Apocalipsis 11

Je̱'e̱ nime̱tzkpu̶ nidu̶y'ajt'ajtpu̶ ajku̶xy

1Chi u̶u̶ch je̱'e̱ paxykyipxt tu'ug xymyooygyu̶xy, y xyñu̶maaygyu̶xyu̶ch: “Pu̶du̶'u̶g y kipxu̶ je̱'e̱ Dios tyu̶jk y je̱'e̱ poch ma je̱'e̱ windzu̶gu̶'u̶ñ yaj'yékyu̶ñ, y mu̶chow naag je̱'e̱ ja'ay Dios jiiby windzu̶gu̶u̶ygyu̶xyu̶ñ. 2Peru̶ ka'p je̱'e̱ Dios tyu̶jk tu̶ba'a mkípxu̶ch, je̱' ko je̱'e̱ ka'pu̶ judío ja'ay tu̶ kyu̶'u̶du̶gu̶u̶yu̶gu̶xy, je̱'e̱ mu̶dyiibu̶ je̱'e̱ Dios kajpt naaxmu̶te̱e̱nu̶u̶ygyu̶xu̶bu̶ñ, y'ane̱'e̱mgu̶xu̶ch juxytyikxy me̱tzk po'o. 3Y u̶u̶ch je̱'e̱ nidu̶y'ajt'ajtpu̶ me̱tzk ngué̱xu̶py mu̶u̶d je̱'e̱ wyit tyukxy ni'ikuyjyaam u̶xkuyjyaam, je̱'e̱ mu̶dyiibu̶ u̶u̶ch je̱'e̱ n'ayuuk xykyapxwa'kxu̶byu̶ñ ajku̶xy tu'k mil ja'ame̱jtzmu̶go'px ja'atu̶gu̶'px xu̶u̶.”

4Adaa me̱tzkpu̶ nidu̶y'ajt'ajtpu̶ du'un je̱' neby je̱'e̱ me̱tzkpu̶ olivo kepy y neby je̱'e̱ me̱tzkpu̶ ju̶u̶ndooybye̱jtk, mu̶dyiibu̶ jim ijtp ma je̱'e̱ Windzú̶n wyinduuyu̶ñ, je̱'e̱ mu̶dyiibu̶ je̱'e̱ naaxwiimbu̶ ane̱'e̱mbu̶ñ. 5Pu̶nu̶ jii naty pu̶n nej tyuna'añyii ajku̶xy, je̱' yajpu̶dzu̶u̶mgu̶xypy ju̶u̶n je̱'e̱ awakjooty y tyimyyaj'o'kku̶xypy je̱'e̱ myu̶dziptu̶jk, mu̶dyiibu̶ naty oy nejpy tunaanu̶bu̶ñ ajku̶xy. 6Adaa me̱tzkpu̶ nidu̶y'ajt'ajtpu̶ myu̶dajtku̶xypy mu̶k'ajt yu̶'u̶ neby je̱'e̱ tzajp yaj'adujkku̶xu̶chu̶ñ, ka'pu̶ tyu'uwu̶ch du'uñyu̶ naty je̱'e̱ Dios y'ayuuk tyu̶y'ajt kapxwa'kxku̶xyu̶ñ; y nan myu̶dajtku̶xypy je̱'e̱ mu̶k'ajt neby je̱'e̱ nu̶u̶ ne'pty yaj'awimbijtku̶xu̶chu̶ñ y neby je̱'e̱ ayo'on ka'anaagnáx ye̱jkku̶xu̶chu̶ñ ya naaxwiiñ naag'ook naty timychojkku̶xyu̶ñ.

