Apocalipsis 13

Je̱'e̱ me̱tzkpu̶ ju̶bu̶kju̶yujk

1Chi u̶u̶ch n'ijxy pyu̶dzu̶u̶my mejyjyooty tu'ug ju̶bu̶kju̶yujk, mu̶dyiibu̶ kyu'ubajk najty juxtujku̶ñ y majk kyapt. Y tu'ugjáty koronu̶ ma je̱'e̱ kyaptu̶ñ, y majaty je̱'e̱ kyu'ubajku̶ñ jim najty xyu̶u̶ yujkja'ayu̶ch, je̱'e̱ mu̶dyiibu̶ je̱'e̱ Dios mu̶gapxtu̶gooygyu̶xpu̶ñ. 2Adaa ju̶bu̶kju̶yujk mu̶dyiibu̶ u̶u̶ch n'ijxu̶ñ, du'un najty je̱'e̱ kyu̶xu̶'u̶gy neby tu'ug kuxyu̶bu̶jyu̶ñ, y du'un najty je̱'e̱ tyeky kyu̶xu̶'u̶gy neby oso tekyu̶ñ, y du'un y'awak neby je̱'e̱ jaamgaa y'awaku̶ñ. Chi je̱'e̱ awa'an tza'añdy mu̶k'ajt y ku'utujku̶ñ, y mu̶k ane̱'e̱mu̶ñ myooyu̶. 3Tu'ug je̱'e̱ ju̶bu̶kju̶yujk kyu'ubajk najty chu̶chu̶'u̶wu̶ch, y du'un najty je̱'e̱ kyu̶xu̶'u̶gy neby tyimyyaj'o'ogu̶u̶wu̶chu̶ñ; peru̶ tzook je̱', y mu̶k je̱'e̱ naaxwiiñjya'ay ku̶xyu̶ yajnú̶kx yajju̶wu̶u̶ygyu̶xy y chi je̱'e̱ ju̶bu̶kju̶yujk panú̶kxku̶xy. 4Chi je̱'e̱ naaxwiiñjya'ay windzu̶gu̶u̶ygyu̶xy je̱'e̱ awa'an tza'añdy, je̱' ko je̱' je̱'e̱ ju̶bu̶kju̶yujk ane̱'e̱mu̶ñ najty tu̶ mo'oy, y nan wyindzu̶gu̶u̶ygyu̶x je̱'e̱ ju̶bu̶kju̶yujk nandu'un, cham myu̶naangu̶xy: “¿Pu̶n da'a jii okdu'un neby adaa ju̶bu̶kju̶yujku̶ñ, y pu̶n da'a mu̶baad okmu̶dtziptúñ?”

5Nan yajmooy je̱'e̱ ju̶bu̶kju̶yujk mu̶k'ajt neby je̱'e̱ Dios aamu̶j jootmu̶j oy nejpy tíju̶chu̶ñ y ju̶bu̶k axu̶u̶g nigapx nimu̶dya'agu̶chu̶ñ, y neby je̱'e̱ ane̱'e̱mu̶ñ juxytyikxymyé̱tzk po'o mu̶dádu̶chu̶ñ. 6Y tyuun je̱'e̱ du'un, ñigapx ñimu̶dyaak je̱'e̱ Dios ju̶bu̶k axu̶u̶g, y oy nejpy je̱' tijy y nandu'un oy nejpy tijku̶xy je̱'e̱ Dios tyu̶jk y je̱'e̱ mu̶dyiibu̶ jiiby tzajpjooty tzu̶naaygyu̶xpu̶ñ. 7Nan yajmooy je̱'e̱ mu̶k'ajt neby mu̶dtziptúnu̶chu̶ñ, je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ, u̶xtu̶ koonu̶ mu̶madaakku̶xu̶ch; y yajmooy neby je̱'e̱ ja'ay ku̶xyu̶ ane̱'e̱mu̶chu̶ñ, je̱'e̱ mu̶dyiibu̶ je̱'e̱ ñi'kx kyopt kyolor tu̶gachjyaty ajku̶xy, mu̶dyiibu̶ mutzk naax mutzk kajpt tzóngu̶xpu̶ñ, mu̶dyiibu̶ tu̶gachjyaty kápxku̶xpu̶ñ y du'uñdyu̶ je̱'e̱ naax kajpt kyu̶xy'ajtta'ayu̶ñ. 8Ku̶xyu̶ je̱'e̱ naaxwiiñjya'ay je̱'e̱ ju̶bu̶kju̶yujk windzu̶gu̶u̶ygyu̶xu̶ch, je̱'e̱ du'umbu̶ ja'ay ka'p xyu̶u̶ je̱'e̱ jiiby yajkujaaygyu̶xy, maabu̶ je̱'e̱ naaxwiiñ aga'an chonda'agy ma je̱'e̱ Borreegu̶'úng jyugy'ajt libro mu̶dyiibu̶ windzu̶gu̶'u̶ñ'ajtu̶ñ.

9Pu̶n tadzak mu̶u̶d, wan amdo'íty:

10“Pu̶n je̱'e̱ myu̶gu'ug tzuumgu̶xpu̶ñ,

nan yajtzuumdu̶gajtzku̶xu̶p je̱'e̱ nandu'un.

