Santiago 5

Kumeeñjya'ay ñajtzkapxu̶u̶yu̶gu̶xy

1¡Okmu̶doogu̶x adaa, miich kumeeñdyu̶jk ajku̶xy! ¡Ju̶u̶ygyu̶x yaaxku̶x y yaaxku̶x jojku̶x mu̶u̶d je̱'e̱ ayo'on mu̶dyiibu̶ mbaad m'ixaangu̶xypyu̶ñ! 2Pu'udy je̱'e̱ mwit mmeeñ ajku̶xyu̶ñ. Tu̶ je̱'e̱ ukxytyu̶u̶ng mwit mdukxy xyjyu̶kxtaayu̶nu̶ ajku̶xy. 3Tu̶ je̱'e̱ m'ooru̶ y je̱'e̱ mplata tyok'u̶tztaaygyu̶xnu̶, y je̱'e̱ toogu̶ñ xyñidu̶y'ajt'adaangu̶xp y xyajku'udu̶goyaangu̶xy neby je̱'e̱ ju̶u̶n toogu̶ñ yajwindu̶góyu̶ñ. Tu̶ je̱'e̱ mwit mmeeñ myajni'igu̶daakku̶xy y tu̶ je̱'e̱ xu̶u̶ jumu̶jt wyingoonu̶ mu̶naa je̱'e̱ tu̶ydyuunu̶ñ myinaanu̶ju̶ñ. 4Je̱'e̱ tuumbu̶du̶jk mu̶dyiibu̶ ka'p mmu̶juuygyu̶xyu̶ñ, mu̶dyiibu̶ je̱'e̱ mbu̶da'agy xyajpu̶du̶'ku̶ju̶ñ ajku̶xy, je̱' jada'achám xyu̶'u̶gu̶xp ma je̱'e̱ Diosu̶ñ. Je̱'e̱ Windzú̶n Dios, je̱' mu̶jmu̶k'ajtmu̶u̶dpu̶, tu̶ je̱'e̱ tuumbu̶du̶jk xyu̶'u̶wu̶ñ mu̶doowu̶ ajku̶xy. 5Tu̶ miich ya naaxwiiñ jootkujk mdzu̶naay mjuugy'ajtku̶xy y tu̶ mxoongu̶xy ma je̱'e̱ mayñaxpu̶ xondaaku̶ñ ya naaxwiiñu̶ñ, tu̶ mguux mbe̱jtu̶gu̶xyu̶ y je̱'e̱ Dios tyu̶ydyuunu̶ñ je'eyu̶ mja'ay'e̱jxku̶xnu̶py, du'un neby je̱'e̱ ni'kxu̶bu̶ waj je'eyu̶ jya'ay'e̱jxnu̶ mu̶naa je̱'e̱ ja'ay chu'udzaanu̶nu̶. 6Miich tu̶ miich je̱'e̱ mdzaachtyuungu̶xy y myaj'o'kku̶xy je̱'e̱ ka'pu̶ ja'ay tu̶ tyuundu̶gooygyu̶xy, mu̶dyiibu̶ ka'p tii ijxku̶xy nejwu̶u̶ygyu̶xyu̶ñ y ka'p tu̶ xymyu̶windzoogu̶xy.

Je̱'e̱ me̱kxtujku̶ñ y je̱'e̱ Dios mu̶bu̶jktzowu̶u̶

7Miich mu̶gu'uktu̶jk, me̱kxtujkku̶x u̶xtu̶ koonu̶ je̱'e̱ Windzú̶n Jesucristo ya naaxwiiñ myínu̶ch, du'un neby je̱'e̱ kamduumbu̶ nu̶u̶ tuu ja'ay'éxyu̶ñ mu̶u̶d je̱'e̱ me̱kxtujku̶ñ neby je̱'e̱ pyu̶da'agy du'un y'oyu̶'u̶wu̶chu̶ñ. 8Me̱kxtujkku̶x miich nandu'un ajku̶xy y mu̶dajtku̶x je̱'e̱ mmu̶bu̶jku̶ñ tu'ug'aa tu'ugjoot y ka'p m'u̶xtu̶gu̶'u̶wa'kku̶xy, je̱' ko tzojku̶ je̱'e̱ Windzú̶n Jesús ya naaxwiiñ wyimbidaanu̶.

9“Mu̶gu'uktu̶jk, ka'p amíñ u̶xyu̶py mnayñi'oj mnayñiyaaxu̶u̶yu̶gu̶xy y ka'pu̶ myajtu̶ydyuungu̶xu̶ch, je̱' ko tu̶u̶ je̱'e̱ xu̶u̶ tiempo tyimywyingoonu̶ mu̶naa je̱'e̱ Dios, je̱'e̱ tu̶ydyuumbu̶, je̱'e̱ ja'ay tu̶ydyuna'añu̶ñ. 10“Mu̶gu'uktu̶jk, pu̶jkku̶x je̱'e̱ ijxpe̱jt jim ma je̱'e̱ Dios y'ayuuknajtzkapxu̶u̶ybyu̶du̶jk, je̱'e̱ mu̶dyiibu̶ je̱'e̱ Dios y'ayuuk tyu̶y'ajt kapxwa'kxku̶xu̶ñ du'un neby je̱'e̱ tzaachpyu̶ ayo'on ijxku̶xy paatku̶xy y mye̱kxtujkku̶xyu̶ñ. 11U̶u̶ch jootkujk u̶u̶ch je̱'e̱ ja'ay ndijku̶xy mu̶dyiibu̶ je̱'e̱ tzaachpyu̶ ayo'on mu̶madaakku̶xpu̶ñ mu̶u̶d je̱'e̱ me̱kxtujku̶ñ. Miich tu̶ miich je̱'e̱ ayuuk mmu̶doogu̶xy neby je̱'e̱ Job tzaachpyu̶ ayo'on mu̶najxy ku'ubu̶jkyu̶ñ, y nan mnejwu̶u̶ygyu̶xypy neby je̱'e̱ Dios oy'ajt myooyu̶ju̶ñ, je̱' ko mu̶j je̱'e̱ Windzú̶n Dios pa'a''ayoowu̶ñ mu̶u̶du̶ch y pa'a''ayoobu̶ Dios je̱'.

