Apocalipsis 14

Je̱'e̱ mu̶go'px ja'ajuxytyíkxy mu̶daaxk milpu̶ ja'ay y'u̶y ajku̶xy

1Chi u̶u̶ch je̱'e̱ Borreegu̶'úng n'ijxy tyu̶na'ay ma je̱'e̱ Sión koptu̶ñ. Jim najty je̱'e̱ ja'ay mu̶go'px ja'ajuxytyíkxy mu̶daaxk mil mu̶u̶du̶ch, mu̶dyiibu̶ najty jim wimbokku̶xy kuja'ay mu̶dajtku̶xpu̶ñ je̱'e̱ Borreegu̶'úng xyu̶u̶ y je̱'e̱ tyeedy xyu̶u̶. 2Mu̶'it u̶u̶ch nmu̶dooy chooñ tzajpjooty du'un neby je̱'e̱ tax y'u̶u̶chu̶ñ, du'un neby je̱'e̱ ane̱e̱ mu̶k ya'axy jyokyu̶ñ. Du'un yajmu̶dooy neby je̱'e̱ maygyoobu̶du̶jk y'arpa yajkoogu̶xyu̶ñ. 3Y u̶u̶gu̶xy je̱'e̱ jembyu̶ u̶y jim ane̱'e̱mdaakt winduuy y ma je̱'e̱ mu̶daaxkpu̶ juugypyu̶ ju̶yujk winduuy, y nan ma je̱'e̱ amu̶jja'aydyu̶jk winduuyu̶ñ. Ni pu̶n najty je̱'e̱ jembyu̶ u̶y ka'ajáty neby ú̶wu̶chu̶ñ, je̱'e̱du̶'ajty je'eyu̶ ajku̶xy je̱'e̱ mu̶go'px ja'ajuxytyíkxy mu̶daaxk milpu̶ ja'ay ajku̶xy, je̱'e̱ mu̶dyiibu̶ ya naaxwiiñ aanu̶mu̶ ni'idzookku̶xu̶ñ. 4Adaa je̱' ajku̶xy je̱'e̱ mu̶dyiibu̶ ka'p tu̶ ñayyajma'ttu̶gu̶xyu̶ñ mu̶u̶d je̱'e̱ to'oxyu̶jktu̶jk, ka'p je̱'e̱ to'oxyu̶jk tu̶ mu̶dtuundu̶gooygyu̶xy. Adaa je̱' ajku̶xy mu̶dyiibu̶ je̱'e̱ Borreegu̶'úng panú̶kxku̶xpu̶ñ ma naty tyimyñu̶kxyu̶ñ. Adaa jayu̶jp tu̶ ñi'idzookku̶xy ma je̱'e̱ naaxwiiñjya'ayu̶ñ, du'un neby je̱'e̱ jayu̶jpu̶ yojxu̶ñ ma je̱'e̱ Dios y ma je̱'e̱ Borreegu̶''úngu̶ñ. 5Ka'p ni tii anu̶u̶ tu̶ yajpaady ma je̱'e̱ wyiin y'awak ajku̶xyu̶ñ, y ka'p pyoky kyu̶dyeey je̱'e̱ ma ajku̶xy.

Je̱'e̱ tu̶gu̶u̶gpu̶ ángelestu̶jk y'ayuuk tyu̶y'ajt ajku̶xy

6Chi u̶u̶ch je̱'e̱ ángel jadu'ug n'ijxy kye̱e̱kwu̶díty kuptzajp y mu̶nu̶kxy je̱'e̱ ayuuk tu̶y'ajt mu̶dyiibu̶ wiinu̶u̶xu̶u̶ ijtpu̶ñ ma je̱'e̱ mu̶dyiibu̶ ya naaxwiiñ tzu̶naaygyu̶xpu̶ñ, du'uñdyu̶ je̱'e̱ naax kajpt kyu̶xy'ajtta'ayu̶ñ, ma je̱'e̱ mu̶dyiibu̶ ñi'kx kyopt kyolor tu̶gachjyatyu̶ñ ajku̶xy, ma je̱'e̱ mu̶dyiibu̶ tu̶gachjyaty kápxku̶xpu̶ñ y mu̶dyiibu̶ tzóngu̶xpu̶ñ majaty je̱'e̱ mutzk naax mutzk kajptu̶ñ. 7Y cham janch mu̶k myu̶na'añ: “Tzu̶gu̶u̶ygyu̶x je̱'e̱ Dios y ku'umaaygyu̶x ja'aymye̱jtzku̶x, je̱' ko tu̶ je̱'e̱ hooru̶ paady mu̶naa je̱'e̱ naaxwiiñjya'ay tu̶ydyuna'añu̶ñ. Windzu̶gu̶u̶y o'owu̶dajtku̶x je̱'e̱ mu̶dyiibu̶ yajkoju̶ñ je̱'e̱ tzajp, je̱'e̱ naax, je̱'e̱ mejy y majaty je̱'e̱ nu̶u̶ pyu̶dzu̶myu̶ñ.

