Santiago 4

Ko je̱'e̱ naaxwiiñ nmu̶gu'ug'ajtu̶mu̶ch

1¿Ma je̱'e̱ tzip ma'ad chooñ ko du'un mnaydyuunu̶gu̶xy agu̶ miich? Jiiby jootjooty winma'añjyooty je̱'e̱ ju̶bu̶k'adzojku̶ñ chooñ mu̶dyiibu̶ je'emy mja'atunaangu̶xypyu̶ñ. 2Miich ajku̶xy mdzojkku̶xypy tii du'umbu̶, y ko mga'apaatku̶xy, je̱'e̱ mmu̶gu'ug myaj'o'kku̶xy, chi mga'ayajmu̶'oy'ijxku̶xy ku̶xyu̶ tijaty. Y ko mga'apaatku̶xy tijaty mja'atzojkku̶xypyu̶ñ, chi mnaymyu̶dzibu̶u̶yu̶gu̶xy y mdziptuungu̶xy. Ka'p mbaatku̶xy tii mja'atzojkku̶xypyu̶ñ je̱' ko je̱'e̱ Dios mga'a''amdoowu̶ ajku̶xy, 3y pu̶nu̶ m'amdoowu̶py ajku̶xy, y ka'p mbaatku̶xy, paady je̱'e̱ mga'apaatku̶xy je̱' ko ka'p oy m'amdoogu̶xy, y ko jim myajtunaangu̶xy ma ka'p pyadyiiju̶ñ. 4¡Miich ja'ay ajku̶xy mu̶dyiibu̶ je̱'e̱ Dios mu̶duundu̶gooygyu̶xpu̶ñ! ¿Nej ka'p miich mnejwu̶u̶ygyu̶xy ko je̱'e̱ naaxwiiñ xondaaku̶ñ nmu̶dnaymyu̶gu'ug'ajtu̶mu̶ch ajku̶xy nmu̶dzip'ajtypy naty je̱'e̱ Dios du'un ajtu̶m ajku̶xy? Wanpú̶nu̶ch pu̶n je̱'e̱ naaxwiiñ xondaaku̶ñ mu̶dnaymyu̶gu'ug'ajtu̶bu̶ñ, mu̶dzip je̱'e̱ du'un wyimbity ma je̱'e̱ Diosu̶ñ. 5Paady je̱'e̱ Dios ñaky du'un myu̶na'añ: “Dios mu̶j ku̶je̱e̱ je̱'e̱ xychojk xyjyu̶wu̶u̶yu̶m ajku̶xy.”#4.5 Dios mu̶j ku̶je̱e̱ je̱'e̱ xychojk xyjyu̶wu̶u̶yu̶m ajku̶xy: nije̱' wiingpu̶ jaaybyu̶du̶jk myu̶naangu̶xy: Dios mu̶j ku̶je̱e̱ je̱'e̱ Espíritu Santo tzoky ju̶wu̶'u̶y mu̶dyiibu̶ tu̶ xyaj'adu̶gu̶u̶y xyajjoottu̶gu̶u̶yu̶mu̶ñ ajku̶xy. 6Peru̶ je̱'e̱ Dios xypyube̱jtp xypyudu̶gu̶u̶yu̶mb ajku̶xy mu̶u̶d je̱'e̱ myay'ajtu̶ñ, je̱' ko du'un je̱'e̱ Dios ñaky myu̶na'añ: “Dios ka'p je̱'e̱ oy'ixy je̱'e̱ mu̶dyiibu̶ mu̶j ku̶xp nayjyu̶wu̶u̶yu̶gu̶xpu̶ñ, peru̶ pyubejtypy pyu̶du̶gu̶u̶by mu̶u̶d je̱'e̱ may'ajtu̶ñ, je̱'e̱ mu̶dyiibu̶ yuung naaxypy ja'ay'ajtku̶xpu̶ñ.” 7Nayyajku̶'u̶du̶gu̶u̶yu̶gu̶x je̱'e̱ Dios tu'ug'aa tu'ugjoot. Windu̶naaygyu̶x je̱'e̱ mu̶jku'u mu̶k, y ke̱'e̱gu̶p je̱' ma miich ajku̶xyu̶ñ. 8Mu̶wingoongu̶x je̱'e̱ Dios tu'ug'aa tu'ugjoot, y mu̶'it je̱'e̱ Dios miich xymyu̶wingoongu̶xu̶ch y xypyube̱jt xypyudu̶gu̶u̶ygyu̶xu̶ch. ¡Yajwaatzku̶x je̱'e̱ mboky mgu̶dyeey, miich pokyjya'aydyu̶jk ajku̶xy! ¡Yajwaatzku̶x je̱'e̱ mjoot mwinma'añ miich mu̶dyiibu̶ je̱'e̱ Dios tzojkku̶xp ju̶wu̶u̶ygyu̶xpu̶ñ y nan m'adzojkku̶xy nandu'un ku̶xyu̶ mu̶dyiibu̶ yaa naaxwiiñ yajpaatpu̶ñ! 9¡Tajku̶x maaygyu̶x, ju̶u̶ygyu̶x yaaxku̶x y yajnú̶kx yajju̶wu̶u̶ygyu̶x! ¡Wan je̱'e̱ mxiiku̶ñ myaaxu̶ñ awimbijtku̶xy ju̶u̶yu̶ñ yaaxu̶ñ, y je̱'e̱ mjootkujk'ajtu̶ñ wan taju̶ñ maayu̶ñ awimbijtku̶xy! 10Yuung naaxypy naybyu̶daaku̶gu̶x ma je̱'e̱ Windzú̶n Dios wyinduuyu̶ñ, y mu̶'it je̱'e̱ Dios xykyu'umaaygyu̶xu̶ch.

