Apocalipsis 10

Je̱'e̱ ángel, y je̱'e̱ mutzkpu̶ naky abu̶dity ja'aybyu̶

1Chi u̶u̶ch je̱'e̱ ángel mu̶k'ajtmu̶u̶dpu̶ ja'adu'ug n'ijxy ko tzajpjooty kyu̶da'agy jok'agujk; jim najty i'inch tu'ug mu̶u̶du̶ch ma je̱'e̱ kyu'ubajku̶ñ, janch adu̶kxp najty je̱'e̱ wyiin jyu̶jp, neby je̱'e̱ xu̶u̶ju̶ñ, y je̱'e̱ tyeky du'un je̱'e̱ kyu̶xu̶'u̶gy neby je̱'e̱ mu̶jju̶u̶nyé̱ngu̶ñ. 2Jim najty mutzk naky abu̶dity ja'aybyu̶ tu'ug ku̶u̶ywa'kxy ku̶'u̶yu̶ch, y chi je̱'e̱ a'oy'eembyu̶ tyeky pu̶daaky mejywingú̶xy y je̱'e̱ anajty'eembyu̶ tyeky pu̶daaky naaxwiingú̶xy. 3Y chi janch mu̶k yaaxkeeky du'un neby je̱'e̱ jaamgaa myu'uyu̶ñ; y ko yaaxkeeky, chi je̱'e̱ ane̱e̱ juxtujk y'adzoowimbijtu̶. 4Ko je̱'e̱ juxtujkpu̶ ane̱e̱ y'adzodaaygyu̶xy, u̶u̶ch nguja'awe̱e̱mbyu̶ch je̱'e̱ najty; peru̶ u̶u̶ch je̱'e̱ ayuuk tu'ug nmu̶dooy chooñ tzajpjooty, xyñu̶ma'ayu̶ch: “Mu̶dat adaa ayuuk yu'uch neby je̱'e̱ juxtujkpu̶ ane̱e̱ tu̶ myu̶naangu̶xyu̶ñ y ka'p mguja'ay.”

5Mu̶'it je̱'e̱ ángel mu̶dyiibu̶ u̶u̶ch n'ijxu̶ñ tyu̶na'ay mejywingú̶xy y naaxwingú̶xy, y'a'oygyu̶'u̶ tzajpxajju̶'ky, 6y chi je̱'e̱ y'ayuuk awanu̶u̶y ma je̱'e̱ mu̶dyiibu̶ wiinu̶u̶xu̶u̶ jugy'ajtpu̶ñ, je̱'e̱ mu̶dyiibu̶ je̱'e̱ tzajp yajkoju̶ñ, je̱'e̱ naaxwiimbu̶, je̱'e̱ mejy y ku̶xyu̶ mu̶dyiibu̶ jii yajpaattaaybyu̶ñ. Y myu̶naañ: “Tu̶ je̱'e̱ xu̶u̶ tiempo wyingoonu̶ mu̶naa u̶u̶ch je̱'e̱ tzaachpyu̶ ayo'on ya naaxwiiñ ngue̱xa'añu̶ñ. 7Ko naty tu̶ myu̶baad'áty mu̶naa je̱'e̱ mu̶juxtujkpu̶ ángel tyrompeta yajxuuxtu̶gu̶'u̶wu̶chu̶ñ, tu̶ naty je̱'e̱ Dios yu'uchpyu̶ tyu̶y'ajt du'un kya'pxy, neby je̱'e̱ tyuumbu̶du̶jk ku̶'u̶m yajnejwu̶u̶ygyu̶xyu̶ñ je̱'e̱ y'ayuuknajtzkapxu̶u̶ybyu̶du̶jk ajku̶xy.”

8Je̱'e̱ ayuuk mu̶dyiibu̶ u̶u̶ch najty tu̶ n'okmu̶doobu̶ju̶ñ, je̱'e̱ mu̶dyiibu̶ tzajpjooty tzombu̶ñ ja'adu'ook xymyu̶gápxnu̶ba, y xyñu̶maayu̶ch: “Nu̶kx y ku̶u̶ychów je̱'e̱ ku̶u̶ywa'kxypyu̶ mutzk naky abu̶dity ja'aybyu̶, je̱'e̱ mu̶dyiibu̶ je̱'e̱ ángel jim ku̶'u̶gú̶y myu̶dajtypyu̶ñ, je̱'e̱ mu̶dyiibu̶ tu̶naaybyu̶ñ mejywingú̶xy y naaxwingú̶xy.” 9Chi u̶u̶ch je̱'e̱ ángel nninu̶kxy y nyujkwaañu̶ch ko u̶u̶ch je̱'e̱ mutzk naky abu̶dity ja'aybyu̶ wan xymyo'oy, y chi u̶u̶ch xy'adzooy: “Chaa matz y pu'uy. Pa'ag yu̶'u̶ xy'adu̶gu̶'u̶wa'añ neby je̱'e̱ ceru̶pa'agnu̶u̶ju̶ñ, peru̶ ko jiiby mjootjooty kyu̶da'agu̶ch jiiby je̱'e̱ tya'amu̶'u̶wu̶ch.”

10Chi u̶u̶ch je̱'e̱ mutzk naky abu̶dity ja'aybyu̶ ngu̶u̶ychooy, je̱'e̱ mu̶dyiibu̶ je̱'e̱ ángel najty kyu̶'u̶yu̶ñ, y chi u̶u̶ch nbu'uy; y janch pa'ag u̶u̶ch je̱'e̱ xy'adu̶gu̶u̶y neby je̱'e̱ ceru̶pa'agnu̶u̶ju̶ñ, peru̶ ko u̶u̶ch najty tu̶ n'okku'u''uuknáxy, chi u̶u̶ch jiiby njootjooty tya'amu̶u̶y. 11Mu̶'it u̶u̶ch xyñu̶maaygyu̶xy: “Mjatytimyñigápxu̶py ja'adu'ook neby je̱'e̱ Dios myu̶na'añu̶ñ ma je̱'e̱ mutzk naax mutzk kajpt mayu̶ñ, y du'uñdyu̶ je̱'e̱ naax kajpt kyu̶xy'ajta'ayu̶ñ, ma je̱'e̱ mu̶dyiibu̶ tu̶gachjyaty kápxku̶xpu̶ñ y ma je̱'e̱ ane̱'e̱mbu̶du̶jk ajku̶xyu̶ñ.”

Currently Selected:

Apocalipsis 10: MIXE

Highlight

Copy

Compare