8Chi je̱'e̱ mu̶me̱tzkpu̶ ángel pyanu̶kxu̶, cham myu̶na'añ: “¡Tu̶ kyu'udu̶góy, tu̶ kyu'udu̶góy je̱'e̱ Babilonia mu̶j kajpt, je̱'e̱ mu̶dyiibu̶ je̱'e̱ naaxwiiñjya'ay ku̶xyu̶ win'u̶nu̶ñ mu̶u̶d je̱'e̱ jyu̶bu̶kwinma'añ, du'un neby je̱'e̱ to'oxyu̶jk ya'aydyu̶jktu̶jk a'uugu̶'u̶yu̶ñ ju̶gu'uwin'u̶u̶nu̶'u̶y y chi mu̶dtuundu̶góy!”

9Chi je̱'e̱ ángel jadu'ug pyanu̶kxu̶ je̱'e̱ mu̶du̶gu̶u̶kpu̶, cham janch mu̶k myu̶na'añ: “Pu̶nu̶ jii je̱'e̱ ju̶bu̶kju̶yujk pu̶n windzu̶gu̶'u̶y, y windzu̶gu̶u̶yu̶ je̱'e̱ y'agojnáx, y ñayyegyii ko je̱'e̱ y'ijxpe̱jt pyu̶daakku̶xu̶ch ma je̱'e̱ wyimboku̶ñ o ma je̱'e̱ kyu̶'u̶ju̶ñ, 10ñi'igu̶ paadu̶py je̱'e̱ mu̶kpu̶ tzaachpyu̶ ajku̶xy, je̱'e̱ mu̶dyiibu̶ je̱'e̱ Dios kye̱xe̱e̱mbyu̶ñ, je̱'e̱ mu̶dyiibu̶ tu̶ ni'ixu̶'u̶yu̶ñ mu̶u̶d je̱'e̱ jyootma'tu̶ñ ku̶xyu̶; y yajtzaachtyuungu̶xu̶p je̱' mu̶u̶d je̱'e̱ ju̶u̶n y azufre ma je̱'e̱ ángelestu̶jk winduuyu̶ñ ajku̶xy, y ma je̱'e̱ Borreegu̶'úng winduuyu̶ñ. 11Je̱'e̱ ju̶u̶njók ma naty y'ayoogu̶xyu̶ñ ídu̶p je̱'e̱ wiinu̶u̶xu̶u̶, y ka'p pokxu̶ñ je̱'e̱ jiiby paatku̶xu̶ch, xu̶u̶m tzum je̱'e̱ y'ayoogu̶xu̶ch pu̶njaty naty je̱'e̱ ju̶bu̶kju̶yujk windzu̶gu̶u̶ygyu̶xpu̶ñ y je̱'e̱ y'agojnáx, y pu̶njaty je̱'e̱ ijxpe̱jt ku'ubu̶jkku̶xpu̶ñ ko je̱'e̱ ju̶bu̶kju̶yujk xyu̶u̶ pyu̶daakku̶xu̶ch ajku̶xy.”

12¡Y yaaju̶tz je̱'e̱ Dios jya'ay mye̱kxtujku̶ñ tyúnu̶ch, je̱'e̱ mu̶dyiibu̶ je̱'e̱ Dios y'ane̱'e̱mu̶ñ kuydyuungu̶xpu̶ñ y mu̶dyiibu̶ je̱'e̱ Jesús tu'ug'aa tu'ugjoot mu̶duungu̶xpu̶ñ!

13Mu̶'it u̶u̶ch je̱'e̱ ayuuk tu'ug nmu̶dooy chooñ tzajpjooty, xyñu̶ma'ayu̶ch: “Kuja'aw adaa: ‘Jootkujk cham y jiinu̶, je̱'e̱ mu̶dyiibu̶ Dios ku̶'u̶'aam o'kku̶xpu̶ñ mu̶bu̶jkku̶xy je̱'e̱ Windzú̶n Jesús.’ ”

“Jaanch —du'un je̱'e̱ Espíritu Santo myu̶na'añ—, pókxku̶xnu̶py je̱', neby tu̶ tyuungu̶xyu̶ñ, je̱' pube̱du̶u̶ju̶p ajku̶xy je̱'e̱ oybyu̶ mu̶dyiibu̶ tu̶ tuungu̶xyu̶ñ.”