12“Mu̶gu'uktu̶jk, ka'p du'un mmu̶naangu̶xu̶ch y'ijxypy ñejwu̶u̶by je̱'e̱ Dios: ni mga'amu̶naangu̶xu̶ch y'ijxypy ñejwu̶u̶by je̱'e̱ tzajpjootypyu̶, ni mga'amu̶naangu̶xu̶ch y'ijxypy ñejwu̶u̶by je̱'e̱ naaxwiimbu̶, y ni pu̶n mga'akapxpaatku̶xu̶ch. Ko mmu̶naangu̶xu̶ch “Oy”, mguydyuungu̶xu̶py je̱'; y ko mmu̶naangu̶xu̶ch “Ka'p”, nan ka'p mguydyuungu̶xu̶ch, ka'pu̶ je̱'e̱ Dios xytyu̶ydyuungu̶xu̶ch.

13Pu̶nu̶ jii miich je̱'e̱ ayo'on jootmáy nije̱' m'ijxku̶xy mbaatku̶xy, mu̶bu̶jktzoogu̶x je̱'e̱ Dios. Pu̶nu̶ jii pu̶n jootkujk ñayjyu̶wu̶'u̶yii, wan je̱'e̱ Dios win'u̶u̶gu̶xy winyaaxku̶xy. 14Pu̶nu̶ jii pu̶n pyu̶gyii, wan je̱'e̱ tzajptu̶jk nigu'ubajk'ajtpu̶du̶jk yaaxtzoogu̶xy, wan je̱'e̱ Dios mu̶bu̶jktzoogu̶xu̶ch mu̶u̶d je̱'e̱ pa'amja'ay gyu̶xpu̶, y cham je̱'e̱ aceetyu̶ myajjáxku̶xy Windzú̶n Jesús kyu̶xpu̶. 15Y ko je̱'e̱ Dios mu̶bu̶jktzoogu̶xu̶ch mu̶u̶d je̱'e̱ mu̶bu̶jku̶ñ, tzo'ogu̶p je̱'e̱ pa'amja'ay, y yajmu̶kpú̶gu̶py je̱'e̱ Windzú̶n Dios; y pu̶nu̶ tu̶ naty tyuundu̶góy, yajwinmé̱kxu̶py je̱'e̱ pyoky. 16Paady, nnayyajnigápxu̶gu̶x je̱'e̱ mboky mgu̶dyeey nidu'ug nidu'ug, y mu̶bu̶jktzoogu̶x je̱'e̱ Dios amíñ u̶xyu̶py wan mdzookku̶xu̶ch. Je̱'e̱ tu'uda'agyjya'ay tu'ug'aa tu'ugjootpu̶ myu̶bu̶jktzoowu̶ñ mu̶j mu̶k'ajtu̶ñ je̱'e̱ mu̶u̶du̶ch. 17Je̱'e̱ Dios y'ayuuknajtzkapxu̶u̶ybyu̶ Elías du'un je̱'e̱ najty neby u̶u̶ch ajtu̶m ajku̶xyu̶ñ, y ko je̱'e̱ Dios mu̶bu̶jktzooy tu'ug'aa tu'ugjoot ko ka'p tyu'uwu̶ch, y ka'p tyuuy tu̶gu̶u̶g jumu̶jt ja'atudujk po'o. 18Kujeky je̱'e̱ Dios ja'adu'ook mu̶bu̶jktzooy ko tyu'uwu̶ch, chi ja'adu'ook tyuuy, y chi je̱'e̱ pu̶da'agy y'oyu̶u̶y.

19“Mu̶gu'uktu̶jk ajku̶xy, pu̶nu̶ jii miich je̱'e̱ ayuuk tu̶y'ajt nije̱' nidu'ug myajtu̶gooygyu̶xy y pu̶nu̶ je̱'e̱ wiingpu̶ xyajwimbijtku̶xp ma je̱'e̱ Dios y'ayuuk tyu̶y'ajtu̶ñ, 20nejwu̶u̶ygyu̶x miich ko wanpú̶nu̶ch pu̶n je̱'e̱ pokyjya'ay yajwimbijtp ma naty tu̶ ñu̶u̶du̶góy tyu'udu̶góyu̶ñ, tu̶ naty je̱'e̱ ja'ay y'aanu̶mu̶ du'un tu'ug yajni'idzooku̶ y nan tu̶ naty je̱'e̱ pyoky kyu̶dyeey du'un yajwinme̱kxtaayu̶yu̶.

Currently Selected:

Santiago 5: MIXE

Highlight

Copy

Compare