7Peru̶ ko naty je̱'e̱ tyu̶y'ajt tu̶ ok'ye̱jktaaygyu̶xy, mu̶'it je̱'e̱ ju̶bu̶k ju̶yujk mu̶dyiibu̶ pu̶dzu̶u̶mb ma je̱'e̱ jut ayoodaakt myajtzú̶gu̶xu̶ch, myu̶madaaku̶gu̶xu̶ch y yaj'o'ku̶gu̶xu̶ch. 8Jim mu̶jtu'ugujk je̱'e̱ ñi'kx wyu̶'u̶mgu̶xu̶ch ma je̱'e̱ kajpt ma je̱'e̱ Wyindzú̶n yajcruutzpe̱jtu̶gu̶xyu̶ñ, je̱'e̱ mu̶dyiibu̶ du'un nigoo yajtijpu̶ñ Sodoma y Egipto. 9Y tu̶gu̶u̶g xu̶u̶ ja'akúpt je̱'e̱ ñi'kx du'un y'ijtku̶xu̶ch, chi je̱'e̱ ja'ay y'ijx tyú̶kxu̶gu̶xu̶ch mu̶dyiibu̶ xii yaa mutzk naax mutzk kajpt tzóngu̶xpu̶ñ, mu̶dyiibu̶ ñi'kx kyopt kyolor tu̶gachjyatyu̶ñ ajku̶xy, mu̶dyiibu̶ tu̶gachjyaty kápxku̶xpu̶ñ y du'uñdyu̶ je̱'e̱ naax kajpt kyu̶xy'ajta'ayu̶ñ, y ka'p ku'ubu̶jkku̶xu̶ch ko je̱'e̱ o'ogyjya'ay yajnaaxtu̶gu̶u̶yu̶gu̶xu̶ch. 10Je̱'e̱ ja'ay mu̶dyiibu̶ yaa naaxwiiñ tzu̶naaygyu̶xpu̶ñ jootkugu̶u̶ygyu̶xu̶p je̱' ko naty je̱'e̱ me̱tzkpu̶ nidu̶y'ajt'ajtpu̶ tu̶ y'o'kku̶xy. Xoongu̶x ijtku̶xu̶p y ñaymyooyu̶gu̶xu̶ch ku̶xyu̶ tijaty amíñ u̶xyu̶py, je̱' ko je̱'e̱ me̱tzkpu̶ ayuuknajtzkapxu̶u̶ybyu̶ najty nigoo y'ayo'onmooyu̶gu̶xy.

11Peru̶ kudu̶gu̶u̶g xu̶u̶ ja'akúpt, chi je̱'e̱ Dios yajjuugypyu̶jktu̶gajtzu̶gu̶xy y pyu̶du̶'kku̶xy ja'adu'ook, y ku̶xyu̶ pu̶n du'un ijxku̶x tú̶kxku̶xu̶ñ tzu̶gu̶u̶ygyu̶x je̱'e̱ mu̶k. 12Mu̶'it je̱'e̱ me̱tzkpu̶ nidu̶y'ajt'ajtpu̶ ayuuk tu'ug mu̶k mu̶doogu̶xy chooñ tzajpjooty, ñu̶maayu̶gu̶xy: “¡Pe̱jtku̶x yam!” Y Mu̶'it jokjooty chajppe̱jtku̶xy, y ijx tú̶kxu̶gu̶x je̱'e̱ myu̶dziptu̶jk ajku̶xy. 13Y mu̶'ityu̶ je̱'e̱ temblor mu̶k ñajxy, chi je̱'e̱ kajpt tu'kpú̶ky jyijty wyindu̶gooy je̱'e̱ majkpú̶kypyu̶ kajpt, mu̶u̶d je̱'e̱ mu̶k temblor y juxtujk mil je̱'e̱ ja'ay y'o'kku̶xy. Je̱'e̱ mu̶dyiibu̶ ja'ay jakwu̶'u̶mgu̶xu̶ñ kyu'umaay jya'aymye̱jtzku̶x je̱'e̱ Dios, je̱'e̱ mu̶dyiibu̶ jiiby tzajpjootyu̶ñ, cham mu̶k jyanchtzu̶gu̶u̶ygyu̶xy.

14Najx je̱'e̱ mu̶me̱tzkpu̶ ayo'on, peru̶ tzojku̶ je̱'e̱ mu̶du̶gu̶u̶kpu̶ myiinu̶.

