,

y yajni'ino'ogu̶p ma je̱'e̱ ju̶u̶nu̶ñ,

je̱' ko mu̶k'ajt mu̶u̶d je̱'e̱ Dios je̱'e̱ Windzú̶n mu̶dyiibu̶ tu̶ yajpokykya'ayiiju̶ñ.”

9Je̱'e̱ naaxwiimbu̶ ane̱'e̱mbu̶du̶jk mu̶dyiibu̶ je̱'e̱ to'oxyu̶jk mu̶dtuundu̶gooygyu̶xu̶ñ y yaj'u̶x'ayoogu̶xy ku̶xyu̶ tii du'umbu̶, ju̶u̶ygyu̶x yaaxku̶xu̶p je̱' y tajku̶xp maaygyu̶xu̶p mu̶u̶d je̱'e̱ Babilonia kajpt kyu̶xpu̶ ko naty je̱'e̱ ju̶u̶njók ijxku̶xy tu̶ tyoybyu̶ky naty. 10Ju̶gue̱m je̱'e̱ wyu̶'u̶mgu̶xu̶ch mu̶u̶d je̱'e̱ tzu̶gu̶'u̶ju̶u̶ ko je̱'e̱ chaachpyu̶ naty padaangu̶xy, y myu̶naangu̶xu̶ch:

“¡Miich y'yoobu̶, miich y'yoobu̶ Babilonia mu̶j kajpt,

je̱'e̱ mu̶j kajpt mu̶k'ajtmu̶u̶dpu̶!

Janch tu'ktzojku̶ miich je̱'e̱ mdzaachpyu̶ tu̶ xyñimíñ.”

11Je̱'e̱ ajuuybyu̶ adokpu̶ ajku̶xy, mu̶dyiibu̶ ya naaxwiiñ ajku̶xyu̶ñ nan ju̶u̶ygyu̶x yaaxku̶xu̶p y tajku̶xp maaygyu̶xu̶p nandu'un mu̶u̶d je̱'e̱ kajpt kyu̶xpu̶, je̱' ko ka'p je̱'e̱ jyuy tyoogy pu̶n y'okjuuyu̶gu̶xnu̶ch; 12je̱'e̱ ooru̶bu̶ juy toogy, je̱'e̱ platu̶, je̱'e̱ oyjyatypyu̶ tzaa, je̱'e̱ perlas, je̱'e̱ lino wit oyjyatypyu̶ y je̱'e̱ seda wit oy'uky y tzaptzpu̶ color; ku̶xyu̶ mayñax kepy mu̶dyiibu̶ pa'agxúkpu̶ñ; ku̶xyu̶ tii oydyuñu̶ñ y ni'igojtu'udyu̶ñ mu̶u̶d je̱'e̱ pajk mu̶u̶d je̱'e̱ oyjyatypyu̶ kepy, mu̶u̶d je̱'e̱ bronce, mu̶u̶d je̱'e̱ pujxk y mu̶u̶d mármol tzaa, 13mu̶u̶d je̱'e̱ caneela juy toogy, y ku̶xyu̶ je̱'e̱ ujtz mu̶dyiibu̶ pa'agxúkpu̶ñ. Du'un neby je̱'e̱ poom juy toogy, je̱'e̱ mirra y je̱'e̱ perfume, je̱'e̱ viino, je̱'e̱ aceetyu̶, je̱'e̱ oybyu̶ hariina, je̱'e̱ oybyu̶ trigo, je̱'e̱ ju̶yujk mu̶dyiibu̶ tzu̶mychu̶u̶mbu̶ñ, je̱'e̱ borreegu̶, je̱'e̱ kuwaay, je̱'e̱ carreetu̶ y u̶xtu̶ tuumbu̶ ni'idoogypyu̶ mu̶dyiibu̶ du'un tuungu̶xpu̶ñ neby je̱'e̱ ju̶yujku̶ñ. 14Chi je̱'e̱ ajuuy adokpu̶du̶jk Babilonia ja'ay nu̶maaygyu̶xu̶ch:

“¡Ka'p je̱'e̱ tu̶u̶m tza'am m'okmu̶dajtnu̶ mu̶dyiibu̶ ijty mjanchtzojkypyu̶ñ.

Tu̶ je̱'e̱ du'un tu'ook tu̶goyu̶ myajtu̶góy

ku̶xyu̶ je̱'e̱ oygyu̶xu̶'ku̶ñ y mgumeeñ'ajtu̶ñ!”

15Je̱'e̱ mu̶dyiibu̶ najty ajuuy adókku̶xpu̶ñ y tu̶ kyuwitkoj kyumeeñgyojku̶xy ma je̱'e̱ jimbu̶ kajptu̶ñ, ju̶gue̱m je̱'e̱ wyu̶'u̶mgu̶xu̶ch mu̶u̶d je̱'e̱ tzu̶gu̶'u̶ju̶u̶ ko je̱'e̱ chaachpyu̶ naty padaangu̶xy, jyu̶u̶ygyu̶x yaaxku̶xu̶ch y tyajku̶x myaaygyu̶xu̶ch, 16y myu̶naangu̶xu̶ch:

“¡Miich y'yoobu̶, miich y'yoobu̶ Babilonia mu̶j kajpt!

