Apocalipsis 12

Je̱'e̱ to'oxyu̶jk y je̱'e̱ awa'an tza'añdy

1Mu̶'it mu̶j ijxpe̱jt tu'ug tzajpkú̶xy yaj'ijxy: tu'ug to'oxyu̶jk ñi'idu̶góyu̶ch mu̶u̶d je̱'e̱ xu̶u̶, du'un neby du'umbu̶ wyit ni'imóchu̶chu̶ñ, cham je̱'e̱ po'o yajwa'kpéty y mu̶u̶du̶ch tu'ug koronu̶ ma je̱'e̱ kyu'ubajku̶ñ, mu̶dyiibu̶ mu̶dza'a majmé̱tzk mu̶dajtpu̶ñ. 2Je̱'e̱ to'oxyu̶jk ungmu̶u̶d je̱'e̱ najty, y mu̶kjaty najty ya'axy jyoky mu̶u̶d je̱'e̱ tzaachpyu̶ ko je̱'e̱ y'ung najty pada'añ. 3Mu̶'it ijxpe̱jt ja'adu'ug tzajpkú̶xy yaj'ijxy: tu'ug mu̶j awa'an tza'añdy, tzaptz je̱'e̱ ñi'kx y juxtujk je̱'e̱ kyu'ubajk, majk kyapt y tu'ugjáty koronu̶ ma je̱'e̱ kyu'ubajku̶ñ. 4Mu̶u̶d je̱'e̱ pyi'ixy yajpapeety yajpajáxy tu'kpú̶ky je̱'e̱ tu̶gu̶u̶gpú̶kypyu̶ mu̶dza'a, je̱'e̱ mu̶dyiibu̶ jim tzajpku̶xyu̶ñ, y ku'uxijtnajxy ya naaxwiiñ. Je̱'e̱ awa'an tza'añdy jim je̱'e̱ wya'kxu̶jpy ma je̱'e̱ to'oxyu̶jk wyinduuyu̶ñ, je̱'e̱ mu̶dyiibu̶ najty ungpadaambu̶ñ, neby je̱'e̱ y'ung mu̶'ityu̶ tzu'udzaanu̶ju̶ñ ko naty myiñ. 5Y chi je̱'e̱ to'oxyu̶jk y'ungpaaty; yajma'axung'ajty tu'ug ya'ay'ana'k, je̱'e̱ mu̶dyiibu̶ je̱'e̱ naax kajpt najty mu̶k ane̱'e̱maambu̶ñ, mu̶u̶d je̱'e̱ mu̶kpu̶ ane̱'e̱mu̶ñ. Peru̶ chi je̱'e̱ y'ung yajpu̶jky y yajnú̶kxu̶xu̶ ma je̱'e̱ Diosu̶ñ y ma je̱'e̱ y'ane̱'e̱mdaaktu̶ñ, 6y ke̱e̱k je̱'e̱ to'oxyu̶jk ñu̶kxy adu'ugtuum, ma je̱'e̱ Dios it lugaar najty tu'ug tu̶ ñi'ixu̶u̶yu̶xu̶ju̶ñ ma yajkáy yaj'u'ugu̶u̶wu̶chu̶ñ tu'k mil ja'ame̱jtzmu̶go'px ja'atu̶gu̶'px xu̶u̶.

7Chi je̱'e̱ tzip jiiby tzajpjooty tyuunu̶: Miguel mu̶dyiibu̶ je̱'e̱ mu̶j'ane̱'e̱mu̶ñ mu̶u̶du̶ñ y mu̶u̶d je̱'e̱ maybyu̶ ángelestu̶jk tziptuungu̶x mu̶u̶d je̱'e̱ awa'an tza'añdy y mu̶u̶d je̱'e̱ y'ángelestu̶jk nandu'un, 8peru̶ ka'p je̱'e̱ awa'an tza'añdy y mu̶u̶d je̱'e̱ y'ángelestu̶jk myu̶madaakku̶xy, y ka'p je̱'e̱ tu̶gu̶ydyaakt jiiby tzajpjooty okpaatku̶xnu̶. 9Y du'un je̱'e̱ mu̶j awa'an tza'añdy jiiby tzajpjooty yaj'u̶x'ojy, je̱'e̱ jekycha'añdy je̱'e̱ mu̶dyiibu̶ xu̶u̶'ajtpu̶ñ Mu̶jku'u y ka'a'óybyu̶ windzú̶n, je̱'e̱ mu̶dyiibu̶ je̱'e̱ naaxwiiñjya'ay ku̶xyu̶ win'u̶u̶mbu̶ñ. Chi ya naaxwiiñ yajku'uju̶bijpnajxku̶xy je̱' y mu̶u̶d je̱'e̱ y'ángelestu̶jk.