Je̱'e̱ pu̶da'aky mu̶dyiibu̶ ya naaxwiiñ pu̶du̶'u̶gu̶bu̶ñ

14Chi u̶u̶ch je̱'e̱ jok tu'ug n'ijxy janch poob, y chi u̶u̶ch jiiby jok'agujk n'ijxy y'u̶ña'ay du'un neby je̱'e̱ ja'ayu̶ñ. Corona kyu'ujup'ajtypy agu̶ ooru̶ y ku̶'u̶gápyu̶ch tu'ug tzujkt janch ju̶jpu̶. 15Y chi je̱'e̱ ángel jiiby jadu'ug pyu̶dzu̶u̶my ma je̱'e̱ Dios tyu̶jku̶ñ, cham mu̶k mu̶ya'axy, je̱'e̱ mu̶dyiibu̶ najty jok'agujk u̶ñaaybyu̶ñ: “¡Yajtún yu̶'u̶ mdzujkt y yajpu̶du̶'u̶g yu̶'u̶ pu̶da'aky, je̱' ko tu̶ je̱'e̱ tiempo paatnu̶ mu̶naa pyu̶du̶'knu̶chu̶ñ, y tu̶ je̱'e̱ pu̶da'aky myu̶jaanu̶ mu̶dyiibu̶ ya naaxwiiñu̶ñ!” 16Chi je̱'e̱ mu̶dyiibu̶ najty jok'agujk u̶ñaaby je̱'e̱ chujkt ya naaxwiiñ yajnajxy, y yajpu̶du̶'ky je̱'e̱ pu̶da'aky mu̶dyiibu̶ najty ya naaxwiiñu̶ñ.

17Mu̶'it je̱'e̱ ángel jadu'ug pyu̶dzu̶u̶my ma je̱'e̱ Dios tyu̶jku̶ñ, je̱'e̱ mu̶dyiibu̶ jiiby tzajpjootyu̶ñ, cham je̱'e̱ tzujkt nandu'un ku̶'u̶gápyu̶ch janch ju̶jp. 18Y chi je̱'e̱ ángel jiiby jadu'ug pyu̶dzu̶u̶my ma je̱'e̱ poch ma je̱'e̱ windzu̶gu̶'u̶ñ yaj'yékyu̶ñ, je̱'e̱ mu̶dyiibu̶ je̱'e̱ ane̱'e̱mu̶ñ najty mu̶dajtp ma je̱'e̱ ju̶u̶nu̶ñ, chi mu̶j'yaaxy janch mu̶k je̱'e̱ mu̶dyiibu̶ je̱'e̱ tzujkt ju̶jpu̶ najty mu̶dajtpu̶ñ, cham myu̶na'añ: “¡Yajtún yu̶'u̶ mdzujkt ju̶jpu̶, yajpu̶du̶'u̶g je̱'e̱ uva tu'kje'egyjyáty ma je̱'e̱ uva kamu̶ñ, je̱'e̱ mu̶dyiibu̶ ya naaxwiiñu̶ñ, je̱' ko tu̶ je̱'e̱ uva chaamnu̶!” 19Chi je̱'e̱ ángel chujkt ya naaxwiiñ yajnajxy y yajpu̶du̶'ky je̱'e̱ uva ma je̱'e̱ uvakamu̶ñ, je̱'e̱ mu̶dyiibu̶ ya naaxwiiñu̶ñ, y chi pu̶daaky ma yaj'amu̶kxu̶'u̶wu̶chu̶ñ ma mu̶j ku̶je̱e̱ y'awa'adzu̶chu̶ñ wan jiiby yajmú̶kxu̶ch. Adaa je̱'e̱ mu̶j'ayo'on adaa du'un tyijpy mu̶dyiibu̶ je̱'e̱ Dios kye̱xe̱e̱mbyu̶ñ. 20Je̱'e̱ uva kajppa'a je̱'e̱ yajmú̶kxy, y ma yaj'amu̶kxu̶u̶yu̶ñ kom ne'pty jiiby pu̶dzu̶u̶m; jya'ty ma je̱'e̱ kuwaay awonu̶'kt mu̶dajtku̶xyu̶ñ y y'ayo'oyu̶u̶y tu̶gu̶u̶g mu̶go'px kilómetro.

Currently Selected:

Apocalipsis 14: MIXE

Highlight

Copy

Compare