Je̱'e̱ mu̶juxtujkpu̶ trompeta

15Chi je̱'e̱ mu̶juxtujkpu̶ ángel tyrompeta yajxuuxy, y chi je̱'e̱ ayuuk jiiby tzajpjooty may yajmu̶dooy, mu̶dyiibu̶ mu̶naangu̶xpu̶ñ:

“Je̱'e̱ ane̱'e̱mu̶ñ mu̶dyiibu̶ ya naaxwiiñ

je̱' cham tu̶ kyu̶'u̶du̶gu̶u̶yu̶nu̶ je̱'e̱ nWindzú̶n Dios ajtu̶m ajku̶xy y je̱'e̱ Kyristo,

y wiinu̶u̶xu̶u̶ je̱'e̱ y'ane̱'e̱mgu̶xu̶ch.”

16Je̱'e̱ ipxmu̶daaxkpu̶ amu̶jja'aydyu̶jk, mu̶dyiibu̶ najty u̶ñaaygyu̶xpu̶ñ ma je̱'e̱ y'ane̱'e̱mdaakt ajku̶xyu̶ñ jim Dios winduuy, ku̶jx je̱'e̱ wyindaaktaaygyu̶xy naaxkú̶xy y o'owu̶dajtku̶xy je̱'e̱ Dios, 17myu̶naangu̶xy:

“Cham je̱'e̱ Dioskujuuyu̶p nmooygyu̶xy, Windzú̶n, Dios mu̶jmu̶k'ajtmu̶u̶dpu̶,

miich je̱' je̱'e̱ mu̶dyiibu̶ ijtpu̶ñ y je̱'e̱ mu̶dyiibu̶ najty je'emy ijtpu̶ñ,

je̱' ko tu̶ miich je̱'e̱ mu̶jmu̶k'ajtu̶ñ mbaady y tu̶ m'ane̱'e̱mdu̶gu̶'u̶y.

18Ku̶xyu̶ je̱'e̱ naax kajpt xymyu̶joot'ambu̶jkku̶xy,

peru̶ tu̶ je̱'e̱ xu̶u̶ tiempo paady mu̶naa miich je̱'e̱ myajkumu̶dowaangu̶xyu̶ñ,

mu̶naa miich je̱'e̱ o'ogyjya'ay mdu̶ydyuna'añu̶ñ.

Y mmooygyu̶xu̶py miich oy'ajt

je̱' je̱'e̱ mduumbu̶ ayuuknajtzkapxu̶u̶ybyu̶du̶jk ajku̶xy,

je̱'e̱ mu̶dyiibu̶ yajpaatku̶xpu̶ñ ma je̱'e̱ mja'ayu̶ñ,

y je̱'e̱ mu̶dyiibu̶ je̱'e̱ mxu̶u̶ xymyu̶jpu̶daaku̶yu̶byu̶ñ ajku̶xy,

wan myu̶ju̶ch myútzku̶ch ajku̶xy.

Y myajku'udu̶gooygyu̶xu̶py je̱' je̱'e̱ mu̶dyiibu̶ je̱'e̱ ja'ay ya naaxwiiñ yajtuundu̶gooygyu̶xpu̶ñ.”

19Mu̶'it je̱'e̱ Dios tyu̶jk y'awaach, je̱'e̱ mu̶dyiibu̶ jiiby tzajpjootyu̶ñ, chi je̱'e̱ kaaxu̶ jiiby yaj'ijxy ma je̱'e̱ Dios tyu̶jku̶ñ ma je̱'e̱ Dios kyapxytyuunu̶ñ y'ityu̶ñ. Y chi wyu̶dzujky, yajmu̶dooy je̱'e̱ ne̱'e̱mu̶ñ, je̱'e̱ ane̱e̱ mu̶k yaaxy jyojky, je̱'e̱ temblor ñajxy y mu̶k tu̶u̶tz tuu.

Currently Selected:

Apocalipsis 11: MIXE

Highlight

Copy

Compare