Je̱'e̱ mu̶dyiibu̶ najty du'un ku̶xu̶'kp neby tu'ug to'oxyu̶jk kubu̶ky ku'ixy mu̶u̶d je̱'e̱ lino wit oybyu̶,

kubu̶ky ku'ixy mu̶u̶d je̱'e̱ wit oy'ukypyu̶ color tzaptzpu̶ color,

xyóxyu̶ch mu̶u̶d je̱'e̱ ooru̶, je̱'e̱ perlas y je̱'e̱ oyjyatypyu̶ tzaa.

17¡Y janch tu'ktzojku̶ je̱'e̱ myu̶jkume̱e̱ñ'ajtu̶ñ tu̶ kyu̶xy tu̶ tyu̶goy!”

Ku̶xyu̶ je̱'e̱ barco windzu̶ndu̶jk y pu̶njaty najty jiiby barcu̶jooty ajku̶xyu̶ñ, y ku̶xyu̶ pu̶njaty najty jiiby barcu̶jooty tuungu̶xpu̶ñ, ju̶gue̱mduum je̱'e̱ wyu̶'u̶mgu̶xy, 18y ko je̱'e̱ ju̶u̶njók ijxku̶xy ko je̱'e̱ kajpt najty tyoy, chi yaaxke̱e̱kku̶xy: “¿Mu̶dyii kajpt da'a ja'adu'ug mu̶baad okmu̶baady adayaaba mu̶j kajpt?” 19Y chi naax pu'u ñayyajku'uwoogu̶u̶yu̶gu̶xy, cham jyu̶u̶ygyu̶xy yaaxku̶xy, y tyajku̶xy myaaygyu̶xy, y yaaxke̱e̱kku̶xy:

“¡Miich y'yoobu̶, miich y'yoobu̶ mu̶j kajpt!

Mu̶u̶d miich je̱'e̱ mwit mmeeñ tu̶ kyumeeñgyojku̶xy

ku̶xyu̶ pu̶njaty je̱'e̱ barco najty mejyjyooty mu̶dajtku̶xpu̶ñ.

¡Y tu'ktzojku̶ tu̶ tyu̶gooydya'ay!”

20Xondaakku̶x miich pu̶njaty jiiby tzajpjootyu̶ñ

ko je̱'e̱ kajpt tu̶ tyu̶goy.

Y xondaakku̶x miich

je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ,

y je̱'e̱ apóstolestu̶jk y je̱'e̱ ayuuk najtzkapxu̶u̶ybyu̶du̶jk ajku̶xy,

je̱' ko tu̶ je̱'e̱ Dios kajpt yajkumu̶dóy

tu̶ yaj'awimbíty neby tu̶ xytyuungu̶xyu̶ñ.

21Mu̶'it je̱'e̱ ángel tu'ug mu̶k'ajtmu̶u̶dpu̶ tzaa tu'ug konu̶'ky, du'un najty je̱'e̱ kyu̶xu̶'u̶gy neby mu̶j molino paandzaaju̶ñ, y ko ka'tzkeeky mejyjyooty chi myu̶naañ:

“Du'un miich mdu̶goya'añ,

miich Babilonia mu̶j kajpt,

y ni mu̶naa miich pu̶n xykya'a'ok'ijxnu̶ch ja'adu'ook.

22Ni mu̶naa kya'a'okyajmu̶doonu̶ch ma je̱'e̱ mmu̶jnu̶u̶ mmu̶jtu'uju̶ñ

je̱'e̱ arpu̶ koobu̶, flauta xuuxpu̶ y je̱'e̱ trompeta xuuxpu̶du̶jk ajku̶xy,

ni je̱'e̱ tuumbu̶du̶jk jim ni tu'ug kya'a'okyajpaatnu̶ch ma miichu̶ñ,

ni je̱'e̱ molino paandzaa ñe̱'e̱mu̶ñ kya'a'okyajmu̶doonu̶ch.

23Ni mu̶naa je̱'e̱ ju̶u̶n jim kya'a'oktú̶kx kya'a'okjajnu̶ch ma miichu̶ñ,

y ni kya'a'okyajmu̶doonu̶ch je̱'e̱ ne̱'e̱mu̶ñ ko ijty mxu̶u̶duungu̶xy mbu̶jkku̶xy m'uukku̶xy,

oy je̱'e̱ m'ajuuy m'adokpu̶du̶jk ya naaxwiiñ najty jya'akumeeñu̶ch ajku̶xy,

y mwin'u̶u̶ngu̶x je̱'e̱ naax kajpt ku̶xyu̶ mu̶u̶d je̱'e̱ mguxu̶u̶winma'añ ajku̶xy.”

24Je̱' ko jim ma je̱'e̱ jimbu̶ kajpt tu̶ yajpaady je̱'e̱ Dios y'ayuuknajtzkapxu̶u̶ybyu̶du̶jk ñe'pty ajku̶xy, y je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ je̱'e̱ ñe'pty nandu'un ajku̶xy, y ku̶xyu̶ je̱'e̱ Dios jya'ay mu̶dyiibu̶ ya naaxwiiñ tu̶ yaj'o'ku̶gu̶xyu̶ñ.

Currently Selected:

Apocalipsis 18: MIXE

Highlight

Copy

Compare