10Mu̶'it u̶u̶ch je̱'e̱ ayuuk tu'ug janch mu̶k nmu̶dooy chooñ tzajpjooty, myu̶na'añ:

“Tu̶ je̱'e̱ aanu̶mu̶ ni'idzooku̶ñ myu̶baad'áty

je̱'e̱ nDios myu̶k'ajt y y'ane̱'e̱mu̶ñ ajtu̶m ajku̶xy y je̱'e̱ Kyristo kyu'utujku̶ñ,

je̱' ko tu̶ je̱'e̱ xu̶'u̶bu̶ u̶u̶mbu̶ yaj'u̶x'ojy

mu̶dyiibu̶ je̱'e̱ nmu̶gu'ugtu̶jk xyu̶'u̶wu̶py xy'u̶u̶nu̶py ajtu̶m ajku̶xy,

je̱'e̱ mu̶dyiibu̶ najty xu̶u̶m tzum xu̶'u̶gu̶xp u̶u̶ngu̶xpu̶ñ

ma je̱'e̱ nDios winduuy ajtu̶m ajku̶xyu̶ñ.

11Je̱'e̱ nmu̶gu'ugtu̶jk je̱'e̱ mu̶jku'u tu̶ mu̶madaakku̶xy

mu̶u̶d je̱'e̱ Borreegu̶'úng ñe'pty mu̶dyiibu̶ te̱e̱m yojku̶ñ,

y mu̶u̶d je̱'e̱ ayuuk tu̶y'ajt mu̶dyiibu̶ kyapxwa'kxku̶xu̶ñ;

ka'p je̱'e̱ y'o'ku̶ñ tzu̶gu̶u̶ygyu̶xy,

y naydyujku̶gu̶x ko y'o'kku̶xu̶ch.

12¡Jootkugu̶u̶ygyu̶x, miich mu̶dyiibu̶ jiiby tzajpjooty tzu̶naaygyu̶xpu̶ñ!

¡Peru̶ ayo'on padaangu̶xp je̱'e̱ mu̶dyiibu̶ ya naaxwiiñ y mejyjyooty tzu̶naaygyu̶xpu̶ñ,

je̱' ko ñejwu̶u̶yñu̶py je̱'e̱ mu̶jku'u ko je̱'e̱ tyiempo tu̶ myu̶baad'ajtnu̶,

paady je̱'e̱ miich ju̶u̶n awa'an xyñimiingu̶xy!”

13Ko je̱'e̱ awa'an tza'añdy ñay'ijxu̶ najty tu̶ yajku'uju̶bijpnáxy ya naaxwiiñ, chi je̱'e̱ to'oxyu̶jk padu'ubu̶jky je̱'e̱ mu̶dyiibu̶ najty tu̶ y'ungpaadyu̶ñ. 14Peru̶ yajmooy je̱'e̱ to'oxyu̶jk me̱tzk ku'uwajke̱e̱kt mu̶jjátypyu̶ neby du'un jyu̶yú̶yu̶chu̶ñ ñú̶kxu̶ch adu'ugtuum ma je̱'e̱ y'itu̶ñ, ma je̱'e̱ awa'an tza'añdy ka'p pyadu̶u̶wu̶chu̶ñ, ma tu̶gu̶u̶g jumu̶jt ja'akúpt yajkaay yaj'uuku̶ju̶ñ. 15Chi je̱'e̱ awa'an tza'añdy nu̶u̶ yajpu̶dzu̶u̶my ma je̱'e̱ y'awaku̶ñ, neby du'un kom nu̶u̶ y'awimbídu̶chu̶ñ y ñu̶u̶dzu̶mu̶u̶ju̶ch je̱'e̱ to'oxyu̶jk, 16peru̶ je̱'e̱ naax je̱'e̱ to'oxyu̶jk pube̱jtu̶, awaatz je̱'e̱ naax y uuktu̶u̶ch je̱'e̱ kom nu̶u̶ mu̶dyiibu̶ je̱'e̱ awa'an tza'añdy najty tu̶ yajpu̶dzú̶my ma je̱'e̱ y'awaku̶ñ. 17Je̱' gyu̶xpu̶ je̱'e̱ awa'an tza'añdy mu̶u̶d y'awa'andaaky mu̶u̶d je̱'e̱ to'oxyu̶jk, y chi ñu̶kxy tziptuumbu̶ ma je̱'e̱ to'oxyu̶jk y'ok'ungtu̶jk y'ok'ana'ktu̶jku̶ñ, mu̶dyiibu̶ je̱'e̱ Dios y'ane̱'e̱mu̶ñ kuydyuungu̶xpu̶ñ y mu̶dyiibu̶ tu̶y tu'uda'agy kuydyuungu̶xpu̶ñ je̱'e̱ ayuuk tu̶y'ajt mu̶dyiibu̶ je̱'e̱ Jesús kyapxwa'kxu̶ñ. 18Y chi je̱'e̱ awa'an tza'añdy tyu̶naayxyu̶jpy#12.18 Y chi je̱'e̱ awa'an tza'añdy tyu̶naayxyu̶jpy: nije̱' jaaybyu̶du̶jk myu̶naangu̶xy: y u̶u̶ch tu̶naabyu̶ch najty. Nije̱' jaaybyu̶du̶jk jim we̱e̱nu̶ tu̶ yujkjaaygyu̶xy ma je̱'e̱ v. 18 je̱'e̱ mu̶dyiibu̶ jim miimb ma je̱'e̱. jim mejypya'.

Currently Selected:

Apocalipsis 12: MIXE

Highlight

Copy

Compare