Apocalipsis 15

Je̱'e̱ ángelestu̶jk ajku̶xy mu̶u̶d je̱'e̱ juxtujknáxpu̶ ayo'on mu̶dyiibu̶ ku̶jxp maayñu̶byu̶ñ

1Chi u̶u̶ch je̱'e̱ mu̶jpu̶ y oyyajju̶wu̶u̶yñu̶ba ijxpe̱jt jadu'ug tzajpjooty n'ijxy; juxtujk je̱'e̱ ángelestu̶jk mu̶u̶d je̱'e̱ juxtujknáxpu̶ ayo'on, je̱'e̱ mu̶dyiibu̶ ku̶jxp maayñu̶byu̶ñ, je̱'e̱ mu̶dyiibu̶ je̱'e̱ Dios jyootma'tu̶ñ mu̶u̶d kyugu̶xu̶u̶yñu̶ju̶ñ.

2N'ijxu̶ch nandu'un mu̶dyiibu̶ du'un ku̶xu̶'kp neby mejy ijxc mu̶u̶dpu̶ju̶ñ, y nandu'un je̱'e̱ ijxc kyu̶xu̶'u̶gy neby ju̶u̶nmu̶gonu̶'u̶byu̶ju̶ñ. Y mu̶wingón je̱'e̱ mejy ijxc mu̶u̶dpu̶ najty tyu̶naaygyu̶xy mu̶u̶d je̱'e̱ arpu̶ mu̶dyiibu̶ je̱'e̱ Dios najty tu̶ myooyu̶gu̶xyu̶ñ, je̱'e̱ mu̶dyiibu̶ najty tu̶ myu̶daakku̶xyu̶ñ tu̶ ka'awindzu̶gu̶u̶ygyu̶xy je̱'e̱ ju̶bu̶kju̶yujk y je̱'e̱ y'agojnáx, y je̱'e̱ xyu̶u̶ ñinúmero. 3Y u̶u̶gu̶xy najty je̱'e̱ Moisés y'u̶y, je̱'e̱ Dios tyuumbu̶, y je̱'e̱ Borreegu̶'úng y'u̶y. Myu̶naangu̶xy:

“Mu̶j y mu̶jwinma'añ ku̶xyu̶ mu̶dyiibu̶ tu̶ mduñu̶ñ,

miich Windzú̶n, Dios mu̶jmu̶k'ajtmu̶u̶dpu̶.

Tu'uda'agy y tu̶y'ajt je̱'e̱ mnu̶u̶ mdu'u,

miich Ane̱'e̱mbu̶'ajtp ma je̱'e̱ naaxwiiñjya'ayu̶ñ.

4¿Pu̶n miich da'a xykya'a'oktzu̶gu̶'u̶wu̶p, miich Windzú̶n?

¿Pu̶n miich da'a xykya'a'okku'umáyu̶p?

Je̱' ko miich tuk'pajktu̶'ajty wa'adz.

Miingu̶xu̶p je̱'e̱ naax kajpt du'uñdyu̶ kyu̶xy'ajtta'ayu̶ñ y xywyindzu̶gu̶u̶ygyu̶xu̶ch,

je̱' ko tu̶ je̱'e̱ mdu'uda'agy'ajt myajni'igu̶xu̶'u̶gy neby mduñu̶ñ.”

5Ko najty du'un tu̶ tyuñ tu̶ jyadyii, y chi u̶u̶ch n'ijxy y'awa'ach jiiby tzajpjooty je̱'e̱ Dios y'it, je̱'e̱ po'o'aktu̶jk ma je̱'e̱ Dios tyu̶y'ajt najty y'ityu̶ñ. 6Ma je̱'e̱ Dios y'itu̶ñ pyu̶dzu̶u̶mgu̶xy ángelestu̶jk juxtujk, mu̶dajtku̶xy je̱'e̱ juxtujknáxpu̶ ayo'on. Agu̶ oybyu̶ wit najty wyit'ajtku̶xypy y adu̶kxpjáty, y wyu̶u̶ñu̶ch ajku̶xy mu̶u̶d ooru̶ wu̶u̶n kachju̶jp'aam. 7Y chi je̱'e̱ mu̶daaxkpu̶ juugypyu̶ ju̶yujk nidu'ugtu̶ ooru̶ koopu̶ ku̶j tu'ug mooygyu̶xy je̱'e̱ juxtujkpu̶ ángelestu̶jk, ujtzjáty mu̶u̶d je̱'e̱ mu̶j ayo'on mu̶dyiibu̶ je̱'e̱ Dios kye̱xe̱e̱mbyu̶ñ, je̱'e̱ Dios mu̶dyiibu̶ wiinu̶u̶xu̶u̶ jugy'ajtpu̶ñ. 8Y ujtz je̱'e̱ Dios y'it mu̶u̶d je̱'e̱ jok, je̱' ko je̱'e̱ Dios myu̶j'ajt y myu̶k'ajt najty jiiby yajpaady, y ka'p najty jiiby mu̶baad ni pu̶n tyu̶gu̶'u̶y, u̶xtu̶ koonu̶ je̱'e̱ juxtujknáxpu̶ ayo'on najty tu̶ y'oknaxy mu̶dyiibu̶ je̱'e̱ juxtujkpu̶ ángelestu̶jk najty myu̶dajtku̶xypyu̶ñ.

Currently Selected:

Apocalipsis 15: MIXE

Highlight

Copy

Compare