Ka'p je̱'e̱ mmu̶gu'ug mboky'íxu̶ch

11“Mu̶gu'uktu̶jk, ka'p ju̶bu̶k amíñ u̶xyu̶py mnayñigapx mnayñimu̶dyaaku̶gu̶xy. Pu̶n je̱'e̱ myu̶gu'ug ju̶bu̶k nigapxp nimu̶dyaakp, o poky'ixy, ñigapxypy ñimu̶dyaakypy je̱'e̱ Dios y'ane̱'e̱mu̶ñ du'un y poky'ixy je̱' Dios y'ane̱'e̱mu̶ñ. Y pu̶nu̶ mboky'ijxypy je̱'e̱ Dios y'ane̱'e̱mu̶ñ, tu̶ydyuumbu̶ naty mnaybyu̶da'agyii ma jya'apadyii mguydyúnu̶chu̶ñ je̱'e̱ Dios y'ane̱'e̱mu̶ñ. 12Tu'ug jii je'eyu̶ mu̶dyiibu̶ je̱'e̱ ane̱'e̱mu̶ñ tu̶ pu̶da'agyu̶ñ y nan je̱' nandu'un tu̶ydyuumbu̶'ajtp, y je̱' je̱' mu̶dyiibu̶ je̱'e̱ ja'ay yajni'idzookp o yajku'udu̶gooybyu̶ñ. Y miich ¿pu̶n miich ko miich je̱'e̱ mmu̶gu'ug mboky'ixy?

Ka'p yajnejwu̶'u̶y tii jaboom juxtu̶kp miimb ku̶daakpu̶ñ

13Okmu̶doogu̶x adaa mu̶dyiibu̶ u̶u̶ch yam nnigapxypyu̶ñ, miich mu̶dyiibu̶ du'un mu̶naangu̶xpu̶ñ: “Cham o jaboom wiing kajpt nnú̶kxu̶mu̶ch ajku̶xy, y jim tu'kjumu̶jt n'ajuuy n'adooku̶mu̶ch ajku̶xy, y nganar'ajtu̶mu̶ch je̱'e̱ meeñ ajku̶xy”, 14¡y ni mga'anejwu̶u̶ygyu̶xy tii jaboom juxtu̶kp miimb ku̶daakp ma je̱'e̱ mdzu̶naay mjugy'ajtu̶ñ ajku̶xyu̶ñ! Miich du'un miich ajku̶xy neby je̱'e̱ nu̶u̶ma'aju̶ñ mu̶dyiibu̶ tzojku̶ ku̶xu̶'kp, y chi tzojku̶ y'adu̶goyu̶'u̶y. 15Du'un u̶xyu̶py miich ni'igyu̶ mmu̶naangu̶xy: “Pu̶nu̶ je̱'e̱ Windzú̶n Dios du'un tzojkp, tzu̶naay jugy'ajtu̶mu̶p y nduunu̶mu̶py ku̶xyu̶ tijaty ajku̶xy.” 16Y miich mgu̶'u̶mwinma'añ miich m'oktimyyajtunaangu̶xypy mgápxku̶xy mmu̶dyaakku̶xy du'un amu̶j jootmu̶j. Y ku̶xyu̶ je̱'e̱ du'umbu̶ amu̶j jootmu̶j'adu̶u̶, ju̶bu̶k je̱'. 17Pu̶n je̱'e̱ oybyu̶ ja'anejwu̶u̶ybyu̶ñ y ka'p tuñ, pokytyuumb je̱'e̱ du'un.

Currently Selected:

Santiago 4: MIXE

Highlight

Copy

Compare