Y pu̶n je̱'e̱ myu̶gu'ug yaj'o'kku̶xpu̶ñ, nan yaj'o'ktu̶gajtzu̶gu̶xu̶p

je̱' du'un neby naty je̱'e̱ myu̶gu'ug tu̶ yaj'o'ogyu̶ñ.”

Y yaaju̶tz je̱'e̱ mye̱kxtujk y je̱'e̱ myu̶bu̶jku̶ñ tyúnu̶ch, je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ.

11Kujeky u̶u̶ch je̱'e̱ ju̶bu̶kju̶yujk jadu'ug n'ijxy pyu̶dzu̶my naaxjooty. Me̱tzk najty kyapt mu̶u̶du̶ch y du'un je̱'e̱ kyapt najty kyu̶xu̶'u̶gy neby je̱'e̱ borreegu̶'úng kaptu̶ñ, peru̶ du'un najty kyapxy neby je̱'e̱ awa'an tza'añdy kyapxyu̶ñ. 12Y myu̶dajtypy je̱'e̱ ane̱'e̱mu̶ñ najty ku̶xyu̶ mu̶dyiibu̶ je̱'e̱ jayu̶jpu̶ ju̶bu̶kju̶yujk najty myu̶dajtypyu̶ñ, y ma je̱'e̱ wyinduuyu̶ñ ane'emy ku̶xyu̶ je̱'e̱ naax kajpt ko je̱'e̱ jayu̶jpu̶ ju̶bu̶kju̶yujk windzu̶gu̶u̶ygyu̶xu̶ch, je̱'e̱ mu̶dyiibu̶ je̱'e̱ chu̶chu̶'u̶'aa najty tu̶ cho'ogyu̶ñ, je̱'e̱ mu̶dyiibu̶ najty du'un ku̶xu̶'kp neby du'umbu̶ tyimyyaj'o'ogu̶u̶wu̶chu̶ñ. 13Nan tyuumby je̱'e̱ mu̶j ijxpe̱jt mu̶jwinma'añbyu̶ najty. U̶xtu̶ ju̶u̶n najty tzajpjooty yajka'aby mayjya'ay winduuy. 14Y mu̶u̶d je̱'e̱ mu̶k'ajt mu̶dyiibu̶ yajmooyu̶ñ ko je̱'e̱ ijxpe̱jt túnu̶ch ma je̱'e̱ jayu̶jpu̶ ju̶bu̶kju̶yujk wyinduuyu̶ñ, may je̱'e̱ ja'ay win'ú̶ñ mu̶dyiibu̶ ya naaxwiiñ tzu̶naaygyu̶xpu̶ñ y chi ane̱'e̱mgu̶xy ko je̱'e̱ jayu̶jpu̶ ju̶bu̶kju̶yujk yajni'igojtuutku̶xu̶ch, je̱'e̱ mu̶dyiibu̶ najty jakjugy'ajtpu̶ñ, oy najty tu̶ jya'ayajtzu̶chu̶'u̶yii pujxk espaadu̶'aam. 15Y chi je̱'e̱ mu̶me̱tzkpu̶ ju̶bu̶kju̶yujk mu̶k'ajt yajmooy ko yajjuugypyú̶gu̶ch je̱'e̱ jayu̶jpu̶ ju̶bu̶kju̶yujk y'agojnáx, wan je̱'e̱ jayu̶jpu̶ ju̶bu̶kju̶yujk kyápxu̶ch y yaj'o'ogu̶ch ku̶xyu̶ je̱'e̱ ja'ay mu̶dyiijáty ka'p y'o'owu̶datyiiju̶ñ. 16Chi je̱'e̱ ane̱'e̱mu̶ñ yejky ko ku̶xyu̶ pi'k'ana'ktu̶jk y amu̶jja'aydyu̶jk, kumeeñjya'aydyu̶jk y ayoobu̶du̶jk, ni'ijúy ni'idoogypyu̶ ajku̶xy y ka'pu̶ ñi'ijúy ñi'idoogyu̶ch ajku̶xy, y'ijxpe̱jt yajpu̶daakku̶xu̶ch ma je̱'e̱ y'a'oygyu̶'u̶ju̶ñ o ma je̱'e̱ wyimboku̶ñ ajku̶xy. 17Y ka'p najty mu̶baad pu̶n jyuy tyoogy, pu̶nu̶ ka'p je̱'e̱ ijxpe̱jt najty mu̶dajtku̶xy o je̱'e̱ ju̶bu̶kju̶yujk xyu̶u̶, o je̱'e̱ xyu̶u̶ ñinúmero.

18Yaa yaj'ixa'añ pu̶n je̱'e̱ wij'ajt ke̱j'ajt mu̶u̶du̶ñ. Pu̶n winju̶wu̶u̶ybyu̶ñ, wan je̱'e̱ ju̶bu̶kju̶yujk ñúmero payo'oyu̶, je̱'e̱ ja'ay ñúmero je̱'. Je̱'e̱ número je̱' tudujk mugo'px ja'atu̶gu̶'px tudujk.

Currently Selected:

Apocalipsis 13: MIXE

Highlight

Copy

Compare